ಯಾವ ಪಾಲಕರು ಮಕ್ಕಳ ಕೈಗೆ ಮೊಬೈಲ್ ನೀಡಲು ಹಿಂದೆ ಮುಂದೆ ನೋಡುತ್ತಿದ್ದರೋ ಅದೇ ಪಾಲಕರು ಮಗುವಿನ ಕೈಗೆ ಮೊಬೈಲ್ ಕೊಟ್ಟು ‘ತರಗತಿ ಆರಂಭವಾಗಿದೆ. ಕುಳಿತುಕೋ’ ಅಂತ ಒತ್ತಾಯಪೂರ್ವಕವಾಗಿ ತುರುಕಿಸೋ ಕಾಲ ಬಂದಿದೆ. ಇಲ್ಲೊಂದು ಸಮಸ್ಯೆ, ಅದು ತುಂಬ ಪಾಲಕರು ಅನುಭವಿಸುತ್ತಿರುವಂಥದ್ದು. ಮಕ್ಕಳ ಕೈಗೆ ಮೊಬೈಲ್ ಕೊಟ್ಟು ಹಾಗೇ ಎದ್ದು ಹೋಗುವ ಹಾಗಿಲ್ಲ. ಪಾಲಕರು ಪಕ್ಕದಲ್ಲೇ ಕುಳಿತುಕೊಳ್ಳಬೇಕು. ನಾಲ್ಕೈದು ಗಂಟೆ ಅವರ ಜೊತೆ ಕೂತಾಗ ಇಲ್ಲಿ ಮನೆಯ ಕೆಲಸವೂ ಆಗಲ್ಲ. ಸಮಯಕ್ಕೆ ಸರಿಯಾಗಿ ಊಟ, ತಿಂಡಿಯೂ ಆಗುವುದಿಲ್ಲ. ಯಾರದ್ದಾದರೂ ತುರ್ತು ಕರೆ ಬಂದರೂ ತರಗತಿ ಮುಗಿಯುವವರೆಗೆ ಸ್ವೀಕರಿಸುವ ಹಾಗಿಲ್ಲ. ಇತ್ತೀಚೆಗೆ ಸಂಬಂಧಿಕರೊಬ್ಬರು ನಿಧನರಾದ ಸುದ್ದಿ ಮಗುವಿನ ತರಗತಿಯಾದ ನಂತರ ತಿಳಿಯಿತು ಎಂದು ಒಬ್ಬರು ಪಾಲಕರು ಕಣ್ಣೀರು ಸುರಿಸಿದರು. ಇದು ಪಾಲಕರ ಸಮಸ್ಯೆಯಾದರೆ ಮಕ್ಕಳಿಗೂ ಈ ಥರದ ತರಗತಿಗಳು ಇಷ್ಟವಾಗುತ್ತಿಲ್ಲ. ಶಿಕ್ಷಕರು ಬೋರ್ಡ್ ಮೇಲೆ ಬರೆದು, ಸಣ್ಣ ಮಕ್ಕಳಾದರೆ ಕೈಹಿಡಿದು ಬರೆಸಿದಾಗ ಸಿಗುವ ಪರಿಣಾಮ ಆನ್ಲೈನ್ ಶಿಕ್ಷಣದಿಂದ ದೊರೆಯಲು ಸಾಧ್ಯವೇ? ಪುಟ್ಟ ಮಕ್ಕಳಿಗೆ ಕಲಿಸುವ ಶಿಕ್ಷಕರು ಅವರ ಮನದಂಗಳದಲ್ಲಿ ನಲಿದು, ಅವರಿಗೆ ಒಪು್ಪವಂತೆ ಹಾವಭಾವದಿ ಕಥೆ, ಕವಿತೆಗಳನ್ನು ಹೇಳಿ ಮಗು ಬಿದ್ದಾಗ ಎಬ್ಬಿಸಿ, ಮುದ್ದಿಸುತ್ತಾರೆ. ಮಕ್ಕಳಿಗೆ ಇಂಥ ಮಾತೃಪ್ರೀತಿಯನ್ನು ನೀಡಲು ಮೊಬೈಲ್ನಿಂದ ಸಾಧ್ಯವೇ? ಅದೇನಿದ್ದರೂ ಯಾಂತೀಕೃತವಾಗುತ್ತಿದೆಯೇ ಹೊರತು ಶಿಕ್ಷಕರು ಮತ್ತು ಮಕ್ಕಳ ನಡುವಿನ ಪ್ರೀತಿಯ ಒಸರು ಇಲ್ಲದೆ, ಬೆಸುಗೆಯಿಲ್ಲದೆ ದೊಡ್ಡ ಅಂತರ ಏರ್ಪಡುತ್ತಿದೆ ಎಂದರೆ ತಪ್ಪಾಗಲಾರದು.
