ಮದ್ಯಪಾನದ ಹ್ಯಾಂಗ್ ಓವರ್ ಕಡಿಮೆ ಮಾಡಲು ಮತ್ತು ಮದ್ಯಪಾನದ ಅಡ್ಡ ಪರಿಣಾಮಗಳನ್ನು ತಕ್ಕಮಟ್ಟಿಗೆ ಕಡಿಮೆ ಮಾಡುವಲ್ಲಿ ಕೂಡ ಒಣದ್ರಾಕ್ಷಿ ಅದ್ಬುತವಾಗಿ ಕೆಲಸ ಮಾಡುತ್ತದೆ. ಹಾಗಾಗಿ ಮದ್ಯಪಾನ ಮಾಡುವ ಅಭ್ಯಾಸ ಇರುವವರು ಒಣ ದ್ರಾಕ್ಷಿಯನ್ನು ನಿತ್ಯವೂ ಸೇವಿಸುವ ರೂಢಿ ಇಟ್ಟುಕೊಳ್ಳುವುದು ಒಳ್ಳೆಯದು. ಪಿತ್ತ ದೋಷದ ಕಾರಣದಿಂದ ಉಂಟಾದ ಜ್ವರ, ಅತಿಯಾದ ಬಾಯಾರಿಕೆ, ಉರಿ, ನಿದ್ರಾಹೀನತೆಯಂತಹ ತೊಂದರೆಗಳಲ್ಲಿ ಒಣದ್ರಾಕ್ಷಿ ಮೊದಲನೇ ಸಾಲಿನಲ್ಲಿ ನಿಲ್ಲುವ ಔಷಧ. ಶ್ವಾಸಕೋಶಗಳಿಗೆ ಶಕ್ತಿ ನೀಡಿ ಚಿಕ್ಕಪುಟ್ಟ ಕಾರಣಗಳಿಗೆ ಉಂಟಾಗುವ ಕೆಮ್ಮು, ದಮ್ಮು, ಸುಸ್ತುಗಳನ್ನು ಇದು ತಡೆಯುತ್ತದೆ. ಹಾಗಾಗಿ ಅಲರ್ಜಿ, ಅಸ್ತಮಾದಂತಹ ತೊಂದರೆಗಳನ್ನು ಅನುಭವಿಸುತ್ತಿರುವವರು ಮತ್ತು ನ್ಯೂಮೋನಿಯಾ, ಟಿಬಿ ಮುಂತಾದ ಕಾಯಿಲೆಗಳಿಂದ ಚೇತರಿಸಿಕೊಂಡವರು ಇದನ್ನು ನಿತ್ಯವೂ ಮೇಲೆ ಹೇಳಿದಂತೆ ಸೇವಿಸಿದರೆ ಶ್ವಾಸಕೋಶದ ಶಕ್ತಿ ಹೆಚ್ಚಾಗುತ್ತಾ ಹೋಗುತ್ತದೆ. ಅಪೌಷ್ಟಿಕತೆ ಅಥವಾ ಕಾಯಿಲೆಗಳ ಕಾರಣದಿಂದ ತೂಕವನ್ನು ಕಳೆದುಕೊಂಡವರಿಗೆ ಒಣದ್ರಾಕ್ಷಿ ವರದಾನ. ಏಕೆಂದರೆ ನಿರಂತರವಾಗಿ ಇದನ್ನು ಸೇವಿಸುವುದರಿಂದ ಧಾತುಗಳಿಗೆ ಪುಷ್ಟಿ ನೀಡಿ ದೇಹದ ತೂಕ ಹೆಚ್ಚಾಗಲು ಸಹಾಯ ಮಾಡುತ್ತದೆ. ಹಾಗೆಂದು ಅತಿ ತೂಕ ಇರುವವರು ಕೂಡ ಒಣ ದ್ರಾಕ್ಷಿಯನ್ನು ಸೇವಿಸಬಹುದು. ಮಾನಸಿಕ ಶಕ್ತಿ ಮತ್ತು ಲೈಂಗಿಕ ಶಕ್ತಿಗಳನ್ನು ಹೆಚ್ಚಿಸಲು ಇದು ಸಹಕಾರಿ. ಹೃದ್ರೋಗಿಗಳು ಇದನ್ನು ಹೆಚ್ಚಾಗಿ ಬಳಸಬೇಕು. ಮೂತ್ರದೋಷವನ್ನು ಕಡಿಮೆ ಮಾಡುವಲ್ಲಿಯೂ ಇದು ಸಹಾಯ ಮಾಡುತ್ತದೆ.
