ಅಂತರ್ಜಾಲ ಲಭ್ಯತೆ ಹಾಗೂ ಮೊಬೈಲ್ ಬಳಕೆ ಹೆಚ್ಚಿದ ಮೇಲೆ ಜಾಗತಿಕವಾಗಿ ವ್ಯಾಪಕ ಬದಲಾವಣೆ ಆಗಿರುವುದನ್ನು ಕಾಣುತ್ತಲೇ ಇದ್ದೇವೆ. ಈ ಸಾಧನಗಳು ಜನರ ಸಾಮಾಜಿಕ, ಆರ್ಥಿಕ, ಔದ್ಯೋಗಿಕ ಆಯಾಮಗಳಲ್ಲಿ ವೇಗೋತ್ಕರ್ಷ ತಂದಿರುವುದೂ ನಿಜ. ಅದೇ ಕಾಲಕ್ಕೆ ಇವುಗಳಿಂದ ಆಗುತ್ತಿರುವ ಅಡ್ಡಪರಿಣಾಮಗಳು ಸಹ ತೀವ್ರವಾಗಿ ಅನುಭವಕ್ಕೆ ಬರುತ್ತಿವೆ. ಈ ಹಿನ್ನೆಲೆಯಲ್ಲಿ, ಕೇಂದ್ರ ಸರ್ಕಾರ ಇ-ಫಾರ್ಮಸಿ ಮತ್ತು ಮೊಬೈಲ್ ಸ್ಮಾರ್ಟ್ಫೋನ್ ವಿಷಯಗಳಲ್ಲಿ ಈಗ ತರಲು ಚಿಂತಿಸಿರುವ ಎರಡು ಕ್ರಮಗಳು ಗಮನಾರ್ಹವಾಗಿ ಗೋಚರಿಸುತ್ತವೆ.
ಆನ್ಲೈನ್ ಮೂಲಕ ಔಷಧಗಳನ್ನು ಸರಬರಾಜು ಮಾಡುವ ಇ-ಫಾರ್ಮಸಿಗಳ ಮೇಲೆ ಕೆಲ ನಿಯಂತ್ರಣ ವಿಧಿಸಲು ಕೇಂದ್ರ ಸರ್ಕಾರ ಆಲೋಚಿಸುತ್ತಿದೆ ಎಂಬುದಾಗಿ ವರದಿಯಾಗಿದೆ. ದತ್ತಾಂಶ ದುರುಪಯೋಗ ಇತ್ಯಾದಿ ಆರೋಪದ ಮೇಲೆ 20ಕ್ಕೂ ಹೆಚ್ಚು ಇ-ಫಾರ್ಮಸಿಗಳಿಗೆ ಭಾರತದ ಔಷಧಗಳ ಮಹಾನಿಯಂತ್ರಕರು (ಡಿಜಿಸಿಐ) ಕೆಲ ದಿನಗಳ ಹಿಂದೆ ನೋಟಿಸ್ ಜಾರಿಮಾಡಿದ್ದರು. ಇದು ಸಾರ್ವಜನಿಕರ ಆರೋಗ್ಯಕ್ಕೆ ಸಂಬಂಧಿಸಿದ ವಿಷಯವಾದ್ದರಿಂದ ಗಂಭೀರವಾಗಿ ಆಲೋಚಿಸಬೇಕಾದ್ದು ಅನಿವಾರ್ಯ. ಅದರಲ್ಲೂ ನೋಂದಾಯಿತ ವೈದ್ಯರ ಪ್ರಿಸ್ಕ್ರಿಪ್ಷನ್ ಇಲ್ಲದೆ ಕೆಲ ಇ-ಫಾರ್ಮಸಿಗಳು ಚಿಲ್ಲರೆ ಔಷಧ ಮಾರಾಟ ಮಾಡುತ್ತಿರುವ ಬಗ್ಗೆ ಆರೋಗ್ಯ ಇಲಾಖೆ ಅಧಿಕಾರಿಗಳು ಕಳವಳ ವ್ಯಕ್ತಪಡಿಸಿದ್ದಾರೆ. ಹೀಗಾಗಿ ಪರವಾನಗಿ ಸೇರಿದಂತೆ ಕೆಲ ನಿಯಮಗಳನ್ನು ತರಲು ಸರ್ಕಾರ ಮುಂದಾಗಿದೆ.
ಇದಲ್ಲದೆ, ಆರೋಗ್ಯಕ್ಕೆ ಸಂಬಂಧಿಸಿದ ಸಚಿವರ ಗುಂಪು (ಜಿಒಎಂ) ಸಹ ಆನ್ಲೈನ್ ಫಾರ್ಮಸಿ ಪರವಾಗಿಲ್ಲ. ಇನ್ನು, ಸ್ಮಾರ್ಟ್ಫೋನ್ಗಳಲ್ಲಿನ ಪೂರ್ವ ಸಂಸ್ಥಾಪಿತ (ಪ್ರೀ-ಇನ್ಸ್ಟಾಲ್ಡ್) ಆಪ್ಗಳು ಭದ್ರತೆ ದೃಷ್ಟಿಯಿಂದ ಅಪಾಯಕಾರಿಯಾಗುವ ಸಾಧ್ಯತೆಯ ಚರ್ಚೆ ಬಹಳ ದಿನಗಳಿಂದ ಇದೆ. ಈ ಆಪ್ಗಳನ್ನು ತೆಗೆದುಹಾಕುವ ಹಾಗೂ ಪ್ರಮುಖ ಆಪರೇಟಿಂಗ್ ಸಿಸ್ಟಂ (ಒಎಸ್) ಅಪ್ಡೇಟ್ಗಳನ್ನು ಪ್ರದರ್ಶಿಸಲು ಅವಕಾಶ ನೀಡುವಂತೆ ಸ್ಮಾರ್ಟ್ಫೋನ್ ತಯಾರಕರಿಗೆ ಸೂಚಿಸಲು ಕೇಂದ್ರ ಮಾಹಿತಿ ಮತ್ತು ತಂತ್ರಜ್ಞಾನ ಸಚಿವಾಲಯ (ಐಟಿ) ಚಿಂತನೆ ನಡೆಸುತ್ತಿದೆ. ಚೀನಾ ಕಂಪನಿಗಳು ಮೊಬೈಲ್ ದತ್ತಾಂಶಗಳನ್ನು ಬೇಹುಗಾರಿಕೆಗೆ ಬಳಸುವ ಬಗ್ಗೆ ಭಾರತ ಮಾತ್ರವಲ್ಲ ಇತರ ಅನೇಕ ದೇಶಗಳು ಸಹ ಅನುಮಾನ ವ್ಯಕ್ತಪಡಿಸಿವೆ. ಭಾರತದ ಸ್ಮಾರ್ಟ್ಫೋನ್ ಮಾರುಕಟ್ಟೆಯಲ್ಲಿ ಚೀನಾ ಕಂಪನಿಗಳ ಪ್ರಾಬಲ್ಯ ಹೆಚ್ಚಿನ ಪ್ರಮಾಣದಲ್ಲಿದೆ. ಕೇಂದ್ರ ಸರ್ಕಾರ 2020ರಿಂದ ಚೀನಾ ಕಂಪನಿಗಳ ವ್ಯವಹಾರದ ಮೇಲೆ ನಿಗಾ ಇರಿಸಿದ್ದು, ಟಿಕ್ಟಾಕ್ ಸಹಿತ 300ಕ್ಕೂ ಹೆಚ್ಚು ಚೀನಿ ಆಪ್ಗಳನ್ನು ನಿಷೇಧಿಸಿದೆ.
ಪ್ರಸ್ತುತ ಬಹುತೇಕ ಸ್ಮಾರ್ಟ್ಫೋನ್ಗಳು ಡಿಲೀಟ್ ಮಾಡಲಾಗದ ಪ್ರೀ-ಇನ್ಸ್ಟಾಲ್ಡ್ ಆಪ್ಗಳೊಂದಿಗೆ ಬರುತ್ತಿವೆ. ಹೊಸ ನಿಯಮಗಳ ಪ್ರಕಾರ ಸ್ಮಾರ್ಟ್ಫೋನ್ ತಯಾರಕರು ಅನ್ಇನ್ಸ್ಟಾಲ್ ಆಯ್ಕೆಯನ್ನು ಕೊಡಬೇಕಾಗುತ್ತದೆ. ಈ ನಿಯಮ ಪಾಲನೆ ಬಗ್ಗೆ ಭಾರತೀಯ ಮಾನಕ ಬ್ಯೂರೋ (ಬಿಐಎಸ್) ನೇಮಿಸಿದ ಪ್ರಯೋಗಾಲಯವೊಂದು ಗಮನ ವಹಿಸುತ್ತದೆ. ‘ಭಾರತದಲ್ಲಿ ಬಳಸಲಾಗುತ್ತಿರುವ ಪ್ರಮುಖ ಸ್ಮಾರ್ಟ್ಫೋನ್ಗಳಲ್ಲಿ ಪ್ರೀ-ಇನ್ಸ್ಟಾಲ್ಡ್ ಆಪ್/ಬ್ಲೋಟ್ವೇರ್ಗಳಿದ್ದು ಗೋಪ್ಯತೆ/ಮಾಹಿತಿ ಭದ್ರತೆ ಕುರಿತ ಗಂಭೀರ ಸಮಸ್ಯೆಗಳನ್ನು ಒಡ್ಡುತ್ತವೆ’ ಎಂದು ಐಟಿ ಸಚಿವಾಲಯದ ಸಭೆಯೊಂದರಲ್ಲಿ ಮಂಡಿಸಲಾದ ಗೋಪ್ಯ ದಾಖಲೆಯಲ್ಲಿ ಹೇಳಲಾಗಿದೆ. ಜಾಗತಿಕ ಭೂ-ಸಾಮರಿಕ ವಾತಾವರಣ ಹಾಗೂ ಅಂತರ್ಜಾಲ ಅಪರಾಧಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಜನರ ಮತ್ತು ಆಂತರಿಕ ಸುರಕ್ಷತೆ ಬಗ್ಗೆ ದೇಶಗಳು ಕಾಳಜಿ ವಹಿಸುವುದು ಅನಿವಾರ್ಯ ಅಗತ್ಯ.