ನವದೆಹಲಿ: ನೀವು ಪಬ್ಜಿ ಪ್ರೇಮಿಗಳಾಗಿದ್ದು, ಪಬ್ಜಿ ನಿಷೇಧವಾದಾಗಿನಿಂದ ಚಿಂತೆಯಲ್ಲಿದ್ದರೆ ಈಗ ಚಿಂತೆ ಬಿಟ್ಟುಬಿಡಿ. ಏಕೆಂದರೆ ಈಗ ಭಾರತೀಯರಿಗಾಗಿ ಹೊಸ ರೂಪದಲ್ಲಿ ಬರಲು ಪಬ್ಜಿ ಸಿದ್ಧವಾಗಿದೆ.
ಭಾರತೀಯರಿಗಾಗಿ 'ಪಬ್ಜಿ ಮೊಬೈಲ್ ಇಂಡಿಯಾ' ಗೇಮಿಂಗ್ ಆ್ಯಪ್ ತಯಾರಿಸುತ್ತಿರುವುದಾಗಿ ಸಂಸ್ಥೆ ಹೇಳಿಕೊಂಡಿದೆ. ಭಾರತದ ಮಾರುಕಟ್ಟೆಗೆ ಬರಲು ಸಕಲ ಸಿದ್ಧತೆಯನ್ನು ಮಾಡಿಕೊಂಡಿದ್ದು, ಇನ್ನು ಕೆಲ ದಿನಗಳಲ್ಲಿ ಬರುವುದಾಗಿ ತಿಳಿಸಲಾಗಿದೆ.
ಹೊಸ ಪಬ್ಜಿಯನ್ನು ಭಾರತೀಯರಿಗಾಗಿಯೇ ತಯಾರಿಸಿರುವ ಹಿನ್ನೆಲೆಯಲ್ಲಿ ಇಲ್ಲಿನ ಗ್ರಾಹಕರಿಗೆ ಸರಿಹೊಂದುವಂತೆ ಕೆಲವು ಸುಧಾರಣೆಗಳನ್ನು ತರಲಾಗಿದೆ. ಹೊಸ ಪಾತ್ರಗಳು, ಹೆಚ್ಚು ನೈಸರ್ಗಿಕತೆನ್ನು ಅಳವಡಿಸಲಾಗಿದೆ.
ಭಾರತೀಯರ ದತ್ತಾಂಶ ಸುರಕ್ಷತೆ ನಮ್ಮ ಮೊದಲ ಆದ್ಯತೆ. ಹಾಗಾಗಿ ಹೊಸ ಪಬ್ಜಿಗೆ ನಿಯಮಿತವಾಗಿ ಆಡಿಟ್, ದೃಢೀಕರಣ ಮಾಡಲಾಗುವುದು. ದತ್ತಾಂಶಕ್ಕೆ ಯಾವುದೇ ರೀತಿಯಲ್ಲಿ ತೊಂದರೆ ಆಗದಂತೆ ನೋಡಿಕೊಳ್ಳಲಾಗುವುದು ಎಂದು ಸಂಸ್ಥೆ ತಿಳಿಸಿದೆ. ಅದರ ಜತೆಯಲ್ಲಿ ಭಾರತದ ವಿವಿಧ ಕ್ಷೇತ್ರಗಳಲ್ಲಿ 100 ಮಿಲಿಯನ್ ಡಾಲರ್ ಹೂಡಿಕೆ ಮಾಡುವುದಾಗಿಯೂ ತಿಳಿಸಲಾಗಿದೆ.
ಚೀನಾ ಮತ್ತು ಭಾರತ ನಡುವೆ ಬಿಕ್ಕಟ್ಟು ಹೆಚ್ಚಾದ ಬೆನ್ನಲ್ಲೇ ಚೀನಾ ಮೂಲದ 117 ಆ್ಯಪ್ಗಳನ್ನು ಸೆಪ್ಟೆಂಬರ್ನಲ್ಲಿ ನಿಷೇಧಿಸಲಾಗಿತ್ತು. ಪಬ್ಜಿಯನ್ನು ಪ್ಲೇಸ್ಟೋರ್ನಿಂದ ತೆಗೆದುಹಾಕಲಾಗಿತ್ತು. ಆದರೆ ಈ ಹಿಂದೆಯೇ ಡೌನ್ಲೋಡ್ ಮಾಡಿಕೊಂಡವರಿಗೆ ಆ್ಯಪ್ ಲಭ್ಯವಿತ್ತು. ಆದರೆ ಇತ್ತೀಚೆಗೆ ಈ ಆ್ಯಪ್ನ ಸಂಪೂರ್ಣ ಸೇವೆಯನ್ನು ಸ್ಥಗಿತಗೊಳಿಸಲಾಗಿದೆ. (ಏಜೆನ್ಸೀಸ್)