ಅಥೆನ್ಸ್: ದರೋಡೆಕೋರರ ಗುಂಪೊಂದು ಮನೆಯೊಂದರ ಮೇಲೆ ದಾಳಿ ಮಾಡಿದ್ದಲ್ಲದೆ, ಮಹಿಳೆಯೊಬ್ಬಳಿಗೆ ಕಿರುಕುಳ ನೀಡಿ ಆಕೆಯ ಗಂಡ ಮತ್ತು 11 ತಿಂಗಳ ಹೆಣ್ಣು ಮಗುವಿನ ಮುಂದೆಯೇ ಬರ್ಬರವಾಗಿ ಹತ್ಯೆ ಮಾಡಿರುವ ಘಟನೆ ಗ್ರೀಸ್ನಲ್ಲಿ ನಡೆದಿದೆ.
ಕರೊಲಿನ್ ಕ್ರೌಚ್ (20) ಮೃತ ಮಹಿಳೆ. ಈಕೆಯನ್ನು ಉಸಿರುಗಟ್ಟಿಸಿ ಕೊಲೆ ಮಾಡಲಾಗಿದೆ. ಈ ಘಟನೆ ಗ್ರೀಸ್ನ ಅಥೆನ್ಸ್ ಉಪನಗರದ ಬಳಿಯಿರುವ ಗ್ಲೈಕಾ ಪಟ್ಟಣದಲ್ಲಿ ಮಂಗಳವಾರ ನಡೆದಿದೆ. ಮೃತ ಕರೊಲಿನ್, ಪತಿ ಚಾರಲಂಬೊಸ್ ಬೆಬಿಸ್ ಅನಾಗ್ನೊಸ್ಟೊಪೌಲೊಸ್ ಮತ್ತು 11 ತಿಂಗಳ ಹೆಣ್ಣು ಮಗುವಿನ ಜಹೆ ಸಂತೋಷವಾಗಿ ಸಂಸಾರ ನಡೆಸುತ್ತಿದ್ದರು.
ಶಸ್ತ್ರಾಸ್ತ್ರಗಳನ್ನು ಹೊಂದಿದ್ದ ಮೂವರು ವ್ಯಕ್ತಿಗಳು ಮಂಗಳವಾರ ನಸುಕಿನ ಜಾವ ಸುಮಾರು 5 ಗಂಟೆಯ ವೇಳೆಗೆ ಮನೆಯ ಬಾಗಿಲು ಹೊಡೆದು ಒಳಗೆ ನುಗ್ಗಿದ್ದಾರೆ. ಈ ವೇಳೆ ಇನ್ನು ನಾಲ್ವರು ದುಷ್ಕರ್ಮಿಗಳು ಮನೆಯ ಬಳಿ ಯಾರು ಬರದಂತೆ ಹೊರಗಡೆ ಕಾವಲು ಕಾದಿದ್ದಾರೆ.
ಮನೆಯ ಒಳಗೆ ನುಗ್ಗಿದ ಮೂವರು ದುಷ್ಕರ್ಮಿಗಳು ಮೊದಲು ಸಾಕು ನಾಯಿಯನ್ನು ಕೊಂದಿದ್ದಾರೆ. ಬಳಿಕ ಹೆಲಿಕಾಪ್ಟರ್ ಪೈಲಟ್ ಆಗಿರುವ ಕರೊಲಿನಾ ಪತಿ ಬೆಬಿಸ್ನನ್ನು ಕಟ್ಟಿ ಹಾಕಿ, ಬೆಲೆಬಾಳುವ ವಸ್ತುಗಳಿರುವ ಸ್ಥಳದ ಮಾಹಿತಿಗಾಗಿ ಸುಮಾರು ಒಂದು ಗಂಟೆಗಳ ಕಾಲ ಕರೊಲಿನ್ಳನ್ನು ಹಿಂಸಿಸಿದ್ದಾರೆ. ಮಾಹಿತಿಯನ್ನು ಪಡೆದುಕೊಂಡ ಬಳಿಕ ಆಕೆಯನ್ನು ಉಸಿರುಗಟ್ಟಿಸಿ ಕೊಲೆ ಮಾಡಿದ್ದಾರೆ.
ನಂತರ ಸುಮಾರು 21,500 ಪೌಂಡ್ (22,29,273 ರೂಪಾಯಿ) ಮೌಲ್ಯದ ಆಭರಣಗಳು ಮತ್ತು 13,000 ಪೌಂಡ್ (13,47,975 ರೂಪಾಯಿ) ನಗದು ಕದ್ದು ದರೋಡೆಕೋರರು ಅಲ್ಲಿಂದ ಪರಾರಿ ಆಗಿದ್ದಾರೆ.
ಈ ಘಟನೆಯಿಂದ ಬೆಚ್ಚಿಬಿದ್ದಿರುವ ಗ್ರೀಸ್ ಸರ್ಕಾರ ದರೋಡೆಕೋರರ ಬಗ್ಗೆ ಸುಳಿವು ನೀಡಿದರೆ 288,000 ಪೌಂಡ್ (2,67,59,631 ರೂಪಾಯಿ) ಬಹುಮಾನ ಘೋಷಿಸಿದೆ.
ಕಣ್ಣ ಮುಂದೆಯೇ ಪತ್ನಿಯ ಹತ್ಯೆ ಕಂಡು ಆಘಾತಕ್ಕೆ ಒಳಗಾಗಿರುವ ಕರೊಲಿನಾ ಪತಿ ಬೇಬಿಸ್, ದರೋಡೆಕೋರರಿಗೆ ಕಠಿಣ ಶಿಕ್ಷೆ ಆಗಬೇಕೆಂದು ಒತ್ತಾಯಿಸಿದ್ದಾರೆ. ಪ್ರಕರಣ ದಾಖಲಾಗಿದ್ದು, ವಿಶೇಷ ತನಿಖಾ ತಂಡವನ್ನು ರಚಿಸಿರುವ ಗ್ರೀಸ್ ಪೊಲೀಸ್ ಇಲಾಖೆ ತನಿಖೆಯನ್ನು ಆರಂಭಿಸಿದೆ. (ಏಜೆನ್ಸೀಸ್)