ಬೆಂಗಳೂರು: ನಟಿ ರಶ್ಮಿಕಾ ಮಂದಣ್ಣ ತೆಲುಗಿನ "ಪುಷ್ಪ' ಚಿತ್ರದ ಮೂಲಕ ಮನೆ ಮಾತಾಗಿದ್ದಾರೆ. ಅಭಿಮಾನಿಗಳು ರಶ್ಮಿಕಾ ಅವರಲ್ಲಿ ಪುಷ್ಪ ಸಿನಿಮಾದ ಸಾಮಿ..ಸಾಮಿ ಹಾಡಿಗೆ ಹೆಜ್ಜೆ ಹಾಕಲು ಡಿಮ್ಯಾಂಡ್ ಮಾಡುತ್ತಾರೆ. ಆದರೆ ಇನ್ಮುಂದೆ ಈ ಹಾಡಿಗೆ ಡಾನ್ಸ್ ಮಾಡುವುದಿಲ್ಲ ಎಂದು ಹೇಳುವ ಮೂಲಕವಾಗಿ ರಶ್ಮಿಕಾ ಸುದ್ದಿಯಾಗಿದ್ದಾರೆ.
ಆಗಾಗ ಸಾಮಾಜಿಕ ಜಾಲತಾಣದಲ್ಲಿ ಅಭಿಮಾನಿಗಳ ಜತೆ ಚಾಟ್ ಮಾಡುವ ರಶ್ಮಿಕಾ, ಇತ್ತೀಚೆಗೆ ಅಭಿಮಾನಿಯೊಬ್ಬರ ಪ್ರಶ್ನೆಗೆ ಹೀಗೆ ಹೇಳಿಕೊಂಡಿದ್ದಾರೆ. ಇತ್ತೀಚೆಗಷ್ಟೆ ಫ್ಯಾನ್ ಒಬ್ಬರು ರಶ್ಮಿಕಾ ಮಂದಣ್ಣ ಬಳಿ, "ಮುಂದಿನ ನಿಮ್ಮನ್ನು ಭೇಟಿಯಾದಾಗ ನನ್ನ ಜತೆ ನೀವು "ಸಾಮಿ..ಸಾಮಿ' ಹಾಡಿಗೆ ಕುಣಿಯಬೇಕು' ಎಂದಿದ್ದಾರೆ.
ಅದಕ್ಕೆ ರಶ್ಮಿಕಾ, "ನಾನು ಆ ಹಾಡಿಗೆ ಡಾನ್ಸ್ ಮಾಡಿ ಸಾಕಾಗಿಹೋಗಿದೆ. ಆ ಡಾನ್ಸ್ನಿಂದಲೇ ನನಗೆ ವಯಸ್ಸಾದ ಬಳಿಕ ಬೆನ್ನು ನೋವು ಬರುತ್ತೇನೋ ಅನ್ನುವಷ್ಟರ ಮಟ್ಟಿಗೆ ಕುಣಿದಿದ್ದೇನೆ. ನಾನು, ನೀವು ಭೇಟಿಯಾದಾಗ ಬೇರೆ ಏನಾದರೂ ಮಾಡೋಣ' ಎಂದು ಉತ್ತರಿಸಿದ್ದಾರೆ. ರಶ್ಮಿಕಾ ಈ ರೀತಿ ಹಾಸ್ಯ ಮಾಡಿದ್ದಾರೋ ಅಥವಾ ಗಂಭೀರವಾಗಿ ಹೇಳಿದ್ದಾರೆಯೇ ಎಂಬುದು ತಿಳಿದುಬಂದಿಲ್ಲ.
ಸದ್ಯ ರಶ್ಮಿಕಾ ಮಂದಣ್ಣ ಮುಂಬೈನಲ್ಲಿದ್ದು, ರಣಬೀರ್ ಕಪೂರ್ ಜತೆ "ದಿ ಅನಿಮಲ್' ಹಾಗೆಯೇ ಅಲ್ಲು ಅರ್ಜುನ್ ಜತೆ "ಪುಷ್ಪ 2 ದಿ ರೂಲ್' ಚಿತ್ರದಲ್ಲೂ ನಟಿಸುತ್ತಿದ್ದಾರೆ.