ಹೈದರಾಬಾದ್: ಕೊರಟಾಲ ಶಿವ ನಿರ್ದೇಶನ ಜೂ. ಎನ್ಟಿಆರ್-ಜಾಹ್ನವಿ ಕಪೂರ್ ನಟನೆಯ ದೇವರ ಚಿತ್ರವು ಇದೇ ಸೆಪ್ಟೆಂಬರ್ 27ರಂದು ವಿಶ್ವದಾದ್ಯಂತ ಬಿಡುಗಡೆ ಆಗುತ್ತಿದ್ದು, ಈಗಾಗಲೇ ಸಿನಿಮಾ ಟ್ರೇಲರ್ ಮೂಲಕ ಸಖತ್ ಸೌಂಡ್ ಮಾಡುತ್ತಿದೆ. ಚಿತ್ರದ ಟ್ರೇಲರ್ಗೆ ಸಕಾರಾತ್ಮಕ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದ್ದು, ಎರಡು ಅವತರಣಿಕೆಯಲ್ಲಿ ಚಿತ್ರ ಬಿಡುಗಡೆಯಾಗುತ್ತಿದ್ದು, ಈ ಚಿತ್ರವನ್ನು ಸಿನಿಪಂಡಿತರು ಮೆಗಾಸ್ಟಾರ್ ಚಿರಂಜೀವಿ, ರಾಮ್ಚರಣ್ ನಟನೆಯ ಆಚಾರ್ಯ ಚಿತ್ರಕ್ಕೆ ಕಂಪೇರ್ ಮಾಡಿ ಮಾತನಾಡಲು ಶುರು ಮಾಡಿದ್ದಾರೆ.
ಆರ್ಆರ್ಆರ್ ಬಳಿಕ ಜೂ. ಎನ್ಟಿಆರ್ ನಟನೆಯ ಯಾವ ಚಿತ್ರವು ತೆರೆಕಂಡಿಲ್ಲ. ಸುಮಾರು ಎರಡೂವರೆ ವರ್ಷದ ಬಳಿಕ ಅವರ ಚಿತ್ರ ತೆರೆಕಾಣುತ್ತಿದ್ದು, ಈ ಚಿತ್ರ ಗೆಲ್ಲೋದು ಅನುಮಾನ ಎಂದು ಕೆಲವರು ಅಭಿಪ್ರಾಯಪಟ್ಟಿದ್ದಾರೆ. ಈ ಮಧ್ಯೆ ಒಂದು ನಂಬಿಕೆ ಬಗ್ಗೆ ಅಭಿಮಾನಿಗಳು ಆತಂಕ ಹೊರಹಾಕಿದ್ದಾರೆ. ಇದಕ್ಕೆ ಮುಖ್ಯ ಕಾರಣ ರಾಜಮೌಳಿಯವರ ಶಾಪವೇ ಇದಕ್ಕೆ ಕಾರಣ ಎಂದು ಹೇಳಲಾಗುತ್ತಿದೆ.
ಏಕೆಂದರೆ ರಾಜಮೌಳಿ ಜೊತೆ ಸಿನಿಮಾ ಮಾಡಿದ ಹೀರೋಗಳ ಮುಂದಿನ ಸಿನಿಮಾ ಫ್ಲಾಪ್ ಆಗುತ್ತದೆ ಎಂಬ ನಂಬಿಕೆ ಟಾಲಿವುಡ್ನಲ್ಲಿ ಇದೆ. ಇದು ಅನೇಕ ಬಾರಿ ಸಾಬೀತಾಗಿದೆ. ರಾಜಮೌಳಿ ನಿರ್ದೇಶನ ಆರ್ಆರ್ಆರ್ ಚಿತ್ರದ ಬಳಿಕ ರಾಮ್ಚರಣ್ ನಟನೆಯ ಆಚಾರ್ಯ ಚಿತ್ರ ಬಾಕ್ಸ್ಆಫೀಸ್ನಲ್ಲಿ ಹೀನಾಯವಾಗಿ ಸೋಲುಂಡಿತ್ತು. ಸ್ವತಃ ಮೆಗಾ ಕುಟುಂಬದ ಅಭಿಮಾನಿಗಳೇ ಚಿತ್ರವನ್ನು ವೀಕ್ಷಿಸಲು ಹಿಂದೇಟು ಹಾಕಿದ್ದರು. ಇದೀಗ ದೇವರಾ ಚಿತ್ರಕ್ಕೂ ಅದೇ ಭೀತಿ ಎದುರಾಗಿದ್ದು, ಈ ವಿಚಾರ ಜೂ. ಎನ್ಟಿಆರ್ ಅಭಿಮಾನಿಗಳನ್ನು ಚಿಂತೆಗೆ ದೂಡಿದೆ.
ಜೂ. ಎನ್ಟಿಆರ್ಗೆ ಈ ಅನುಭವ ಆಗುತ್ತಿರುವುದು ಇದೇ ಮೊದಲೇನು ಅಲ್ಲ. ರಾಜಮೌಳಿ ನಿರ್ದೇಶನದ, ಜೂನಿಯರ್ ಎನ್ಟಿಆರ್ ನಟನೆಯ ಸ್ಟುಡೆಂಟ್ ನಂಬರ್ 1 ಸಿನಿಮಾ ಗೆದ್ದ ಬಳಿಕ ರಿಲೀಸ್ ಆದ ಸುಬ್ಬು ಫ್ಲಾಪ್ ಆಯಿತು. ಸಿಂಹಾದ್ರಿ ಗೆಲುವಿನ ಬಳಿಕ ಅವರು ಆಂಧ್ರವಾಲ ಚಿತ್ರದ ಮೂಲಕ ಸೋಲು ಕಂಡರು. ಯಮದೊಂಗ ಗೆಲುವಿನ ಬಳಿಕ ಕಂತ್ರಿ ಚಿತ್ರದ ಮೂಲಕ ಸೋಲು ಕಂಡರು. ಈ ವಿಚಾರ ಈಗ ಅಭಿಮಾನಿಗಳನ್ನು ಕಾಡುತ್ತಿದ್ದು, ದೇವರಾ ಚಿತ್ರವು ಬ್ಲಾಕ್ಬಸ್ಟರ್ ಆಗೆಲೆಂದು ದೇವರಲ್ಲಿ ಪ್ರಾರ್ಥಿಸಿದ್ದಾರೆ.