ಮೋಟಾರ್ ವಾಹನಗಳ ಕ್ಷೇತ್ರದಲ್ಲಿ ಇದೀಗ ಎಲೆಕ್ಟ್ರಿಕ್ ವಾಹನ (ಇವಿ)ಗಳ ಜಮಾನ ಶುರುವಾಗಿದ್ದು, ಜನತೆ ಬೆರಗುಗಣ್ಣಿನಿಂದ ನೋಡುತ್ತಿದ್ದಾರೆ. 2 ವರ್ಷದಿಂದೀಚೆಗೆ ನಡೆದಿರುವ ಬೆಳವಣಿಗೆ ಅಚ್ಚರಿ ಮೂಡಿಸುವಂಥದ್ದು. ಹೊಸ ಹೊಸ ಆವಿಷ್ಕಾರಗಳ ಜತೆಗೆ ಈ ಕ್ಷೇತ್ರದಲ್ಲಿ ಬರುತ್ತಿರುವ ಅಪರಿಮಿತ ಹೂಡಿಕೆಗಳು, ನೂರಾರು ಸ್ಟಾರ್ಟ್ಅಪ್ಗಳು, ಸಾಂಪ್ರದಾಯಿಕ ವಾಹನ ಉತ್ಪಾದಕರ ಇವಿ ಆಸಕ್ತಿ ಅಚ್ಚರಿ ಮೂಡಿಸುತ್ತಿದೆ. ಎಲ್ಲಕ್ಕಿಂತ ಮುಖ್ಯವಾಗಿ ಜನರ ನಿರೀಕ್ಷೆ ಹಾಗೂ ಅದಕ್ಕೆ ತಕ್ಕಂತೆ ದಿನದಿನಕ್ಕೂ ನವನವೀನ ಮಾದರಿಗಳು ಮಾರುಕಟ್ಟೆ ಪ್ರವೇಶ ಮಾಡುತ್ತಿರುವುದು, ಮಾರಾಟದಲ್ಲಿ ಚುರುಕುತನ ಇವಿ ಲೋಕ ಇನ್ನಷ್ಟು ಹಿಗ್ಗುವ, ವ್ಯಾಪ್ತಿ ವಿಸ್ತರಿಸುವ ವಾಹನ ಕ್ಷೇತ್ರದ ಅಂದಾಜುಗಳನ್ನೇ ತಲೆಕೆಳಗುಮಾಡುವಂತೆ ಕಾಣಿಸುತ್ತಿದೆ. ದ್ವಿಚಕ್ರ ವಾಹನ ಮಾತ್ರವಲ್ಲದೆ ಕಾರುಗಳಲ್ಲೂ ಇವಿ ಬಯಕೆ ಜನರಲ್ಲಿ ಕಾಣಿಸಿದೆ. ಮೂಲಸೌಕರ್ಯದ ಕೊರತೆ ಬಗ್ಗೆ ಅಳುಕಿದ್ದರೂ ಪರಿಸರಾಸಕ್ತಿ ಹಾಗೂ ಹೊಸತನದ ಮೇಲೆ ಅಪಾರ ನಂಬಿಕೆ ಇಟ್ಟವರು ಇವಿ ಕಾರಿನ ಮೊರೆ ಹೋಗುತ್ತಿದ್ದಾರೆ. ಕಾರುಗಳ ಪೈಕಿ ಟಾಟಾ ನೆಕ್ಸಾನ್ ಮತ್ತು ಮಹೀಂದ್ರಾ ಇ ವೆರಿಟೊ, ಮಹಿಂದ್ರಾ ಇ2ಒ, ಟಾಟಾ ಟಿಗೋರ್ ಕಾರುಗಳು ಮುಂಚೂಣಿಯಲ್ಲಿವೆ. ದ್ವಿಚಕ್ರ ವಾಹನ ಕ್ಷೇತ್ರದಲ್ಲಿ ಪೈಪೋಟಿ ಸಾಕಷ್ಟಿದೆ. ಹೀರೋ, ಓಲಾ, ಏಥರ್, ಸಿಂಪಲ್ ಎನರ್ಜಿ, ಪ್ಯೂರ್ ಇವಿ, ಟಿವಿಎಸ್, ಬಜಾಜ್ ಚೇತಕ್, ಒಕಿನಾವ, ಆಂಪಿಯರ್ ನಡುವೆ ಪೈಪೋಟಿ ಕಾಣಿಸಿದೆ. ಒಟ್ಟಾರೆ 115 ಕಂಪನಿಗಳಿದ್ದರೂ, ಐಸಿ ಇಂಜಿನ್ ವಾಹನದ ಮಟ್ಟಕ್ಕೆ ಕಾರ್ಯಕ್ಷಮತೆ ಇರುವ ಇವಿ ಉತ್ಪಾದಕರ ಪಟ್ಟಿಯಲ್ಲಿ 10-12 ಕಂಪನಿಗಳು ಮಾತ್ರ ಕಾಣಿಸುತ್ತಿವೆ. ಅದರಲ್ಲಿ ಓಲಾಗೆ ಪ್ರಸ್ತುತ ಒಂದು ಲಕ್ಷ ವಾಹನಕ್ಕೆ ಬೇಡಿಕೆ ಇದೆ.
