ಬಾಲ್ಯದಲ್ಲಿ ಸೋಮಾರಿ ಎನಿಸಿಕೊಂಡು, ವೈದ್ಯಕೀಯ ಶಿಕ್ಷಣವನ್ನು ಅರ್ಧಕ್ಕೇ ಕೈಬಿಟ್ಟು, ತನ್ನ ಆಸಕ್ತಿಯ ಕ್ಷೇತ್ರದ ಮೇಲೆ ಏಕಾಗ್ರಗೊಳಿಸಿಕೊಂಡು ವೈಜ್ಞಾನಿಕ ಸಾಧನೆಗೈದ ಡಾರ್ವಿನ್ ಜೀವನವೇ ಒಂದು ಸಂದೇಶವಾಗಿದೆ. ಮಕ್ಕಳ ಆಸಕ್ತಿಗೆ ನೀರೆರೆಯಬೇಕು, ಒತ್ತಾಯಪೂರ್ವಕವಾಗಿ ಯಾವುದನ್ನೂ ಹೇರಬಾರದು ಎಂಬ ಮನೋವಿಜ್ಞಾನದ ನೆಲೆಗಟ್ಟಿಗೆ ಪಾಲಕರು ಇಂಬು ತುಂಬಬೇಕಾದ ಹಾಗೂ ಮಕ್ಕಳು ಆಸಕ್ತಿಯ ಕ್ಷೇತ್ರವನ್ನು ಆಯ್ದುಕೊಳ್ಳಬೇಕಾದ ಪ್ರಸ್ತುತತೆಗೆ ಡಾರ್ವಿನ್ರ ಎಲ್ಲಾ ಸಾಧನೆಗಳನ್ನು ಮಾದರಿಯಾಗಿ ತೆಗೆದುಕೊಳ್ಳಬಹುದು. 1809 ರ ಫೆಬ್ರವರಿ 12 ರಂದು ಇಂಗ್ಲೆಂಡಿನ ಶ್ರೌಸ್ಬರಿಯಲ್ಲಿ ಜನಿಸಿದ ಚಾರ್ಲ್ಸ್ ರಾಬರ್ಟ್ ಡಾರ್ವಿನ್ ಬಾಲ್ಯದಿಂದಲೂ ಪ್ರಕೃತಿಪ್ರೇಮಿ. ಸಸ್ಯ, ಕಲ್ಲು, ಮಣ್ಣು, ಖನಿಜ, ಕೀಟ, ಮರದ ರೆಂಬೆ ಕೊಂಬೆಗಳನ್ನು ಮನೆಯೊಳಗೆ ತಂದು ಹಾಕಿಕೊಂಡು ಅವುಗಳ ಬಗೆಗೆ ತಿಳಿದುಕೊಳ್ಳುವುದರಲ್ಲಿ ಉತ್ಸುಕ. ಈ ವಿಶೇಷ ಆಸಕ್ತಿಯೇ ಮುಂದೆ ‘ಡಾರ್ವಿನ್ನ ವಿಕಾಸವಾದ’ ಎಂಬ ಹೆಗ್ಗುರುತಿನಲ್ಲಿ ಜಗತ್ತಿಗೆ ಪರಿಚಿತವಾಗುವಂತೆ ಮಾಡಿತು. ಡಾರ್ವಿನ್ 1882 ರ ಎಪ್ರಿಲ್ 19 ರಂದು ಕೊನೆಯುಸಿರೆಳೆದರು.
