ಧರ್ಮಶಾಲಾ: 17ನೇ ಆವೃತ್ತಿಯ ಐಪಿಎಲ್ ಪ್ರಾರಂಭಗೊಂಡು ಈಗಾಗಲೇ 50ಕ್ಕೂ ಹೆಚ್ಚು ಪಂದ್ಯಗಳು ಮುಕ್ತಾಯಗೊಂಡಿದ್ದು, ಪ್ರತಿ ಬಾರಿಯಂತೆ ಈ ಬಾರಿಯೂ ಟೂರ್ನಿ ಹಲವು ಸ್ವಾರಸ್ಯಕರ ಘಟನೆಗಳಿಗೆ ಸಾಕ್ಷಿಯಾಗುತ್ತಿದ್ದು, ಇದೀಗ ಅದೇ ರೀತಿಯ ಘಟನೆಯೊಂದು ಮತ್ತೊಮ್ಮೆ ನಡೆದಿದ್ದು, ಪರ-ವಿರೋಧದ ಚರ್ಚೆಗೆ ಆಸ್ಪದ ಮಾಡಿಕೊಟ್ಟಿದೆ.
ಭಾನುವಾರ (ಮೇ 05) ಧರ್ಮಶಾಲಾದಲ್ಲಿರುವ ಹಿಮಾಚಲಪ್ರದೇಶ ಕ್ರಿಕೆಟ್ ಅಸೋಸಿಯೇಷನ್ ಕ್ರೀಡಾಂಗಣದಲ್ಲಿ ನಡೆದ ಚೆನ್ನೈ ಹಾಗೂ ಪಂಜಾಬ್ ಕಿಂಗ್ಸ್ ನಡುವಿನ ಪಂದ್ಯದಲ್ಲಿ ಈ ಘಟನೆ ನಡೆದಿದ್ದು, ಹಲವರ ಕೆಂಗಣ್ಣಿಗೆ ಗುರಿಯಾಗಿದೆ. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ವ್ಯಾಪಕ ಆಕ್ರೋಶ ವ್ಯಕ್ತವಾಗುತ್ತಿದೆ.
ಇದನ್ನೂ ಓದಿ: ಮುಸ್ಲಿಮರಿಗೆ ಸಂಪೂರ್ಣ ಮೀಸಲಾತಿ ಸಿಗಬೇಕು ಎಂದ ಲಾಲು ಪ್ರಸಾದ್; ಪ್ರಧಾನಿ ಮೋದಿ ಸೇರಿದಂತೆ ಹಲವರಿಂದ ಖಂಡನೆ
ವೈರಲ್ ಆಗಿರುವ ವಿಡಿಯೋ ನೋಡುವುದಾದರೆ, ಚೆನ್ನೈ ಸೂಪರ್ಕಿಂಗ್ಸ್ ತಂಡದ ಆಟಗಾರ ಡೇರಿಲ್ ಮಿಚೆಲ್, ಮೈದಾನದಲ್ಲಿ ಬ್ಯಾಟಿಂಗ್ ಅಭ್ಯಾಸ ಮಾಡುತ್ತಿರುವ ವೇಳೆ ಸ್ಟ್ಯಾಂಡ್ನತ್ತ ಬ್ಯಾಟ್ ಬೀಸುತ್ತಾರೆ. ಈ ವೇಳೆ ವೇಗವಾಗಿ ಬಂದ ಚೆಂಡು ಅಭಿಮಾನಿಯ ಮುಖಕ್ಕೆ ತಾಗಿ ಬಳಿಕ ವಿಡಿಯೋ ಮಾಡುತ್ತಿದ್ದವರ ಐಫೋನ್ಗೆ ಬೀಳುತ್ತದೆ. ಕೂಡಲೇ ಮಿಚೆಲ್ ಕ್ಷಮೆಯಾಚಿಸುತ್ತರಾದರೂ ಹಲವರು ಇವರ ನಡೆಗೆ ಕಿಡಿಕಾರಿದ್ದಾರೆ.
ಬಾಲ್ ಬಿದ್ದ ರಭಸಕ್ಕೆ ವಿಡಿಯೋ ಮಾಡುತ್ತಿದ್ದ ವ್ಯಕ್ತಿಯ ಐಫೋನ್ ಸಂಫೂರ್ಣವಾಗಿ ಹಾಳಾಗಿದ್ದು, ಇದಕ್ಕೆ ಪ್ರತಿಯಾಗಿ ಮಿಚೆಲ್ ಚೆನ್ನೈ ಸೂಪರ್ಕಿಂಗ್ಸ್ ಜೆರ್ಸಿ ಹಾಗೂ ಬ್ಯಾಟಿಂಗ್ ಗ್ಲೌಸ್ಅನ್ನು ಉಡುಗೊರೆಯಾಗಿ ನೀಡಿದ್ದಾರೆ. ಆದರೆ, ಏಟು ಬಿದ್ದ ವ್ಯಕ್ತಿಯ ಆರೋಗ್ಯ ಮಾತ್ರ ವಿಚಾರಿಸಲು ಮುಂದಾಗುವುದಿಲ್ಲ. ಈ ವಿಚಾರ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಚರ್ಚೆಗೆ ಆಸ್ಪದ ಮಾಡಿಕೊಟ್ಟಿದ್ದು, ಐಫೋನ್ ರಿಪೇರಿ ಮಾಡಿಸುವ ಬದಲು ಗ್ಲೌಸ್ ಯಾಕೆ ಕೊಟ್ಟಿದ್ದೀರಾ. ಐಫೋನ್ ಬೆಲೆಗೂ ಗ್ಲೌಸ್ ಸರಿ ಹೊಂದುವುದಿಲ್ಲ ಎಂದು ಹಲವರು ಕಮೆಂಟ್ ಮಾಡಿದ್ದಾರೆ.