ಆ ನಟ ದೆಹಲಿಗೆ ಬಂದ ಕೂಡಲೇ ಅವನನ್ನು ವಿಮಾನ ನಿಲ್ದಾಣದಲ್ಲಿಯೇ ಭೇಟಿಯಾದ ಕೌಶಿಕ್ ಮೀರತ್ಗೆ ಹೋಗಲು ಅವನನ್ನು ಒಂದು ಕಾರಿನಲ್ಲಿ ಕರೆದುಕೊಂಡು ಹೊರಟ. ಅದೇ ಕಾರಿನಲ್ಲಿಯೇ ಕೌಶಿಕ್ನ ಇಬ್ಬರು ಸಹಚರರೂ ಇದ್ದರು. ಮಾರ್ಗಮಧ್ಯದಲ್ಲಿ ವಿಶ್ರಾಂತಿ ಪಡೆಯೋಣವೆಂದು ಆ ನಟನಿಗೆ ಹೇಳಿದ ಕೌಶಿಕ್ ಪೂರ್ವನಿಯೋಜನೆಯಂತೆ ಹಾದಿಯಲ್ಲಿದ್ದ ಪಟ್ಟಣವೊಂದಕ್ಕೆ ಹೋಗಿ ಅಲ್ಲಿದ್ದ ಮನೆಯೊಂದರಲ್ಲಿ ನಟನನ್ನು ಇಳಿಸಿದ. ಕೆಲಸಮಯದ ನಂತರ ಕೌಶಿಕ್ನ ಸಹಚರರು ನಟನ ಬಳಿ ಬಂದು, ‘ನೀನು ಜೀವಂತವಾಗಿ ಇಲ್ಲಿಂದ ಹೊರಗೆ ಹೋಗಬೇಕಾದರೆ ನಿನ್ನ ಎಟಿಎಂ ಕಾರ್ಡ್, ಕ್ರೆಡಿಟ್ ಕಾರ್ಡ್ ಮತ್ತು ಅವೆರಡರ ಪಿನ್ ನಂಬರ್ ಕೂಡಲೇ ಕೊಡು’ ಎಂದರು. ಹೆದರಿದ ನಟ ಅವರು ಹೇಳಿದಂತೆಯೇ ಮಾಡಿದ. ಎರಡೂ ಕಾರ್ಡಗಳನ್ನುಪಯೋಗಿಸಿದ ಆ ದುರುಳರು ನಟನ ಸುಮಾರು ಹನ್ನೆರಡು ಲಕ್ಷ ರೂಪಾಯಿ ಲಪಟಾಯಿಸಿದರು. ಆನಂತರ ಈ ವಿಷಯವನ್ನು ಯಾರಿಗಾದರೂ ಹೇಳಿದರೆ, ‘ನಿನ್ನನ್ನು ಇಲ್ಲೇ ಕೊಲೆಮಾಡಿ ನಿನ್ನ ಶವವನ್ನು ನದಿಗೆ ಎಸೆಯುತ್ತೇವೆ’ ಎಂದು ಬೆದರಿಸಿದರು. ತೀರಾ ಹೆದರಿದ ಆ ನಟನನ್ನು ದೆಹಲಿಯವರೆಗೆ ಕರೆದೊಯ್ದ ಕೌಶಿಕ್ನ ಸಹಚರರು ಮಹಾನಗರದ ಸರಹದ್ದಿನಲ್ಲಿ ಅವನನ್ನು ಬಿಟ್ಟು, ‘ಇಲ್ಲಿಂದ ನೀನು ಮುಂಬೈಗೆ ಹೋಗು, ಯಾರಿಗಾದರೂ ಈ ಸುದ್ದಿ ಹೇಳಿದರೆ ಮುಂಬೈನಲ್ಲಿರುವ ನಮ್ಮ ಜನರೇ ನಿನ್ನನ್ನು ಕೊಲೆ ಮಾಡುತ್ತಾರೆ, ಹುಷಾರ್’ ಎಂದು ಬೆದರಿಸಿ ಕಳಿಸಿದರು.
