IPL 2025: ಐಪಿಎಲ್ 18ನೇ ಆವೃತ್ತಿಗೆ ಇನ್ನೇನು ಕೆಲವೇ ತಿಂಗಳು ಬಾಕಿ ಉಳಿದಿದ್ದು, ಯಾವ ದಿನ ಶುರುವಾಗಲಿದೆ ಹಾಗೂ ಮುಕ್ತಾಯವಾಗಲಿದೆ ಎಂಬ ವೇಳಾಪಟ್ಟಿಯೂ ಈಗಾಗಲೇ ಅಧಿಕೃತವಾಗಿ ಹೊರಬಿದ್ದಿದೆ. ಮಾರ್ಚ್ 23ರಿಂದ ಐಪಿಎಲ್ ಪಂದ್ಯಗಳು ಆರಂಭವಾಗಲಿದೆ ಎಂಬ ಸುದ್ದಿ ಕ್ರಿಕೆಟ್ ಪ್ರಿಯರಲ್ಲಿ ಕಾತರವನ್ನು ಹೆಚ್ಚಿಸಿದೆ. 10 ಬಲಿಷ್ಠ ತಂಡಗಳು 2025ರ ಐಪಿಎಲ್ ಟ್ರೋಫಿ ಎತ್ತಿಹಿಡಿಯಲು ಸಜ್ಜಾಗಿದೆ. ಸ್ಟಾರ್ ಹಾಗೂ ಯುವ ಆಟಗಾರರಿಂದ ಕೂಡಿರುವ ಟೀಮ್ಗಳು ಯಾವ ಮಟ್ಟಿಗೆ ಪೈಪೋಟಿ ಕೊಡಲಿದೆ ಎಂಬುದೇ ಸದ್ಯ ಕುತೂಹಲ.
ಕಳೆದ ವರ್ಷ ನವೆಂಬರ್ನಲ್ಲಿ ನಡೆದ ಹರಾಜು ಪ್ರಕ್ರಿಯೆಯಲ್ಲಿ ಭರ್ಜರಿ ಬಿಡ್ಡಿಂಗ್ ಮಾಡಿದ 10 ತಂಡಗಳು, ಉತ್ತಮ ಆಲ್ರೌಂಡರ್, ಬ್ಯಾಟರ್, ಬೌಲರ್ಗಳನ್ನೇ ತಮ್ಮ ಟೀಮ್ಗೆ ಆಯ್ದುಕೊಂಡಿದೆ. ಈ ಹಿಂದೆ ಇದ್ದ ತಂಡಗಳು ಇದೀಗ ಬಹುತೇಕ ಬದಲಾಗಿದ್ದು, ಹೊಸ ಕ್ಯಾಪ್ಟನ್, ಹೊಸ ಕೀಪರ್ಗಳಿಂದಲೇ ತಂಡಗಳು ಮೈದಾನಕ್ಕಿಳಿಯಲಿರುವುದು ಆಟದ ರೋಚಕತೆಯನ್ನು ಮತ್ತಷ್ಟು ಹೆಚ್ಚಿಸಲಿದೆ ಎಂಬುದರಲ್ಲಿ ಅನುಮಾನವೇ ಇಲ್ಲ. ಬೌಲರ್ ಮತ್ತು ಬ್ಯಾಟರ್ಗಳಿಗಿಂತ ಈ ಬಾರಿ ವಿಕೆಟ್ ಕೀಪರ್-ಬ್ಯಾಟರ್ಗಳ ಮೇಲೆ ಭಾರೀ ಭರವಸೆ ಹಾಗೂ ನಿರೀಕ್ಷೆಗಳು ಮೂಡಿವೆ.
17ನೇ ಸೀಸನ್ನಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಕೆಲವು ಸ್ಟಾರ್ ವಿಕೆಟ್ ಕೀಪರ್-ಬ್ಯಾಟರ್ಗಳ ಮೇಲೆ ಈ ವರ್ಷವು ನಿರೀಕ್ಷೆ ಹೆಚ್ಚಾಗಿದೆ. ಆದರೆ, 18ನೇ ಆವೃತ್ತಿಯಲ್ಲಿ ಇದು ದುಪ್ಪಟ್ಟು ಎಂಬುದು ಗಮನಾರ್ಹ. ಅಸಲಿಗೆ ಯಾರೆಲ್ಲಾ ಈ ಪಟ್ಟಿಯಲ್ಲಿದ್ದಾರೆ? ಯಾರ ಮೇಲೆ ಹೆಚ್ಚಿನ ನಿರೀಕ್ಷೆ ಎಂಬುದರ ವಿವರ ಹೀಗಿದೆ ಗಮನಿಸಿ.
17ನೇ ಸೀಸನ್ನಲ್ಲಿ ಲಖನೌ ಸೂಪರ್ಜೈಂಟ್ಸ್ ತಂಡದ ಕ್ಯಾಪ್ಟನ್ ಆಗಿದ್ದ ಕನ್ನಡಿಗ ಕೆ.ಎಲ್. ರಾಹುಲ್, ಟೀಮ್ನ ಗೆಲುವಿನೆಡೆಗೆ ಸಾಗಿಸುವಲ್ಲಿ ವಿಫಲರಾದರು. ನಾಯಕನಾಗಿ ತನ್ನ ಆಟವನ್ನು ಅಲ್ಲಲ್ಲಿ ಉತ್ತಮವಾಗಿ ಪ್ರದರ್ಶಿಸಿದ್ದೇ ಆದರೂ ತಂಡಕ್ಕೆ ಗೆಲುವು ತಂದುಕೊಡಲಿಲ್ಲ ಎಂಬ ಬೇಸರ ಎಲ್ಎಸ್ಜಿ ಮಾಲೀಕರಿಗಿತ್ತು. ಇದೇ ಕಾರಣಕ್ಕೆ ರಾಹುಲ್ರನ್ನು ಮೈದಾನದಲ್ಲೇ ಅವಮಾನಿಸಿ, ಅಂದು ಕ್ರಿಕೆಟ್ ಪ್ರಿಯರ ಕೆಂಗಣ್ಣಿಗೆ ಗುರಿಯಾದರು. ಈಗ 18ನೇ ಆವೃತ್ತಿಗೆ ಡೆಲ್ಲಿ ಕ್ಯಾಪಿಟಲ್ಸ್ ಕ್ಯಾಪ್ಟನ್ ಆಗಿ ತಂಡವನ್ನು ಮುನ್ನಡೆಸಲಿರುವ ರಾಹುಲ್ ಮೇಲೆ ಅಪಾರ ನಿರೀಕ್ಷೆಗಳಿವೆ.
ಕಳೆದ ಸೀಸನ್ ಅತ್ಯಧಿಕ ರನ್ ಸ್ಕೋರರ್ ಆಗಿ ಹೊರಹೊಮ್ಮದೇ ಹೋದರೂ, ಕ್ಯಾಪ್ಟನ್ ಆಗಿ ತಂಡವನ್ನು ಮುನ್ನಡೆಸದೆ ಇದ್ದರೂ ತಮ್ಮ ಆಟವನ್ನು ಧೋನಿ ಅದ್ಭುತವಾಗಿ ಪ್ರದರ್ಶಿಸಿದರು. 5-6ನೇ ಕ್ರಮಾಂಕದಲ್ಲಿ ಬಂದರು ಕೂಡ ಅಬ್ಬರದ ಬ್ಯಾಟಿಂಗ್ ಮಾಡುವಲ್ಲಿ ಧೋನಿ ಹಿಂದುಳಿಯಲಿಲ್ಲ. ನಿವೃತ್ತಿ ಪಡೆಯುವ ಸಮಯದಲ್ಲಿಯೂ ಸಿಎಸ್ಕೆಗೆ ಬೆನ್ನುಲುಬಾಗಿರುವ ಕ್ಯಾಪ್ಟನ್ ಕೂಲ್, 2025ರಲ್ಲಿ ಆದರೂ ತಂಡಕ್ಕೆ ತಂದುಕೊಟ್ಟು ಸಂತಸದ ನಿವೃತ್ತಿ ಪಡೆಯಲು ಇಚ್ಛಿಸಿದ್ದಾರೆ. ಕಳೆದ ಆವೃತ್ತಿಯಲ್ಲಿ ಅಬ್ಬರಿಸಿದಂತೆಯೇ ಈ ವರ್ಷವು ಅವರ ಆರ್ಭಟ ಜೋರಿರಲಿದೆ ಎಂದು ಅಭಿಮಾನಿಗಳು ನಿರೀಕ್ಷಿಸಿದ್ದಾರೆ.
ಸನ್ರೈಸರ್ಸ್ ಹೈದರಾಬಾದ್ ಪರ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ತೋರುವ ಹೆನ್ರಿಕ್ ಕ್ಲಾಸೆನ್, ತಮ್ಮ ಬ್ಯಾಟಿಂಗ್ ಶೈಲಿಗೆ ಹೆಚ್ಚು ಹೆಸರುವಾಸಿ. ಓಪನಿಂಗ್ ಅಥವಾ ಮಧ್ಯಮ ಕ್ರಮಾಂಕ ಯಾವುದೇ ಇರಲಿ ತಮ್ಮ ಆಟವನ್ನು ಎಂದಿಗೂ ಬಿಟ್ಟುಕೊಡದ ಕ್ಲಾಸೆನ್, ಪವರ್ಫುಲ್ ಹಿಟ್ಟಿಂಗ್ ಮೂಲಕವೇ ಮೈದಾನದಲ್ಲಿ ಹೆಚ್ಚು ಸದ್ದು ಮಾಡುತ್ತಾರೆ. ಎಂದಿನಂತೆ ಈ ವರ್ಷವು ಅವರ ಮೇಲೆ ದುಪ್ಪಟ್ಟಿನ ನಿರೀಕ್ಷೆಯಿದೆ.
ರಾಜಸ್ಥಾನ ರಾಯಲ್ಸ್ಗೆ ಆಧಾರ ಸ್ಥಂಬವಾಗಿರುವ ಜಾಸ್ ಬಟ್ಲರ್, ಇತ್ತ ಓಪನಿಂಗ್ ಬ್ಯಾಟರ್ ಆಗಿಯೂ ಸೈ, ಅತ್ತ ಚಾಣಾಕ್ಷ ಕೀಪಿಂಗ್ಗೂ ಜೈ. ರಾಯಲ್ಸ್ ಪರ ಮೈದಾನದಲ್ಲಿ ಓಪನಿಂಗ್ ಇಳಿಯುವ ಬಟ್ಲರ್, ಶತಕ ಇಲ್ಲದೆ ಹೋದರೂ ಅರ್ಧ ಶತಕ ಸಿಡಿಸದೆ ಪೆವಿಲಿಯನ್ನತ್ತ ಮುಖ ಮಾಡುವುದು ತೀರ ಕಡಿಮೆ. ಸಿಕ್ಸರ್ ಹಾಗೂ ಬೌಂಡರಿಗಳನ್ನೇ ಬೀಸುವ ಜಾಸ್, ತಂಡದ ಪ್ರತಿ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾರೆ,(ಏಜೆನ್ಸೀಸ್).