ಮಕ್ಕಳು ತಮ್ಮ ಅಗತ್ಯಗಳನ್ನು ಅಮ್ಮನ ಮೂಲಕ ಅಪ್ಪನಿಗೆ ರವಾನಿಸುತ್ತಾರೆ. ಆದರೂ ಬೇಸರ ಮಾಡದೆ, ಮರು ಮಾತಿಲ್ಲದೆ ಅವನ್ನು ಪೂರೈಸಿಕೊಡುವವನು ಅಪ್ಪನೇ. ಕಷ್ಟ ಬಿದ್ದಾದರೂ ಸರಿಯೇ, ಸಾಲ ಮಾಡಿಯಾದರೂ ಸರಿಯೇ, ಮಕ್ಕಳು ತನಗಿಂತಲೂ ಹೆಚ್ಚು ಓದಬೇಕೆಂದು ಪ್ರಾಮಾಣಿಕವಾಗಿ ಬಯಸಿದವ ಅಪ್ಪ. ಮಕ್ಕಳಿಗೆ ಅಪ್ಪನ ಈ ನಿಟ್ಟುಸಿರು ಕೇಳಿಸಲಿಲ್ಲ. ಕಾರಣ ಕೇಳಿಸದ ಹಾಗೆ ಉಸಿರು ಕಟ್ಟಿ, ಅಪ್ಪ ಮಕ್ಕಳ ಭವ್ಯ ಭವಿಷ್ಯದ ನೊಗ ಹೊತ್ತಿದ್ದ. ತನ್ನ ಪಂಚೆ ಹರಿದು ಹೋಗಿದ್ದರೂ, ಮಕ್ಕಳಿಗೆ ಹೊಸಬಟ್ಟೆ ಕೊಡಿಸಿದ ಪುಣ್ಯಾತ್ಮ ಈತ. ತನ್ನ ಹುಟ್ಟುಹಬ್ಬವನ್ನು ಆಚರಿಸದಿದ್ದರೂ, ಮಕ್ಕಳ ಹುಟ್ಟುಹಬ್ಬವನ್ನು ಆಚರಿಸಲು ಮರೆತವನಲ್ಲ! ನಾವು ಹುಟ್ಟುವಾಗ ಹೀಗೆಯೇ ಬೆಳೆಯಬೇಕೆಂಬ ಸಲಹಾ ಪುಸ್ತಕ ಇರುವುದಿಲ್ಲ. ಅವನ್ನು ತಿಳಿಸಲೆಂದೇ ಅಪ್ಪ ಇರುತ್ತಾನೆ. ಈ ಜಗತ್ತು ಇರೋದೇ ಹೀಗೆ ಎಂದು ತಿಳಿದುಕೊಂಡವನು ಅಪ್ಪ. ಆದುದರಿಂದಲೇ ಬಾಲ್ಯದಲ್ಲಿ ಕಷ್ಟಗಳನ್ನು ಪರಿಚಯಿಸಿದ. ಏಕೆಂದರೆ ಬಡತನದಲ್ಲಿ ಬೆಳೆಯಬೇಕು. ಹಿರಿತನದಲ್ಲಿ ಬಾಳಬೇಕು ಮತ್ತು ಹಿರಿತನದಲ್ಲಿ ಸಾಯಬೇಕು ಎಂಬುದೇ ಇವನ ಸಿದ್ಧಾಂತ. ಆದುದರಿಂದ ಓದುವಾಗ ಅವಶ್ಯಕತೆಗಳನ್ನು ನೀಡಿದನೇ ಹೊರತು ಐಷಾರಾಮಿ ಸೌಕರ್ಯಗಳನ್ನಲ್ಲ! ಮಕ್ಕಳಲ್ಲಿ ಚಿಕ್ಕಂದಿನಿಂದಲೇ ಶಿಸ್ತನ್ನು ಹೇರಿದ ಸದಭಿರುಚಿಯ ಹವ್ಯಾಸಗಳನ್ನು ಹುಟ್ಟು ಹಾಕಿದ, ಹಾಗೂ ಅನೇಕಾನೇಕ ಸಾಧು ಸಂತರ ಮಹಾತ್ಮ ಮಹಾನ್ ವ್ಯಕ್ತಿಗಳ ಕತೆಗಳನ್ನು ಹೇಳಿದ; ಶಿಕ್ಷಣದ ಜೊತೆ ಸಂಸ್ಕಾರವನ್ನು ತುಂಬಿದ. ವರುಷದ 365 ದಿನಗಳಲ್ಲೂ ಮಕ್ಕಳ ಶ್ರೇಯಸ್ಸನ್ನೇ ಬಯಸಿದ. ತಪ್ಪುಗಳನ್ನು ಮಾಡಿದಾಗ, ಅಪ್ಪ ಮಕ್ಕಳಿಗೆ ಹೊಡೆಯಬಹುದು, ಆದರೆ ಮತ್ತೆ ಸಂತೈಸುವವನೂ ತಂದೆಯೇ.
