ನ್ಯೂಯಾರ್ಕ್: ಅಂಗವಿಕಲತೆಯು ಸಾಧನೆಯ ಹಾದಿಯಲ್ಲಿ ಅಡಚಣೆಯಾಗುವುದಿಲ್ಲ ಎಂದು ಇತ್ತೀಚೆಗಷ್ಟೇ ನಡೆದ ಟೋಕಿಯೋ ಪ್ಯಾರಾಲಿಂಪಿಕ್ಸ್ ಕ್ರೀಡಾಪಟುಗಳು ಸಾಬೀತುಪಡಿಸಿದ್ದಾರೆ. ಇದೀಗ ಮತ್ತೊಬ್ಬ ಪ್ಯಾರಾ ಅಥ್ಲೀಟ್, ಕೈಗಳ ಮೇಲೆ 20 ಮೀಟರ್ ನಡಿಗೆ ಮಾಡಿ ಗಿನ್ನೆಸ್ ದಾಖಲೆ ರಚಿಸಿದ್ದಾನೆ.
23 ವರ್ಷ ವಯಸ್ಸಿನ ವಿಶೇಷ ಚೇತನ ಜಿಯಾನ್ ಕ್ಲಾರ್ಕ್ 20 ಮೀಟರ್ಗಳ ದೂರವನ್ನು 4.78 ಸೆಕೆಂಡುಗಳಲ್ಲಿ ತನ್ನ ಕೈಗಳ ಮೇಲೆ ನಡೆದು ಫಾಸ್ಟೆಸ್ಟ್ 20 ಮೀಟರ್ ಆನ್ ಹ್ಯಾಂಡ್ಸ್ನ ವಿಶ್ವ ದಾಖಲೆ ಮಾಡಿದ್ದಾನೆ. ಅಮೇರಿಕದ ಅಥ್ಲೀಟ್ ಆಗಿರುವ ಕ್ಲಾರ್ಕ್, ಬೆನ್ನುಮೂಳೆಯ ಅಪರೂಪದ ಸಮಸ್ಯೆಯಿಂದಾಗಿ ಕಾಲುಗಳಿಲ್ಲದೆ ಜನಿಸಿದ್ದರು ಎನ್ನಲಾಗಿದೆ.
ಉದ್ಯಮಿ, ನಟ, ಲೇಖಕ ಹಾಗೂ ಮೋಟಿವೇಷನಲ್ ಸ್ಪೀಕರ್ ಕೂಡ ಆಗಿರುವ ಜಿಯಾನ್ ಕ್ಲಾರ್ಕ್, 2021 ರ ಫೆಬ್ರವರಿ 15 ಕ್ಕೆ ಈ ದಾಖಲೆ ಸೃಷ್ಟಿಸಿದ್ದಾನೆ. ಅಮೆರಿಕದ ಓಹಿಯೋನ ಮಸ್ಸಿಲ್ಲನ್ನಲ್ಲಿ ತಾವು ಓದಿದ ಶಾಲೆಯ ಜಿಮ್ನಲ್ಲಿ ಈ ಸಾಧನೆ ಕೈಗೊಂಡಿದ್ದಾನೆ ಎಂದು ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ಸ್ನ ಪ್ರಕಟಣೆ ತಿಳಿಸಿದೆ. (ಏಜೆನ್ಸೀಸ್)