ತೈವಾನ್: ಅದೃಷ್ಟ ಚೆನ್ನಾಗಿದ್ದರೆ ಏನು ಬೇಕಾದರೂ ಆಗುತ್ತದೆ ಎನ್ನುವುದಕ್ಕೆ ಇದೇ ಸಾಕ್ಷಿ. ಹೆಚ್ಚಿನ ಸ್ಮಾರ್ಟ್ಫೋನ್ಗಳು ನೀರಿನಲ್ಲಿ ಬಿದ್ದರೆ ಮುಗೀತು, ಅದು ಹಾಳಾಗುವುದೇ ಹೆಚ್ಚು. ಇನ್ನು ಕೆರೆಯಲ್ಲಿ ಮೊಬೈಲ್ಫೋನ್ ಬಿದ್ದರೆ? ಮುಗಿದೇಹೋಯ್ತು ಕಥೆ. ಕೆರೆಯಲ್ಲಿ ಬಿದ್ದರೆ ಮೊಬೈಲ್ ಹಾಳಾಗುವುದು ದೂರದ ಮಾತು, ಅದು ಸಿಕ್ಕರೇ ಪುಣ್ಯ.
ಆದರೆ ಇಲ್ಲೊಬ್ಬ ತೈವಾನ್ ವಾಸಿಯ ಅದೃಷ್ಟ ಚೆನ್ನಾಗಿತ್ತು. ಕೆರೆಯಲ್ಲಿ ಬಿದ್ದ ಮೊಬೈಲ್ ಫೋನ್ ಸಿಕ್ಕಿದೆ, ಅಷ್ಟೇ ಅಲ್ಲದೇ ಅದು ಚಾಲ್ತಿಯಲ್ಲೂ ಇದೆ. ಅದೂ ಯಾವಾಗ ಅಂತೀರಾ? ಬರೋಬ್ಬರಿ ಒಂದು ವರ್ಷದ ನಂತರ! ಅದು ಚಾಲ್ತಿಯಲ್ಲಿ ಇರುವುದನ್ನು ಕಂಡು ಅದರ ಮಾಲೀಕ ಚೆನ್ ಖುದ್ದು ದಂಗಾಗಿ ಹೋಗಿದ್ದಾನೆ.
ಅಷ್ಟಕ್ಕೂ ಆಗಿದ್ದೇನೆಂದರೆ ತೈವಾನ್ನ ಬಹುಭಾಗ ಅರ್ಧ ಶತಮಾನಕ್ಕೂ ಹೆಚ್ಚು ಕಾಲ ಬರಗಾಲವನ್ನು ಎದುರಿಸುತ್ತಿದೆ. ಕೆಲವು ಕಡೆಗಳಲ್ಲಿ ಮಾತ್ರ ಅಲ್ಪಸ್ವಲ್ಪ ನೀರು ಕಾಣಬಹುದು. ನೀರು ಹೊಂದಿದ್ದ ಕೆರೆಯಲ್ಲಿ ಚೆನ್ನ ಐಫೋನ್ ಕಳೆದ ವರ್ಷ ಬಿದ್ದುಹೋಗಿತ್ತು. ಎಷ್ಟು ಹುಡುಕಾಡಿದರೂ ಸಿಕ್ಕಿರಲಿಲ್ಲ. ಅದು ಕೆರೆಯ ತಳಭಾಗಕ್ಕೆ ಹೋಗಿದ್ದರಿಂದ ಅದರ ಆಸೆಯನ್ನು ಚೆನ್ ಬಿಟ್ಟಿದ್ದ.
ಆದರೆ ಮೊನ್ನೆ ಆತ ಅದೇ ಕೆರೆಯ ಸಮೀಪ ಹೋದಾಗ ಬರಗಾಲದಿಂದ ಕೆರೆ ಸಂಪೂರ್ಣ ಬತ್ತಿರುವುದು ಕಾಣಿಸಿತು. ಆದರೆ ಅಚ್ಚರಿ ಎಂದರೆ ಮೇಲ್ಭಾಗದಲ್ಲಿ ಆತನ ಐಫೋನ್ ಕಾಣಿಸಿತು. ಅದರ ಕವರ್ ಎಲ್ಲವನ್ನೂ ನೋಡಿದ ಚೆನ್ಗೆ ಇದು ತನ್ನದೇ ಫೋನ್ ಎಂದು ಗೊತ್ತಾಯಿತು.
ಕೆರೆಯಲ್ಲಿನ ಹೂಳಿನಿಂದಾಗಿ ಕೆಸರು ತುಂಬಿಕೊಂಡಿದ್ದ ಮೊಬೈಲ್ಫೋನ್ ಅನ್ನುನಿಧಾನವಾಗಿ ಒರೆಸಿ ನೋಡಿದಾಗ ಅದಿನ್ನೂ ಚಾಲ್ತಿಯಲ್ಲಿ ಇದ್ದುದು ಕಂಡು ಚೆನ್ ಖುಷಿ ತಡೆಯಲಾಗಲಿಲ್ಲ. ಕೂಡಲೇ ಅದರ ಪಾರ್ಟ್ಗಳನ್ನು ಬೇರ್ಪಡಿಸಿ ನೀರಿನ ಪಸೆಯನ್ನು ಒರೆಸಿ ಫೋನ್ ಅನ್ನು ಜೋಪಾನ ಮಾಡಿಟ್ಟುಕೊಂಡಿದ್ದಾನೆ.
ಈ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಈತ ಪೋಸ್ಟ್ ಮಾಡಿದ್ದು, ಇದೀಗ ಭಾರಿ ವೈರಲ್ ಆಗಿದೆ.