ಇದೀಗ ಮಹಾ ಶಿವರಾತ್ರಿಯ ಪರ್ವಕಾಲ. ಜಗತ್ತಿನಾದ್ಯಂತ ಇರುವ ಶಿವನ ಆರಾಧಕರು ಈಶ್ವರನನ್ನು ವಿಶೇಷವಾಗಿ ಪೂಜಿಸುತ್ತಾರೆ, ಆರಾಧಿಸುತ್ತಾರೆ. ನಮ್ಮ ಧರ್ಮಸ್ಥಳ ಕ್ಷೇತ್ರದಲ್ಲೂ ವಿಶೇಷವಾಗಿ ಶಿವರಾತ್ರಿಯನ್ನು ಆಚರಿಸಲಾಗುತ್ತದೆ. ವರ್ಷಪ್ರತೀ ಸಹಸ್ರಾರು ಸಂಖ್ಯೆಯಲ್ಲಿ ಭಕ್ತರು ಪಾದಯಾತ್ರೆಯಲ್ಲಿ ಆಗಮಿಸಿ, ಅಹೋರಾತ್ರೆ ಜಾಗರಣೆ ಮಾಡಿ ಶ್ರೀ ಮಂಜುನಾಥ ಸ್ವಾಮಿಯ ದರ್ಶನ ಮಾಡುತ್ತಾರೆ. ರಾತ್ರಿಯಿಡೀ ಶಿವ ಪಂಚಾಕ್ಷರಿ ಪಠಣ, ಭಜನೆ, ಸತ್ಸಂಗ ಕಾರ್ಯಕ್ರಮಗಳು ನಡೆದು ಶ್ರೀಸ್ವಾಮಿಯ ವೈಭವದ ಮಹಾರಥೋತ್ಸವ ನೆರವೇರುತ್ತದೆ. ಕ್ಷೇತ್ರಕ್ಕೆ ಪಾದಯಾತ್ರೆಯಲ್ಲಿ ಬರುವ ಅನೇಕ ಭಕ್ತರು ತಮ್ಮ ಅನುಭವ, ಅನಿಸಿಕೆಗಳನ್ನು ನನ್ನನ್ನು ಭೇಟಿಯಾದಾಗ ಹಂಚಿಕೊಳ್ಳುತ್ತಾರೆ. ರಾಜ್ಯದ ವಿವಿಧ ಭಾಗಗಳಿಂದ ಆಗಮಿಸುವ ಭಕ್ತರು, ‘ಸ್ವಾಮಿಗೆ ಹರಕೆ ಹೊತ್ತುಕೊಂಡಿದ್ದೆ, ಕಷ್ಟಗಳು ನಿವಾರಣೆಯಾಯಿತು, ಕಾಯಿಲೆ ಗುಣಮುಖವಾಯಿತು, ಉದ್ಯಮ ಕೈ ಹಿಡಿಯಿತು’ ಎಂದೆಲ್ಲ ಮನಃಪೂರ್ವಕವಾಗಿ ಹೇಳಿಕೊಂಡು ಸಂತೋಷ ವ್ಯಕ್ತಪಡಿಸುತ್ತಾರೆ.
