ಚಂಡೀಗಢ: ಮೂವರು ಮಹಿಳೆಯರನ್ನು ನಂಬಿಸಿ ಮದುವೆಯಾಗಿ ವಂಚಿಸಿದ ಆರೋಪದ ಮೇಲೆ ಹರಿಯಾಣ ಪಾಣಿಪತ್ ಪೊಲೀಸರು ಉತ್ತರ ಪ್ರದೇಶ ಮೂಲದ ವ್ಯಕ್ತಿಯನ್ನು ಬಂಧಿಸಿದ್ದಾರೆ.
ಬಂಧಿತನನ್ನು ಅಶನ್ ಸೈಫಿ ಎಂದು ಗುರುತಿಸಲಾಗಿದೆ. ಮದುವೆಯಾಗಿ ವಂಚಿಸಿರುವುದು ಗೊತ್ತಾದ ಬೆನ್ನಲ್ಲೇ ಎರಡನೇ ಪತ್ನಿ, ಮಗ ಮತ್ತು ಆತನ ಸಂಬಂಧಿಕರನ್ನು ಕೊಲೆ ಮಾಡಿರುವ ಆರೋಪ ಅಶಬ್ ಮೇಲಿದೆ.
ಅಶನ್ ಬಂಧಿಸಿದ ಬೆನ್ನಲ್ಲೇ ಪಾಣಿಪತ್ನ ಶಿವ್ ನಗರ್ ಏರಿಯಾದಲ್ಲಿ ಮಂಗಳವಾರ ಪತ್ತೆಯಾದ ಮೂರು ಅಸ್ಥಿಪಂಜರಗಳ ಅಂತಾರಾಜ್ಯ ನಿಗೂಢ ಪ್ರಕರಣವನ್ನು ಬಗೆಹರಿಸಿರುವುದಾಗಿ ಪಾಣಿಪತ್ ಪೊಲೀಸರು ಹೇಳಿಕೊಂಡಿದ್ದಾರೆ.
ಏನಿದು ಮೂರು ಅಸ್ಥಿಪಂಜರಗಳ ಘಟನೆ?
ಸರೋಜ್ ಹೆಸರಿನ ಮಹಿಳೆ ಮಂಗಳವಾರ ತನ್ನ ಮನೆಯ ನವೀಕರಣ ಕೆಲಸ ಮಾಡುವಾಗ ಕೋಣೆಯೊಂದರಲ್ಲಿ ಮೂರು ಅಸ್ಥಿಪಂಜರಗಳು ಹೂತಿರುವುದು ಪತ್ತೆಯಾಗುತ್ತದೆ. ಆ ಮನೆಯನ್ನು 2017ರಲ್ಲಿ ಮಹಿಳೆ, ಸುಗರ್ ಮಿಲ್ನಲ್ಲಿ ಕೆಲಸ ಮಾಡುವ ಪವನ್ ಎಂಬುವರಿಂದ ಖರಿದೀಸಿರುತ್ತಾರೆ.
ಪವನ್ ಎಂಬುವರು ಅಶನ್ ಸೈಫಿ ಎಂಬುವರಿಂದ ಖರೀದಿಸಿರುವುದು ಪೊಲೀಸ್ ತನಿಖೆಯಿಂದ ತಿಳಿಯುತ್ತದೆ. ಅಶನ್ ಬೆನ್ನತ್ತಿ ಹೋದಾಗ ಅದೇ ಸಮಯದಲ್ಲಿ ಆತ ಉತ್ತರ ಪ್ರದೇಶದ ಭದೋಹಿಯಲ್ಲಿರುವ ಕಾಶಿರಾಮ್ ಅವಾಸ್ ಕಾಲನಿ ವಾಸವಿದ್ದ. ಇದೇ ವೇಳೆ ಅಶನ್ ನೆರೆಯವರು ಆತನ ನಡವಳಿಕೆ ಮೇಲೆ ಸಂಶಯವನ್ನು ವ್ಯಕ್ತಪಡಿಸಿದ್ದರು. ಆತನ ಜಾಡು ಹಿಡಿದು ಹೋಗಿ ಅಶನ್ನನ್ನು ಪೊಲೀಸರು ಬಂಧಿಸಿದರು.
ಬಳಿಕ ನಡೆದ ಪೊಲೀಸ್ ವಿಚಾರಣೆ ವೇಳೆ ಆರೋಪಿ ಅಶನ್ ತಪ್ಪೊಪ್ಪಿಕೊಂಡಿದ್ದಾನೆ. ತನ್ನ ಎರಡನೇ ಪತ್ನಿ ನಜ್ನೀನ್, ಸ್ವಂತ ಮಗ ಮತ್ತು 15 ವರ್ಷದ ಸಂಬಂಧಿಕನನ್ನು ಕೊಲೆ ಮಾಡಿದ್ದಾಗಿ ಬಾಯ್ಬಿಟ್ಟಿದ್ದಾನೆ. ಬಳಿಕ ಆತನನ್ನು ಪಾಣಿಪತ್ನ ಸ್ಥಳೀಯ ನ್ಯಾಯಾಲಯದ ಮುಂದೆ ಹಾಜರುಪಡಿಸಲಾಗಿದ್ದು, 10 ದಿನಗಳ ಕಾಲ ಪೊಲೀಸ್ ಕಸ್ಟಡಿಗೆ ತೆಗೆದುಕೊಳ್ಳಲಾಗಿದೆ.
ವೈವಾಹಿಕ ಸ್ಥಿತಿ
ಸುಲಭವಾಗಿ ನಂಬುವ ಹಾಗೂ ಮ್ಯಾಟ್ರಿಮೋನಿಯಲ್ ವೆಬ್ಸೈಟ್ನಲ್ಲಿ ವರನಿಗಾಗಿ ಹುಡುಕಾಡ ನಡೆಸುವ ಮಹಿಳೆಯರೇ ಅಶನ್ ಸೈಫಿಯ ಟಾರ್ಗೆಟ್. ಅಶನ್ ಕಾರ್ಪೆಂಟರ್ ಆಗಿ ಕೆಲಸ ಮಾಡುತ್ತಿದ್ದ. ಅಲ್ಲದೆ, ಸಾಮಾಜಿಕ ಜಾಲತಾಣದಲ್ಲಿಯು ಸಕ್ರಿಯನಾಗಿದ್ದ. ಮ್ಯಾಟ್ರಿಮೋನಿಯಲ್ ವೆಬ್ಸೈಟ್ನಲ್ಲಿ ಖಾತೆ ತೆರೆದು ಮಹಿಳೆಯರಿಗೆ ಗಾಳ ಹಾಕುತ್ತಿದ್ದ.
ಇದೇ ವೆಬ್ಸೈಟ್ ಮೂಲಕ ಮುಂಬೈ ನಿವಾಸಿ ನಜ್ನೀನ್ನನ್ನು ಭೇಟಿಯಾಗಿದ್ದ ಅಶನ್ ಆಕೆಯನ್ನು ನಂಬಿಸಿ ಮದುವೆ ಆಗಿದ್ದ. ಆದರೆ, ತನ್ನ ಮೊದಲ ಮದುವೆ ಬಗ್ಗೆ ಆಕೆಗೆ ತಿಳಿಸಿರಲಿಲ್ಲ. ಮದುವೆ ಬಳಿಕ ಪಾಣಿಪತ್ಗೆ ಸ್ಥಳಾಂತರವಾಗಿದ್ದ. ಇದೇ ವೇಳೆ ಈತ ಉತ್ತರ ಪ್ರದೇಶದ ಮುಜಾಫರ್ನಗರದಲ್ಲಿ ಮೂರು ಮಕ್ಕಳೊಂದಿಗೆ ವಾಸವಿರುವ ಮೊದಲ ಪತ್ನಿಯ ಮನೆಗೂ ಭೇಟಿ ನೀಡಿದ್ದ.
ಈ ವಿಚಾರ ನಜ್ನೀನ್ಗೆ ಗೊತ್ತಾದಾಗ ಮೊದಲ ಪತ್ನಿಯನ್ನು ನೋಡಲು ನಜ್ನೀನ್ ಒಪ್ಪಲಿಲ್ಲ. ಇದು ಇಬ್ಬರ ಸಂಬಂಧವನ್ನು ಹಂತ ಹಂತವಾಗಿ ಹಾಳುಗೆಡವಿತು. 2016ರಲ್ಲಿ ಕೊಲೆ ಮಾಡಲು ನಿರ್ಧಾರ ಮಾಡಿದ ಅಶನ್, ತನ್ನ ಸಂಚಿನಂತೆ ಮೂವರಿಗೂ ವಿಷವುಣಿಸಿದ್ದ. ಬಳಿಕ ಮನೆಯಲ್ಲಿ ಹಳ್ಳ ತೆಗೆದು ಮೃತದೇಹಗಳನ್ನು ಹೂತಿಟ್ಟಿದ್ದ. ಬಳಿಕ ಮನೆಯನ್ನು ಪವನ್ ಎಂಬುವರಿಗೆ ಮಾರಿದ್ದ.
ಸದ್ಯ ಪತ್ನಿ ನಜ್ನೀನ್ (35), ಮಗ ಸೊಹೈಲ್ (14) ಮತ್ತು ನಜ್ನೀನ್ ಸಂಬಂಧಿ ಶಬೀರ್ (15)ನನ್ನು ಕೊಲೆ ಮಾಡಿದ್ದಾಗಿ ಒಪ್ಪಿಕೊಂಡಿದ್ದಾನೆ. ಕೊಲೆ ಬಳಿಕವೂ ಅಶನ್ ಮೂರನೇ ಮದುವೆ ಆಗಿದ್ದಾನೆ. ಮೂರನೇ ಪತ್ನಿಯೊಂದಿಗೆ ಉತ್ತರ ಪ್ರದೇಶದ ಭದೋಹಿಯಲ್ಲಿ ನೆಲೆಸಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ. (ಏಜೆನ್ಸೀಸ್)