ಗಣೇಶರ ಪಾಂಡಿತ್ಯದ ಕುರಿತಂತೆ ಭೈರಪ್ಪನವರ ಮಾತುಗಳನ್ನು ಉಲ್ಲೇಖಿಸುವುದೇ ಸೂಕ್ತ. ‘ಗಣೇಶರು ಉನ್ನತ ಮಟ್ಟದಲ್ಲಿ ತಂತ್ರಜ್ಞಾನ-ವಿಜ್ಞಾನವನ್ನು ಓದಿದವರು; ಸಂಸ್ಕೃತಭಾಷೆ, ವ್ಯಾಕರಣ, ಸಾಹಿತ್ಯಗಳನ್ನು ಅರೆದುಕುಡಿದವರು; ಹಾಗೆಯೇ ಭಾರತೀಯ ದರ್ಶನಶಾಸ್ತ್ರಗಳ ಎಲ್ಲ ಶಾಖೆಗಳನ್ನೂ ಸಾಕಷ್ಟು ಮಟ್ಟಿಗೆ ಅಧ್ಯಯನ ಮಾಡಿದವರು; ಹಳಗನ್ನಡ, ನಡುಗನ್ನಡ, ಸಮಕಾಲೀನ ಕನ್ನಡಸಾಹಿತ್ಯವನ್ನೂ ಅಭ್ಯಾಸ ಮಾಡಿರುವವರು; ವಿಶೇಷವಾಗಿ ಕರ್ನಾಟಕ ಸಂಗೀತದಲ್ಲಿ ಸ್ವತಃ ಕೀರ್ತನೆಗಳನ್ನು ರಚಿಸುವ ಮಟ್ಟಿಗೆ ಅಭ್ಯಾಸ ಮಾಡಿರುವವರು; ಭಾರತೀಯ ನರ್ತನಶಾಸ್ತ್ರವನ್ನು ತಿಳಿದವರು; ಭಾರತೀಯ ಶಿಲ್ಪ-ದೇವಾಲಯ ನಿರ್ವಣದ ಶಾಸ್ತ್ರಗಳಲ್ಲಿ ಪ್ರವೇಶ ಉಳ್ಳವರು; ಸೋದರ ತಮಿಳು, ತೆಲುಗು ಭಾಷೆಗಳ ಸಾಹಿತ್ಯವನ್ನು ಓದಿದವರು; ಇಂಗ್ಲಿಷ್ ಸಾಹಿತ್ಯವನ್ನೂ ಪರಿಶೀಲಿಸಿರುವವರು; ಕನ್ನಡ, ಸಂಸ್ಕೃತ, ತೆಲುಗುಗಳಲ್ಲಿ ಅವಧಾನ ಮಾಡಿರುವ ಅಸಾಧಾರಣ ಸ್ಮೃತಿಶಕ್ತಿ ಮತ್ತು ಕಲ್ಪನಾಶೀಲತೆಯನ್ನು ಗಳಿಸಿಕೊಂಡಿರುವವರು; ಇಷ್ಟೆಲ್ಲ ಇದ್ದೂ ಕೇವಲ ಭೂತಕಾಲದತ್ತ ನೋಡದೆ ಸಮಕಾಲೀನ ಕಲಾಪ್ರಕಾರಗಳಲ್ಲಿ ಆಸಕ್ತಿಯಿರುವವರು. ಅವರು ಸಿನಿಮಾಗಳನ್ನು ನೋಡುತ್ತಾರೆ. ಗಣೇಶರು ಏನು ಬರೆದರೂ ವ್ಯಾಪಕ ಸಂಶೋಧನೆ ಮತ್ತು ವಿಪುಲ ಸಾಮಗ್ರಿಯ ಆಧಾರವಿಲ್ಲದೆ ಬರೆಯುವುದಿಲ್ಲ. ಅವರದು ರಸಪೂರ್ಣ ವಿದ್ವತ್ತು’. ಇಷ್ಟಾದರೂ ಭೈರಪ್ಪನವರ ಕಣ್ಣಿಗೆ ಕಾಣದೇ ಅಥವಾ ಅವರ ಪದಗಳಿಗೆ ನಿಲುಕದೇ ನುಸುಳಿಹೋಗಿರುವ ಅನೇಕ ಸಂಗತಿಗಳು ಗಣೇಶರ ಬದುಕಿನಲ್ಲಿ ಇಲ್ಲ ಎನ್ನಲಾಗದು. ಈ ಕೃತಿ ಓದುವಾಗಲೇ ನನಗೂ ಅಚ್ಚರಿ ಎನಿಸಿದ್ದೇನೆಂದರೆ ಮನೆಯವರ ಒತ್ತಾಯಕ್ಕೆ ಮಣಿದು ಶತಾವಧಾನಿಗಳು ವೈದ್ಯಕೀಯ ವಿಭಾಗದ ಅಧ್ಯಯನಕ್ಕೆ ಮನಸ್ಸು ಮಾಡಿದ್ದರಂತೆ. ಅವರ ಬುದ್ಧಿವಂತಿಕೆಗೆ ಮಣಿಪಾಲದ ಮೆಡಿಕಲ್ ಕಾಲೇಜಿನಲ್ಲಿ ಸೀಟೂ ದಕ್ಕಿತ್ತು. ಅದು ದುಬಾರಿ ಎನ್ನುವ ಕಾರಣಕ್ಕೆ ಅದನ್ನು ಬಿಟ್ಟು ಇಂಜಿನಿಯರಿಂಗ್ ಆರಿಸಿಕೊಂಡರಂತೆ. ಮತ್ತೊಂದು ಅಚ್ಚರಿ ಏನು ಗೊತ್ತೇ? ಇಂಜಿನಿಯರಿಂಗ್ ಫಲಿತಾಂಶ ಬರುವ ಹೊತ್ತಲ್ಲೇ ಐಎಎಸ್ಗೂ ಹಾಜರಾಗಿ ಪ್ರಿಲಿಮ್್ಸ ಅನ್ನೂ ಮುಗಿಸಿಕೊಂಡಿದ್ದರಂತೆ ಅವರು. ತಾವು ಓದಿದ ಯುವಿಸಿಇ ಕಾಲೇಜಿನಲ್ಲೇ ಕೆಲಸ ಸಿಕ್ಕಿದ್ದರಿಂದ ಅವರು ಅಧಿಕಾರಿಯಾಗುವ ಅವಕಾಶ ತಪ್ಪಿತು, ನಮ್ಮೆಲ್ಲರಿಗೂ ಲಾಭವಾಯ್ತು. ಗಣೇಶರಿಗೆ ಗ್ರೀಕ್, ಲ್ಯಾಟಿನ್, ಇಟಾಲಿಯನ್ ಸೇರಿದಂತೆ 18 ಭಾಷೆಗಳ ಪರಿಚಯವಿದೆ ಮತ್ತು ಅವುಗಳಲ್ಲಿ 8 ಭಾಷೆಗಳ ಮೇಲೆ ಎಷ್ಟರಮಟ್ಟಿಗೆ ಹಿಡಿತವಿದೆ ಎಂದರೆ ಕವನಗಳನ್ನೂ ರಚಿಸಬಲ್ಲಷ್ಟು. ಅವರು ಗ್ರೀಕ್ ಕಲಿತ ವಿಧಾನವನ್ನು ಶಶಿಕಿರಣ್ ತಮಾಷೆಯಾಗಿ ಹಿಡಿದುಕೊಟ್ಟಿದ್ದಾರೆ. ಗ್ರೀಕ್ ನಾಗರಿಕತೆಯನ್ನು ಸಮಗ್ರವಾಗಿ ಅರಿಯಲೆಂದು ಅಲ್ಲಿನ ಮಹಾಕಾವ್ಯಗಳನ್ನು ಮೂಲಭಾಷೆಯಲ್ಲಿಯೇ ಅಧ್ಯಯನ ಮಾಡುವ ಮನಸ್ಸು ಇವರಿಗಾಯ್ತು. ಸರಿಯಾದ ಮಾರ್ಗ ತಿಳಿಯದೇ ಅಂದಿನ ದಿನಗಳ ಏರ್ವೆುೕಲ್ ಆವೃತ್ತಿಯ ಪತ್ರವೊಂದರಲ್ಲಿ, To any Professor of Greek, USA ಎಂದು ಬರೆದು ಅಂಚೆಗೆ ಹಾಕಿದರಂತೆ. ಈ ಕಾಗದ ಟೆಕ್ಸಾಸ್ ವಿಶ್ವವಿದ್ಯಾಲಯದ ಪೊ›ಫೆಸರ್ ಕೈ ಸೇರಿ ಅವರು ಅನೇಕ ಪುಸ್ತಕಗಳನ್ನು ಕಳಿಸಿಕೊಟ್ಟರಂತೆ.
