ಈ ತಂಬಾಕು ದೊಡ್ಡ ರಾಕ್ಷಸ. ತಂಬಾಕು ಉತ್ಪನ್ನದ ತ್ಯಾಜ್ಯದಲ್ಲಿ 7000ಕ್ಕೂ ಹೆಚ್ಚು ವಿಷಕಾರಿ ರಾಸಾಯನಿಕಗಳಿವೆ. ಈ ಕಾರ್ಸಿನೊಜೆನಿಕ್ ರಾಸಾಯನಿಕಗಳು ಪರಿಸರದಲ್ಲಿ ಸಂಗ್ರಹಗೊಳ್ಳುತ್ತವೆ. ಸಿಗರೇಟ್ ಬಟ್ ಮೂಲಕ ಸಂಗ್ರಹಗೊಂಡು ನೀರಿನಲ್ಲಿ ಸೇರಿದರೆ ಇವು ಜಲಚರಗಳ ಹೊಟ್ಟೆ ಸೇರಿ ಕಡೆಗೆ ನಮ್ಮ ಹೊಟ್ಟೆಗೂ ಸೇರುತ್ತವೆ. ಈ ಕುರಿತಾಗಿ ಕರ್ನಾಟಕ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿಯ ಸುತ್ತೋಲೆಯಲ್ಲೂ ಉಲ್ಲೇಖವಾಗಿದೆ. ತಂಬಾಕು ಬಳಕೆಯಿಂದ ಹೃದಯದ ಸಮಸ್ಯೆ ಜತೆಗೆ ಕ್ಯಾನ್ಸರ್ ಬಾಧಿಸುತ್ತದೆ. ಬಾಯಿ, ರಕ್ತನಾಳಕ್ಕೆ ಹಾನಿ, ಕುತ್ತಿಗೆ ಮತ್ತು ಶಿರದ ಕ್ಯಾನ್ಸರ್, ಗಂಟಲು, ಧ್ವನಿಪೆಟ್ಟಿಗೆ, ಮಿದುಳು, ಅನ್ನನಾಳ, ಶ್ವಾಸಕೋಶ, ಪಿತ್ತಕೋಶ, ಮೂತ್ರಪಿಂಡ ಮತ್ತು ಸ್ತನ ಸೇರಿ ವಿವಿಧ ಅಂಗಗಳ ಕ್ಯಾನ್ಸರ್ಗೆ ಕಾರಣವಾಗುತ್ತದೆ. ಜತೆಗೆ ಪಾರ್ಶ್ವವಾಯು, ಕುರುಡುತನ, ಹಲ್ಲು ಮತ್ತು ವಸಡು ಕಾಯಿಲೆಗಳೂ ಬಾಧಿಸುವ ಸಾಧ್ಯತೆ ಹೆಚ್ಚು. ನೇರವಾಗಿ ಕ್ಯಾನ್ಸರ್ ಬಂದು ಆರೋಗ್ಯಕ್ಕೆ ಹಾನಿ ಉಂಟಾಗದಿದ್ದರೂ ಬೇರೆ ಬೇರೆ ರೀತಿಗಳಲ್ಲಿ ತಂಬಾಕು ಮನುಷ್ಯನ ಶಾರೀರಿಕ ಹಾಗೂ ಮಾನಸಿಕ ಆರೋಗ್ಯ ಹದಗೆಡಿಸುವ ಸಾಮರ್ಥ್ಯ ಹೊಂದಿದೆ. ಇನ್ನು ತಂಬಾಕು ಬಿಡಬೇಕು ಎನಿಸಿ ಬಿಡಲು ಪ್ರಯತ್ನಿಸಿ ಸೋಲುವುದರಿಂದ ನಿರಂತರ ಪಾಪಪ್ರಜ್ಞೆ, ಖಿನ್ನತೆ ಮುಂತಾದ ಮಾನಸಿಕ ತೊಂದರೆಗಳು ಕಾಡುತ್ತವೆ.
