ಯಾರನ್ನ ಕೇಳಿ ಸಿನ್ಮಾ ಮಾಡಿದ್ರಿ? ವರ್ಮಾಗೆ ಅಮೃತಾ ಪ್ರಶ್ನೆ ...

ಆ ಕಡೆ ನಿರ್ದೇಶಕ ರಾಮ್​ಗೋಪಾಲ್​ ವರ್ಮಾ ಅವರು ತಮ್ಮ ಹೊಸ ಚಿತ್ರ 'ಮರ್ಡರ್​' ಬಿಡುಗಡೆ ಮಾಡುವುದಕ್ಕೆ ತುದಿಗಾಲಲ್ಲಿ ನಿಂತಿದ್ದರೆ, ಇನ್ನೊಂದು ಕಡೆ ಆ ಚಿತ್ರದ ಬಿಡುಗಡೆಗೆ ತಡೆಯಾಜ್ನೆ ಕೊಡಬೇಕು ಎಂದು ಅಮೃತಾ ಕೋರ್ಟ್​ ಮೆಟ್ಟಿಲೇರಿದ್ದಾರೆ.

ಇಷ್ಟಕ್ಕೂ ಅಮೃತಾಗೂ ಈ ಚಿತ್ರಕ್ಕೂ ಏನು ಸಂಬಂಧ ಎಂಬ ಪ್ರಶ್ನೆ ಸಹಜವಾಗಿ ಬರಬಹುದು. ವಿಷಯವೇನೆಂದರೆ, ಅಮೃತಾ ಅವರ ಜೀವನದಲ್ಲಾದ ನೈಜ ಘಟನೆಯನ್ನಾಧರಿಸಿಯೇ ರಾಮ್​ಗೋಪಾಲ್ ವರ್ಮಾ, 'ಮರ್ಡರ್​' ಎಂಬ ಚಿತ್ರವನ್ನು ನಿರ್ದೇಶಿಸಿರುವುದು.

ಇದನ್ನೂ ಓದಿ: ದೊಡ್ಮನೆಯಲ್ಲಿ ಹುಟ್ಟಿದ ಮಾತ್ರಕ್ಕೆ ಯಶಸ್ವಿಯಾಗೋಕೆ ಆಗಲ್ಲ …

ಅಮೃತಾ ಮತ್ತು ಪ್ರಣಯ್​ ಕೆಲವು ವರ್ಷಗಳ ಹಿಂದೆ ಮನೆಯವರ ಆಸೆಯ ವಿರುದ್ಧವಾಗಿ ಮದುವೆಯಾಗಿದ್ದರು. ಇದೇ ವಿಷಯವಾಗಿ ಎರಡೂ ಕುಟುಂಬದವರು ಸಿಟ್ಟಾಗಿದ್ದು, ಅಮೃತಾ ಮನೆಯವರು ಎರಡು ವರ್ಷಗಳ ಹಿಂದೆ ಪ್ರಣಯ್​ನನ್ನು ಕೊಂದಿದ್ದರು. ಈ ವರ್ಷ ಅಮೃತಾ ಅವರ ತಂದೆ ಮಾರುತಿ ರಾವ್​ ಸಹ ನಿಧನರಾಗಿದ್ದರು.

ಈ ಘಟನೆಯನ್ನೇ ಬೇಸ್​ ಮಾಡಿ, 'ಮರ್ಡರ್​' ಚಿತ್ರ ಮಾಡುತ್ತಿರುವುದಾಗಿ ವರ್ಮಾ ಘೋಷಿಸಿದ್ದರು. ಆದರೆ, ತಮ್ಮ ಅನುಮತಿಯನ್ನೇ ಪಡೆಯದೇ ತಮ್ಮ ಜೀವನವನ್ನಾಧರಿಸಿ ಚಿತ್ರ ಮಾಡುವುದಕ್ಕೆ ಹೇಗೆ ಸಾಧ್ಯ ಎಂದು ಅಮೃತಾ, ನಲಗೊಂಡಾ ನ್ಯಾಯಾಲಯದ ಮೆಟ್ಟಿಲೇರಿದ್ದಾರೆ.

ಇದನ್ನೂ ಓದಿ: 10 ರೂಪಾಯಿ ಇಟ್ಕೊಂಡು ರೈಲಲ್ಲಿ ಬರದೇ ಇರಬಹುದು …

ಈ ಕುರಿತು ಮಾತನಾಡಿರುವ ಅಮೃತಾ, 'ಕಳೆದ ಕೆಲವು ವರ್ಷಗಳಿಂದ ಮಾನಸಿಕ ಹಿಂಸೆ ಅನುಭವಿಸುತ್ತಿದ್ದೇನೆ. ನನ್ನ ಗಂಡನ ಮರ್ಡರ್​ ಆಗಿದೆ. ನನ್ನ ತಂದೆ ಸಹ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಈ ದುಃಖದಲ್ಲಿರುವಾಗ ವರ್ಮಾ, ನಮ್ಮ ಜೀವನದಲ್ಲಾದ ಘಟನೆ ಇಟ್ಟುಕೊಂಡು ಚಿತ್ರ ಮಾಡುತ್ತಿದ್ದಾರೆ. ಅವರಿಗೆ ಅನುಮತಿ ಕೊಟ್ಟಿದ್ದು ಯಾರು? ಹಾಗಾಗಿ ಅವರ ವಿರುದ್ಧ ದಾವೆ ಹೂಡಿದ್ದೇನೆ' ಎಂದು ಅಮೃತಾ ಹೇಳಿದ್ದಾರೆ.

ಈ ವಿಷಯವಾಗಿ ನ್ಯಾಯಾಲಯವು ವರ್ಮಾ ಮತ್ತು ತಂಡದವರಿಗೆ ಆಗಸ್ಟ್​ ಆರರಂದು ಹಾಜರಾಗುವಂತೆ ಸಮನ್ಸ್​ ನೀಡಿದೆ. ನಾಳೆ ವರ್ಮಾ ಕೋರ್ಟ್​ಗೆ ಹಾಜರಾಗಬೇಕಿದ್ದು, ಈ ಪ್ರಕರಣ ಯಾವ ತಿರುವು ಪಡೆಯುತ್ತದೆ ಎಂಬ ಕುತೂಹಲ ಎಲ್ಲರಿಗೂ ಇದೆ.

https://www.vijayavani.net/avatar-purusha-team-release-ashika-birthday-teaser/