Flying Car : ನೀವು ಆಗಾಗ ಟ್ರಾಫಿಕ್ ಜಾಮ್ ಕಿರಿಕಿರಿ ಅನುಭವಿಸುತ್ತಿದ್ದೀರಾ? ಗಂಟೆಗಟ್ಟಲೆ ಟ್ರಾಫಿಕ್ನಲ್ಲಿ ಸಿಲುಕಿ ನಿಮ್ಮ ಅಮೂಲ್ಯ ಸಮಯ ಹಾಳಾಗುತ್ತಿದೆಯಾ? ಚಿಂತಿಸಬೇಡಿ ನಿಮ್ಮಂತಹ ಜನರಿಗಾಗಿಯೇ ಹಾರುವ ಕಾರನ್ನು ರೆಡಿ ಮಾಡಲಾಗುತ್ತಿದೆ. ಅಮೆರಿಕದ ಆಟೋಮೋಟಿವ್ ಮತ್ತು ವಾಯುಯಾನ ಕಂಪನಿಯಾದ ಅಲೆಫ್ ಏರೋನಾಟಿಕ್ಸ್ ಹೊಸ ಭವಿಷ್ಯದ ಕಾರನ್ನು ಅಭಿವೃದ್ಧಿಪಡಿಸುತ್ತಿದೆ. ಈ ಕಾರು ರಸ್ತೆಯಲ್ಲಿ ಮಾತ್ರ ಚಲಿಸುವುದಲ್ಲದೆ, ಅಗತ್ಯವಿದ್ದಾಗ ಟೇಕಾಫ್ ಆಗಿ ಆಗಸದಲ್ಲಿ ಹಾರಬಲ್ಲದು.
ಇತ್ತೀಚೆಗೆ, ಕ್ಯಾಲಿಫೋರ್ನಿಯಾದ ರಸ್ತೆಯೊಂದರಲ್ಲಿ ಅಲೆಫ್ ಮಾಡೆಲ್ ಝೀರೋ ಕಾರನ್ನು ಯಶಸ್ವಿಯಾಗಿ ಪರೀಕ್ಷಿಸಲಾಯಿತು. ಇದಕ್ಕೆ ಸಂಬಂಧಿಸಿದ ವಿಡಿಯೋವನ್ನು ಕಂಪನಿಯು ನೆಟ್ಟಿಗರೊಂದಿಗೆ ಹಂಚಿಕೊಂಡಿದೆ. ವಿಡಿಯೋದಲ್ಲಿ, ಅಲೆಫ್ ಮಾಡೆಲ್ ಝೀರೋ ಕಾರು ರಸ್ತೆಯಲ್ಲಿ ಸ್ವಲ್ಪ ದೂರ ಪ್ರಯಾಣಿಸಿ ನಂತರ ಲಂಬವಾಗಿ ಮೇಲಕ್ಕೇರಿ, ಮುಂಭಾಗದಲ್ಲಿರುವ ಕಾರಿನ ಮೇಲೆ ಹಾರಿತು. ನಂತರ ಅದು ಮತ್ತೆ ರಸ್ತೆಗೆ ಇಳಿದು ಮುಂದೆ ಸಾಗಿತು.
ಸಾಮಾನ್ಯ ಕಾರುಗಳ ಬಾನೆಟ್ನಲ್ಲಿ ಎಂಜಿನ್ಗಳಿದ್ದರೆ, ಮಾಡೆಲ್ ಝೀರೋ ಕಾರಿನ ಚಕ್ರಗಳಲ್ಲಿ ನಾಲ್ಕು ಸಣ್ಣ ಎಂಜಿನ್ಗಳನ್ನು ಅಳವಡಿಸಲಾಗಿದೆ. ಅವುಗಳ ಸಹಾಯದಿಂದ, ಈ ಕಾರು ಸಾಮಾನ್ಯ ಎಲೆಕ್ಟ್ರಿಕ್ ಕಾರಿನಂತೆ ರಸ್ತೆಯಲ್ಲಿ ಚಲಿಸುತ್ತದೆ. ಕಂಪನಿಯು ಖಾಲಿ ಬಾನೆಟ್ ಮತ್ತು ಟ್ರಂಕ್ನಲ್ಲಿ ಒಟ್ಟು ಎಂಟು ಪ್ರೊಪೆಲ್ಲರ್ಗಳನ್ನು ಅಳವಡಿಸಿದೆ. ಈ ಪ್ರೊಪೆಲ್ಲರ್ಗಳ ವಿಶೇಷತೆಯೆಂದರೆ ಅವು ವಿಭಿನ್ನ ವೇಗಗಳಲ್ಲಿ ಸ್ವತಂತ್ರವಾಗಿ ತಿರುಗಬಲ್ಲವು. ಪರಿಣಾಮವಾಗಿ, ಕಾರು ಯಾವುದೇ ದಿಕ್ಕಿನಲ್ಲಿ ಹಾರಬಲ್ಲದು. ಇದಕ್ಕಾಗಿ, ಕಂಪನಿಯು ಡಿಸ್ಟ್ರಿಬ್ಯೂಟೆಡ್ ಎಲೆಕ್ಟ್ರಿಕ್ ಪ್ರೊಪಲ್ಷನ್ ಟೆಕ್ನಾಲಜಿಯನ್ನು ಬಳಸಿದೆ. ಫ್ರೇಮ್ಗೆ ಕಾರ್ಬನ್ ಫೈಬರ್ ಬಳಸುವುದರಿಂದ ಕಾರಿನ ತೂಕ 385 ಕೆಜಿಗೆ ಸೀಮಿತವಾಗಿದೆ.
ಪ್ರಸ್ತುತ ಮಾಡೆಲ್ ಝೀರೋ ಕಾರು ಗಾಳಿಯಲ್ಲಿ ಸುಮಾರು 177 ಕಿ.ಮೀ ಮತ್ತು ರಸ್ತೆಯಲ್ಲಿ 56 ಕಿ.ಮೀ ವೇಗದಲ್ಲಿ ಪ್ರಯಾಣಿಸಬಹುದು ಎಂದು ಅಲೆಫ್ ಏರೋನಾಟಿಕ್ಸ್ ವಿವರಿಸಿದೆ. ಎರಡು ಆಸನಗಳ ಮಾಡೆಲ್ ಕಾರು ರಸ್ತೆಯಲ್ಲಿ ಸುಮಾರು 320 ಕಿ.ಮೀ ಮತ್ತು ಗಾಳಿಯಲ್ಲಿ 177 ಕಿ.ಮೀ ವೇಗದಲ್ಲಿ ಪ್ರಯಾಣಿಸಲಿದೆಯಂತೆ. ಅಲೆಫ್ ಏರೋನಾಟಿಕ್ಸ್ ಅವರು ಅಭಿವೃದ್ಧಿಪಡಿಸುತ್ತಿರುವ ಕಾರು ಈಗಾಗಲೇ ಪ್ರಪಂಚದಾದ್ಯಂತ ಅಭಿವೃದ್ಧಿಯಲ್ಲಿರುವ ಹಾರುವ ಕಾರುಗಳಿಗಿಂತ ಭಿನ್ನವಾಗಿದೆ. EVITAL ಫ್ಲೈಯಿಂಗ್ ಟ್ಯಾಕ್ಸಿಗಳಂತಹ ಕಾರುಗಳು ಟೇಕ್ಆಫ್ಗೆ ರಸ್ತೆಯನ್ನು ರನ್ವೇ ಆಗಿ ಬಳಸುತ್ತವೆ. ಆದರೆ, ಅಲೆಫ್ ಏರೋನಾಟಿಕ್ಸ್ ಅವರು ಅಭಿವೃದ್ಧಿಪಡಿಸುತ್ತಿರುವ ಕಾರು ರಸ್ತೆಯಲ್ಲಿ ಲಂಬವಾಗಿ ಟೇಕ್ ಆಫ್ ಆಗಬಹುದು.
ಈ ಬಗ್ಗೆ ಕಂಪನಿಯ ಸಿಇಒ ಜಿಮ್ ಡಕೋವ್ನಿ ಮಾತನಾಡಿ, ಈ ಕಾರು ಸಾಮಾನ್ಯ ಜನರು ಬಳಸಲು ತುಂಬಾ ಸುಲಭ ಮತ್ತು ಕೇವಲ 15 ನಿಮಿಷಗಳಲ್ಲಿ ನಿಯಂತ್ರಣ ಮಾಡುವುದನ್ನು ಕಲಿತುಕೊಳ್ಳಬಹುದು ಎಂದಿದ್ದಾರೆ. ಅಲ್ಲದೆ, ನಮ್ಮ ಕಾರಿನ ಲಾಂಚಿಂಗ್ ವಿಡಿಯೋ ರೈಟ್ ಸಹೋದರರ ಹಾರಾಟದ ವಿಡಿಯೋದಂತೆ ಮಾನವೀಯತೆಗೆ ಹೊಸ ರೀತಿಯ ಸಾರಿಗೆಯು ಸಾಧ್ಯ ಎಂಬುದನ್ನು ಸಾಬೀತುಪಡಿಸುತ್ತದೆ ಎಂದರು.
ಈ ಕಂಪನಿಯು ಈಗಾಗಲೇ ಈ ಮಾಡೆಲ್ ಝೀರೋ ಕಾರುಗಳಿಗಾಗಿ ಅಡ್ವಾನ್ಸ್ ಆರ್ಡರ್ಗಳನ್ನು ತೆಗೆದುಕೊಳ್ಳುತ್ತಿದೆ. ಈ ಕಾರಿನ ಬೆಲೆ ರೋಲ್ಸ್ ರಾಯ್ಸ್, ಬೆಂಟ್ಲಿ ಮತ್ತು ಆಸ್ಟನ್ ಮಾರ್ಟಿನ್ನಂತಹ ಐಷಾರಾಮಿ ಕಾರುಗಳಂತೆಯೇ ಇದೆ. ಕಂಪನಿಯು ಈ ಕಾರಿನ ಬೆಲೆಯನ್ನು ಸುಮಾರು 2.57 ಕೋಟಿ ರೂ.ಗಳಿಗೆ ಅಂತಿಮಗೊಳಿಸಿದೆ. ಆದಾಗ್ಯೂ, ಭವಿಷ್ಯದಲ್ಲಿ, ಇದನ್ನು ದೊಡ್ಡ ಪ್ರಮಾಣದಲ್ಲಿ ಉತ್ಪಾದಿಸಲಾಗುತ್ತದೆ ಮತ್ತು ಸಾಮಾನ್ಯ ಜನರಿಗೆ ಕೈಗೆಟುಕುವಂತೆ ಮಾಡಲಾಗುತ್ತದೆ. ಸುಮಾರು 27.35 ಲಕ್ಷ ರೂ.ಗಳಿಗೆ ಕಾರನ್ನು ಒದಗಿಸುವ ಗುರಿಯನ್ನು ಹೊಂದಿದೆ ಎಂದು ಕಂಪನಿ ಹೇಳಿದೆ. (ಏಜೆನ್ಸೀಸ್)