ಮದುವೆಯಾದ ಹೊಸತರಲ್ಲಿ ಆಸ್ತಿಗಳನ್ನು ಖರೀದಿ ಮಾಡುವಾಗ, ಜವಾಬ್ದಾರಿಗಳನ್ನು ಸಮಾನವಾಗಿ ಹಂಚಿಕೊಳ್ಳಲು ಸಿದ್ಧವಿದ್ದಾರೆಯೇ ಇಲ್ಲವೇ ಎಂದು ಖಚಿತ ಪಡಿಸಿಕೊಳ್ಳಬೇಕು. ಹಾಗೆ ಮಾಡದೇ, ಜಂಟಿಯಾಗಿ ಕ್ರಯಪತ್ರ ಮಾಡಿಸಿಕೊಂಡರೆ , ಎಲ್ಲ ಜವಾಬ್ದಾರಿಗಳನ್ನೂ ಒಬ್ಬರೇ ನಿಭಾಯಿಸಿ ಮುಂದೆ ಹೀಗೆಲ್ಲ ಕಷ್ಟಪಡಬೇಕಾಗಬಹುದು. ಬೇನಾಮಿ ವ್ಯವಹಾರಗಳ ಕಾಯ್ದೆ ಈಗ ಇಲ್ಲದೇ ಇರುವುದರಿಂದ, ಆಸ್ತಿ ಖರೀದಿ ಪತ್ರದಲ್ಲಿ ನಿಮ್ಮ ಮತ್ತು ನಿಮ್ಮ ಪತಿಯ ಇಬ್ಬರ ಹೆಸರೂ ಇದ್ದರೆ, ಸಾಮಾನ್ಯವಾಗಿ ನ್ಯಾಯಾಲಯ, ನೀವಿಬ್ಬರೂ ಆಸ್ತಿಗೆ ಸಮಾನ ಪಾಲುದಾರರು ಎಂಬ ನಿರ್ಣಯಕ್ಕೆ ಬರುವ ಸಾಧ್ಯತೆ ಹೆಚ್ಚು. ನೀವು ಎಲ್ಲ ಸಂದರ್ಭಗಳನ್ನೂ ವಿವರಿಸಿ ಆಸ್ತಿಯ ಸಂಪೂರ್ಣ ಮಾಲೀಕಳು ನಾನೇ ಎನ್ನುವ ಹಕ್ಕು ಘೊಷಣೆಯನ್ನು ಕೇಳಿ ದಾವೆ ಸಲ್ಲಿಸಬಹುದು. ಅದೇ ದಾವೆಯಲ್ಲಿಯೇ ನ್ಯಾಯಾಲಯ ಪರ್ಯಾಯವಾಗಿ ಬೇರೆ ಸೂಕ್ತ ಆದೇಶವನ್ನೂ ಮಾಡಬಹುದೆಂದು ನೀವು ಕೇಳಿಕೊಳ್ಳಬಹುದು. ಆಗ ಆಸ್ತಿಗಳನ್ನು ಗಳಿಸಲು ನೀವು ಕೊಟ್ಟ ಹಣದ ಲೆಕ್ಕವನ್ನೂ , ಆಸ್ತಿಗೆ ಸಂಬಂಧಿಸಿದಂತೆ ನೀವು ಖರ್ಚು ಮಾಡಿರುವ ಹಣವನ್ನೂ , ಆಸ್ತಿಗಳ ಮೇಲೆ ಇರುವ ಸಾಲವನ್ನೂ ಗಮನದಲ್ಲಿಟ್ಟುಕೊಂಡು ನ್ಯಾಯಾಲಯ ಸೂಕ್ತ ಆದೇಶವನ್ನು ಮಾಡಬಹುದು. ಪ್ರಕರಣವನ್ನು ದಾಖಲಿಸಿದ ನಂತರ ಎದುರುದಾರರಿಗೆ ನೋಟಿಸ್ ಹೋದ ಮೇಲೆ ಪ್ರಕರಣವನ್ನು ಮಧ್ಯಸ್ಥಿಕೆಗೆ ಕಳಿಸಲು ಕೇಳಿಕೊಳ್ಳಿ. ಅಲ್ಲಿ ಮಧ್ಯಸ್ಥಿಕೆಗಾರರ ಸಹಾಯದಿಂದ ನೀವಿಬ್ಬರೂ ಒಂದು ರಾಜಿ ಸೂತ್ರಕ್ಕೆ ಬರಬಹುದು. ನಿಮ್ಮ ಪತಿ ರಾಜಿ ಸೂತ್ರಕ್ಕೆ ಒಪ್ಪದೇ ಹೋದರೆ ನ್ಯಾಯಾಲಯದಿಂದ ಎಲ್ಲ ಆಸ್ತಿಗಳಲ್ಲಿಯೂ, ಸಾಲಗಳಲ್ಲಿಯೂ ಇಬ್ಬರಿಗೂ ಅರ್ಧ ಭಾಗ ಆಗುವಂತೆ ಆದೇಶ ಸಿಗಬಹುದು.
