ಆಧುನಿಕತೆ ಬೆಳೆದ ಹಾಗೆ ನಮ್ಮ ಆಲೋಚನೆ, ಚಿಂತನೆ, ಕೆಲಸ-ಕಾರ್ಯ, ಅಭಿರುಚಿ ಎಲ್ಲವೂ ಬದಲಾಗುತ್ತಿದೆ. ಅದೇ ಮಾದರಿಯಲ್ಲಿ ಟಿವಿಯಲ್ಲಿ ಬರುವ ಕಾರ್ಯಕ್ರಮಗಳೂ ಬದಲಾಗುತ್ತಿವೆ. ಮಹಿಳೆಯರಿಗಾಗಿ, ವಯಸ್ಸಾದವರಿಗಾಗಿ, ಯುವಕರಿಗಾಗಿ, ಪುರುಷರಿಗಾಗಿ, ಅಷ್ಟೇ ಏಕೆ ಮಕ್ಕಳಿಗಾಗಿಯೂ ವಿಶೇಷ ಕಾರ್ಯಕ್ರಮ, ರಿಯಾಲಿಟಿ ಶೋಗಳು ಬಂದಿವೆ. ಇದರಲ್ಲಿ ಮಕ್ಕಳು ಯಾವುದನ್ನು ಆರಿಸಿಕೊಳ್ಳಬೇಕು? ಅಪ್ಪ-ಅಮ್ಮ ಅಥವಾ ಅಜ್ಜ-ಅಜ್ಜಿ ನೋಡುವ ಕಾರ್ಯಕ್ರಮವನ್ನೇ ನೋಡಬೇಕೆ..? ಅಥವಾ ಬೇರೆಯದನ್ನೊ? ಮಕ್ಕಳ ಚಾನಲ್ಗಳಲ್ಲಿ ಪೌರಾಣಿಕ ಕಥೆ, ನೀತಿಕಥೆ, ಜ್ಞಾನ ಹೆಚ್ಚಿಸುವ ಕಾರ್ಯಕ್ರಮಗಳು ಪ್ರಸಾರವಾಗುತ್ತವೆ. ಕೆಲ ಕಾರ್ಟೂನ್ ಚಾನಲ್ಗಳಲ್ಲಿ ಪೌರಾಣಿಕ ಕಥೆಗಳ ಹೆಸರಿನಲ್ಲಿ ಕಾಲ್ಪನಿಕ ಕಥೆ ರೂಪದಲ್ಲಿ ಹೊಡೆದಾಡುವ ದೃಶ್ಯಾವಳಿಗಳನ್ನು ತೋರಿಸಲಾಗುತ್ತಿದೆ. ಇದನ್ನು ನೋಡಿದ ಮಕ್ಕಳು ಮನೆ-ಮಂದಿ ಮೇಲೂ ಬಾಣಪ್ರಯೋಗ, ಗದಾಪ್ರಹಾರ ನಡೆಸುವುದೂ ಉಂಟು! ಹಾಗಾದರೆ ಮಕ್ಕಳಿಗೆ ಟಿವಿಯಲ್ಲಿ ಏನನ್ನು ತೋರಿಸಬೇಕು ಎಂಬ ಪ್ರಶ್ನೆ ಮತ್ತೆ ಎದುರಾಗುತ್ತದೆ. ಜ್ಞಾನಾರ್ಜನೆಗೆ ಸಹಾಯವಾಗುವ ಅನಿಮಲ್ ಪ್ಲಾನೆಟ್ (ಕೇವಲ ಚಿತ್ರ ನೋಡಿದರೆ ಸಾಲದು, ಕಾಮೆಂಟರಿಯನ್ನು ಕೇಳಿಸಿಕೊಳ್ಳಬೇಕು), ನ್ಯಾಷನಲ್ ಜಿಯಾಗ್ರಫಿ, ಹಿಸ್ಟರಿ, ಸಂಗೀತ, ನೃತ್ಯ ಕಾರ್ಯಕ್ರಮ, ವರ್ಲ್ಡ್ ಟೂರ್ ಹೀಗೆ ಹಲವು ಕಾರ್ಯಕ್ರಮಗಳನ್ನು ಮಕ್ಕಳಿಗೆ ಪರಿಚಯಿಸಬಹುದು. ಆರಂಭದಲ್ಲಿ ರಾಗ ಎಳೆಯುವ ಮಕ್ಕಳು ನಂತರ ತಾವೇ ಅಭ್ಯಾಸ ಮಾಡಿಕೊಳ್ಳುತ್ತಾರೆ.
