ನಾವೂ ಸಹ ಆ ತಂದೆಯಂತೆ ಅದೆಷ್ಟೋ ಬಾರಿ ಇನ್ನೊಬ್ಬರ ಮಾತು, ವರ್ತನೆ, ಸಮಯ ಹಾಗೂ ಸಂದರ್ಭಗಳನ್ನು ತಪ್ಪಾಗಿ ಅರ್ಥೈಸಿಕೊಂಡು ಸಂಬಂಧಗಳನ್ನು ದೂರ ಮಾಡಿಕೊಳ್ಳುತ್ತೇವೆ. ನಮಗೆ ನಾವೇ ಮಾನಸಿಕವಾಗಿ ಶಿಕ್ಷಿಸಿಕೊಳ್ಳುತ್ತೇವೆ. ಇಲ್ಲಸಲ್ಲದ ವಿವಾದ ಸೃಷ್ಟಿಸಿಕೊಳ್ಳುತ್ತೇವೆ. ಇನ್ನು ಕೆಲವೊಮ್ಮೆ ನಮ್ಮ ಮಾತನ್ನು ಬೇರೆಯವರು ತಪ್ಪಾಗಿ ಗ್ರಹಿಸಿದಾಗಲೂ ಇದೇ ಪರಿಸ್ಥಿತಿ ತಲೆದೋರುತ್ತದೆ. ಒಟ್ಟಾರೆ ತಪ್ಪು ಗ್ರಹಿಕೆಗಳು ಮನಸ್ಸಿನ ನೆಮ್ಮದಿ ಹಾಗೂ ಸುಖವನ್ನು ಕಸಿದುಕೊಳ್ಳುತ್ತವೆ. ಸೀಮಿತ ಮಾಹಿತಿ ಮತ್ತು ಕೇವಲ ಆ ಕ್ಷಣದ ಅನಿಸಿಕೆಗಳನ್ನು ಆಧರಿಸಿ ತ್ವರಿತವಾದ ಅಭಿಪ್ರಾಯ ರೂಪಿಸುವುದು ಸೂಕ್ತವಲ್ಲ. ಯಾವುದೇ ಮಾತು, ಘಟನೆ, ಸಮಯ, ಸಂದರ್ಭ ಅಥವಾ ವರ್ತನೆಗಳನ್ನು ಸರಿಯಾಗಿ ಅವಲೋಕಿಸಿ, ತಾಳ್ಮೆಯಿಂದ ಯೋಚಿಸಿ ನಿರ್ಧಾರಕ್ಕೆ ಬಂದಾಗ ಸಮಸ್ಯೆಯಾಗದು. ಕೇವಲ ಮುಖಪುಟವನ್ನು ನೋಡಿ ಪುಸ್ತಕದಲ್ಲೇನಿದೆ ಎಂಬುದನ್ನು ಅಳೆಯದೇ, ತಪ್ಪು ಗ್ರಹಿಕೆಗಳಿಗೆ ಬಲಿಯಾಗದೆ, ಪ್ರತ್ಯಕ್ಷ ಕಂಡುಕೇಳಿದರೂ ಪ್ರಮಾಣಿಸಿ ನೋಡುವ ತಾಳ್ಮೆ, ಜಾಣ್ಮೆ ರೂಢಿಸಿಕೊಂಡು ಪ್ರಬುದ್ಧತೆಯತ್ತ ಸಾಗೋಣ.
