ಲೌಕಿಕ ಬದುಕಿನ ಆಕರ್ಷಣೆ ಹೆಚ್ಚಿ, ಅದರ ಅಂಧಾನುಕರಣೆಯಲ್ಲಿ ಧಾವಿಸುತ್ತ ಮನಸ್ಸಿನ, ಬದುಕಿನ ನೆಮ್ಮದಿ ಕಳೆದುಕೊಂಡ ಸಮಾಜಕ್ಕೆ ಭಕ್ತಿ-ಅಧ್ಯಾತ್ಮದ ಸಂಜೀವಿನಿ ಒದಗಿಸಿದವರು ಮಹಾನ್ ಸಂತ ಭಗವಾನ್ ಶ್ರೀ ಶ್ರೀಧರ ಸ್ವಾಮಿಗಳು. ಅಧ್ಯಾತ್ಮವನ್ನು ಸರಳಗೊಳಿಸಿ, ಜನರ ಹೃದಯಮಂದಿರದಲ್ಲಿ ಸದ್ಗುಣ, ಸಾತ್ವಿಕತೆ, ನೈತಿಕತೆಯನ್ನು ಪ್ರತಿಷ್ಠಾಪಿಸಿದರು. ಧರ್ಮದ ಬೆಳಕಿನಿಂದಲೇ ಅಜ್ಞಾನದ ಕತ್ತಲೆಯನ್ನು ಕಳೆದರು. ಮನುಷ್ಯ ಜನ್ಮ ಏತಕ್ಕಾಗಿ ಆಗಿದೆ, ಬದುಕಿನ ನಿಜವಾದ ಉದ್ದೇಶವೇನು, ಸಾಗಬೇಕಾದ ಮಾರ್ಗ ಯಾವುದು, ಜೀವನದ ಸಾರ್ಥಕತೆ ಹೇಗೆ, ಮೋಕ್ಷ ಎಂದರೆ ಏನು... ಎಂಬುದನ್ನೆಲ್ಲ ಅತ್ಯಂತ ಸ್ಪಷ್ಟ, ನಿಖರವಾಗಿ ತಿಳಿಸಿಕೊಟ್ಟರು. ಆ ವಿಚಾರಗಳ ಶಕ್ತಿಯಿಂದಲೇ ಅಸಂಖ್ಯ ಮನಸ್ಸುಗಳ ಕಲ್ಮಶವನ್ನು ಕಳೆದರು. ಅಷ್ಟೇ ಅಲ್ಲ, ನೈಜ ಆನಂದತತ್ತ್ವದ ದರ್ಶನ ಮಾಡಿಸಿ ಅನಂತ ಶಕ್ತಿಯ ಪರಿಚಯ ಮಾಡಿಸಿದರು. ಅವರ ವಾಣಿ ಕೇಳಿದವರ, ದರ್ಶನ ಪಡೆದುಕೊಂಡವರ, ಅಷ್ಟೇ ಏಕೆ ಭಕ್ತಿಯಿಂದ ನಾಮಸ್ಮರಣೆ ಮಾಡಿದವರ ಬದುಕೇ ಬದಲಾಯಿತು. ನಡೆದಾಡುವ ದೇವರಾದರೂ ಮಾನವೀಯತೆಯ ಸೇವೆಯಲ್ಲೇ ಸಾರ್ಥಕತೆ ಕಂಡರು.
