ಸಿಯೋಲ್: ದಕ್ಷಿಣ ಕೊರಿಯಾದ(South Korea)ಶಾಸಕರು ರಾಷ್ಟ್ರೀಯ ಅಸೆಂಬ್ಲಿಯಲ್ಲಿ ಶನಿವಾರ(ಡಿಸೆಂಬರ್ 14) ಅಧ್ಯಕ್ಷ ಯೂನ್ ಸುಕ್ ಯೋಲ್ ವಿರುದ್ಧ ದೋಷಾರೋಪಣೆ ನಿರ್ಣಯವನ್ನು ಅನುಮೋದಿಸಿದರು. ಕಳೆದ ವಾರ ಸಮರ ಕಾನೂನನ್ನು ಹೇರುವ ಪ್ರಯತ್ನದಲ್ಲಿ ಅಧ್ಯಕ್ಷರು ವಿಫಲವಾದ ನಂತರ ಈ ದೋಷಾರೋಪಣೆಯನ್ನು ತರಲಾಯಿತು.
ಇದನ್ನು ಓದಿ: ಹಿಜಾಬ್ ಇಲ್ಲದೆ ಆನ್ಲೈನ್ ಕನ್ಸರ್ಟ್ನಲ್ಲಿ ಪ್ರದರ್ಶನ; ಗಾಯಕಿಗೆ ಇರಾನ್ ನ್ಯಾಯಾಂಗ ಹೇಳಿದ್ದೇನು? | Iran
300 ಸಂಸದರ ಪೈಕಿ 204 ಮಂದಿ ಅಧ್ಯಕ್ಷರ ವಿರುದ್ಧ ಮಹಾಭಿಯೋಗದ ಪರವಾಗಿ ಮತ ಹಾಕಿದರೆ, 85 ಮಂದಿ ವಿರೋಧಿಸಿದರು. ಮೂವರು ಸಂಸದರು ಮತದಾನದಿಂದ ದೂರ ಉಳಿದರು. ಈ ಅವಧಿಯಲ್ಲಿ ಎಂಟು ಮತಗಳನ್ನು ಅಸಿಂಧು ಎಂದು ಘೋಷಿಸಲಾಯಿತು. ದೋಷಾರೋಪಣೆ ಆರೋಪದಲ್ಲಿ ಅಧ್ಯಕ್ಷರ ವಿರುದ್ಧ ದಂಗೆ ಮತ್ತು ಸಾಂವಿಧಾನಿಕ ಕರ್ತವ್ಯಗಳ ಉಲ್ಲಂಘನೆ ಎಂದು ಆರೋಪಿಸಲಾಗಿದೆ.
ಈಗ ಈ ವಿಷಯ ನ್ಯಾಯಾಲಯಕ್ಕೆ ಹೋಗಲಿದ್ದು, ಅಲ್ಲಿ ದೋಷಾರೋಪಣೆ ಕುರಿತು ಅಂತಿಮ ನಿರ್ಧಾರ ಕೈಗೊಳ್ಳಲಾಗುವುದು. ಅವರನ್ನು ಪುನಃ ಅಧ್ಯಕ್ಷರನ್ನಾಗಿ ಮಾಡಬೇಕೇ ಅಥವಾ ತೆಗೆದುಹಾಕಬೇಕೆ ಎಂಬುದರ ಕುರಿತು ಈಗ ಸಾಂವಿಧಾನಿಕ ನ್ಯಾಯಾಲಯವು ನಿರ್ಧರಿಸುತ್ತದೆ. ಈ ನಿರ್ಧಾರವನ್ನು ಆರು ತಿಂಗಳೊಳಗೆ ನಿರೀಕ್ಷಿಸಲಾಗಿದೆ. ಈ ಬೆಳವಣಿಗೆ ದಕ್ಷಿಣ ಕೊರಿಯಾ ರಾಜಕೀಯದಲ್ಲಿ ಸಂಚಲನ ಮೂಡಿಸಿದೆ. ಯೂನ್ ಸುಕ್ ಯೋಲ್ ವಿರುದ್ಧ ನ್ಯಾಯಾಲಯ ತೀರ್ಪು ನೀಡಿದರೆ, ಅವರು ದಕ್ಷಿಣ ಕೊರಿಯಾದ ಇತಿಹಾಸದಲ್ಲಿ ದೋಷಾರೋಪಣೆಗೆ ಒಳಗಾದ ಎರಡನೇ ಅಧ್ಯಕ್ಷರಾಗುತ್ತಾರೆ. ಈ ನಿರ್ಧಾರ 60 ದಿನಗಳಲ್ಲಿ ಅಧ್ಯಕ್ಷೀಯ ಚುನಾವಣೆಯನ್ನು ಪ್ರಚೋದಿಸುತ್ತದೆ. ಸದ್ಯ ಯೂನ್ ಸುಕ್ ಯೋಲ್ ಅವರ ಅಧ್ಯಕ್ಷೀಯ ಅಧಿಕಾರಗಳು ಮತ್ತು ಕರ್ತವ್ಯಗಳನ್ನು ಅಮಾನತುಗೊಳಿಸಲಾಗಿದೆ. ಪ್ರಧಾನಿ ಹಾನ್ ಡಕ್-ಸೂ ಅವರು ಹಂಗಾಮಿ ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಂಡಿದ್ದಾರೆ ಎಂದು ಎನ್ಡಿಟಿವಿ ವರದಿ ಮಾಡಿದೆ.
ಯೂನ್ ಸುಕ್-ಯೋಲ್ ತುರ್ತು ಮಿಲಿಟರಿ ಕಾನೂನನ್ನು (ಸಮರ ಕಾನೂನು) ಹೇರುವುದಾಗಿ ಮಂಗಳವಾರ(ಡಿಸೆಂಬರ್ 3) ಘೋಷಿಸಿದರು. ದೇಶದ ಪ್ರತಿಪಕ್ಷಗಳು ಸಂಸತ್ತನ್ನು ನಿಯಂತ್ರಿಸುತ್ತಿವೆ ಹಾಗೂ ಉತ್ತರ ಕೊರಿಯಾದ ಬಗ್ಗೆ ಸಹಾನುಭೂತಿ ತೋರುತ್ತಿವೆ. ರಾಜ್ಯ ವಿರೋಧಿ ಚಟುವಟಿಕೆಗಳ ಮೂಲಕ ಸರ್ಕಾರವನ್ನು ಅಸ್ಥಿರಗೊಳಿಸುತ್ತಿವೆ ಎಂದು ಅವರು ಆರೋಪಿಸಿದ್ದರು.(ಏಜೆನ್ಸೀಸ್)