ಟೋಕಿಯೋ : ಟೋಕಿಯೋ ಒಲಿಂಪಿಕ್ಸ್ನಲ್ಲಿ ಪುರುಷರ 400 ಮೀಟರ್ ಹರ್ಡಲ್ಸ್ ರೇಸ್ನಲ್ಲಿ ನಾರ್ವೇಯ ಕಾರ್ಸ್ಟೆನ್ ವಾರ್ಹೋಂ, ಹಿಂದಿನ ವಿಶ್ವ ದಾಖಲೆಯನ್ನು ಮುರಿದು ಚಿನ್ನದ ಪದಕ ಗಳಿಸಿದ್ದಾರೆ. ಈ ಸಂಭ್ರಮವನ್ನು ಆತ ತನ್ನ ಅಂಗಿಯನ್ನು ಹರಿದುಹಾಕಿ ಆಚರಿಸಿದ್ದು, ಸಾಮಾಜಿಕ ಮಾಧ್ಯಮದಲ್ಲಿ ಈ ದೃಶ್ಯಗಳು ವೈರಲ್ ಆಗಿವೆ.
400 ಮೀ ಹರ್ಡಲ್ಸ್ ಸ್ಪರ್ಧೆಯಲ್ಲಿ, 29 ವರ್ಷಗಳ ಹಿಂದೆ ಕೆವಿನ್ ಯಂಗ್ ಎಂಬ ಆಟಗಾರ 46.70 ಸೆಕೆಂಡುಗಳ ವಿಶ್ವ ದಾಖಲೆಯನ್ನು ರಚಿಸಿದ್ದರು. ಇಂದು ಅದೇ ಸ್ಪರ್ಧೆಯಲ್ಲಿ, 25 ವರ್ಷ ವಯಸ್ಸಿನ ವಾರ್ಹೋಂ, 45.94 ಸೆಕೆಂಡುಗಳಿಗೆ ಫಿನಿಶಿಂಗ್ ಲೈನ್ ತಲುಪಿದ್ದು, ಪ್ರಥಮ ಸ್ಥಾನದೊಂದಿಗೆ ಒಲಿಂಪಿಕ್ಸ್ ಚಿನ್ನದ ಪದಕ ಗೆದ್ದರು.
ಕ್ರೀಡಾ ಇತಿಹಾಸದಲ್ಲಿ ಇದುವರೆಗೆ ಕೇವಲ 4 ಅಥ್ಲೀಟ್ಗಳು 47 ಸೆಕೆಂಡುಗಳ ಒಳಗೆ ಈ ಹರ್ಡಲ್ಸ್ ಈವೆಂಟನ್ನು ಮುಗಿಸಿದ್ದಾರೆ. ಇಂದಿನ ಸ್ಪರ್ಧೆಯಲ್ಲಿ ವಾರ್ಹೋಂನೊಂದಿಗೆ ಅಮೆರಿಕದ ರೈ ಬೆಂಜಮಿನ್ 46.17 ಸೆಕೆಂಡುಗಳಲ್ಲಿ ಮುಗಿಸಿ ಬೆಳ್ಳಿ ಪದಕ ಗೆದ್ದರೆ, ಬ್ರೆಜಿಲ್ನ ಅಲಿಸನ್ ಡಾಸ್ ಸ್ಯಾಂಟೋಸ್ 46.72 ಸೆಕೆಂಡುಗಳಲ್ಲಿ ಮುಗಿಸಿ ಕಂಚು ಗೆದ್ದರು. ಈ ಇಬ್ಬರೂ ಉತ್ತಮ ವೇಗ ಪ್ರದರ್ಶಿಸಿ, ಪ್ರಾದೇಶಿಕ ದಾಖಲೆಗಳನ್ನು ನಿರ್ಮಿಸಿದ್ದಾರೆ.
ಈ ಗೆಲುವಿನ ಸಂತಸವನ್ನು ತಮ್ಮ ಸ್ಲೀವ್ಲೆಸ್ ಸ್ಪೋರ್ಟ್ಸ್ ಶರ್ಟನ್ನು ಹರಿದು ತೋರ್ಪಡಿಸಿದ ವಾರ್ಹೋಂ, "ನನ್ನನ್ನು ಬಹಳ ಬಾರಿ ಪರ್ಫೆಕ್ಟ್ ರೇಸ್ ಯಾವುದು ಎಂದು ಕೇಳುತ್ತಾರೆ. ಅದು ಇರುವುದಿಲ್ಲ ಎಂದು ನಾನು ಹೇಳುತ್ತಿದ್ದೆ. ಆದರೆ ಇವತ್ತಿನ ರೇಸ್ನಲ್ಲಿ ನಾನು ಅದಕ್ಕೆ ಬಹಳ ಸನಿಹದಲ್ಲಿದ್ದೇನೆ ಎನಿಸಿತು" ಎಂದಿದ್ದಾರೆ. "ಇದು ನನಗೆಷ್ಟು ಮುಖ್ಯ ಎಂದು ಬಣ್ಣಿಸಲಾರೆ. ನಾನು ಬೆಳಿಗ್ಗೆಯಿಂದ ರಾತ್ರಿವರೆಗೆ ಇದನ್ನೇ ಮಾಡುತ್ತೇನೆ. ಇದು ತುಂಬಾ ಮಹತ್ವದ್ದು" ಎಂದು ಹರ್ಷೋದ್ಗಾರ ಮಾಡಿದ್ದಾರೆ. (ಏಜೆನ್ಸೀಸ್)