ನವದೆಹಲಿ: ತಂತ್ರಜ್ಞಾನ ಮತ್ತು ಡಿಜಿಟಲ್ ಪಾವತಿ ವ್ಯವಸ್ಥೆಗಳು ಅಪರಾಧಗಳನ್ನು ತಡೆಯಲು ಮತ್ತು ಅಪರಾಧಿಗಳನ್ನು ಸೆರೆಹಿಡಿಯಲು ಎಷ್ಟು ಸಹಕಾರಿ ಎಂಬುದಕ್ಕೆ ಈ ಘಟನೆ ಒಂದು ಅತ್ಯುತ್ತಮ ಉದಾಹರಣೆಯಾಗಿದೆ. ತ್ವರಿತವಾಗಿ ಯೋಚಿಸಿದ ದೆಹಲಿ ಪೊಲೀಸರು ಹಾಗೂ ಯುಪಿಐ ( UPI Transfer ) ವ್ಯವಸ್ಥೆಯ ‘ಡಿಜಿಟಲ್ ಸುಳಿವು’ ಬಳಸಿಕೊಂಡು, ಅಪಹರಣಕ್ಕೊಳಗಾಗಿದ್ದ 13 ವರ್ಷದ ಬಾಲಕನನ್ನು ಕೇವಲ ಮೂರೇ ಮೂರು ಗಂಟೆಗಳಲ್ಲಿ ಸುರಕ್ಷಿತವಾಗಿ ರಕ್ಷಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಈ ಇಡೀ ಕಾರ್ಯಾಚರಣೆಯು ದೆಹಲಿ ಕರಾವಾಳ್ ನಗರದ ಕಿರಿದಾದ ಸಂದಿಯೊಂದರಲ್ಲಿ ನಡೆದಿದ್ದು, ಸೈಬರ್ ಕೆಫೆಯ ಮಾಲೀಕನ ಸಹಕಾರ ಹಾಗೂ ಪೊಲೀಸರ ಜಾಣ ನಡೆಯಿಂದ ಅಪಹರಣಕಾರನನ್ನು ಸ್ಥಳದಲ್ಲೇ ಹೆಡೆಮುರಿಕಟ್ಟಲಾಗಿದೆ.
ಈ ರೋಚಕ ಘಟನೆಯು ಅಕ್ಟೋಬರ್ 30 ರಂದು ಶುರುವಾಯಿತು. ದೆಹಲಿಯ ಶಾಹದಾರಾ ಪ್ರದೇಶದ ಜ್ಯೋತಿ ನಗರ ಪೊಲೀಸ್ ಠಾಣೆಗೆ ಧಾವಿಸಿದ ತಾಯಿಯೊಬ್ಬರು, ಅಂಗಡಿಗೆ ಸಾಮಗ್ರಿ ತರಲು ಹೋದ ತಮ್ಮ 13 ವರ್ಷದ ಮಗ ಮನೆಗೆ ಮರಳಿ ಬಂದಿಲ್ಲ ಎಂದು ಕಣ್ಣೀರುತ್ತಾ ದೂರು ನೀಡಿದರು. ಅಷ್ಟರಲ್ಲಾಗಲೇ ಅಪರಿಚಿತ ವ್ಯಕ್ತಿಯೊಬ್ಬ ಆಕೆಗೆ ಕರೆ ಮಾಡಿ, ಬಾಲಕನ ಬಿಡುಗಡೆಗಾಗಿ 40,000 ರೂ. ಹಣ ನೀಡುವಂತೆ ಬೆದರಿಕೆ ಹಾಕಿದ್ದನು. ದೂರು ದಾಖಲಿಸಿಕೊಳ್ಳುತ್ತಿದ್ದಂತೆಯೇ ತಕ್ಷಣವೇ ಕಾರ್ಯಪ್ರವೃತ್ತರಾದ ಪೊಲೀಸರು, ಮಗುವನ್ನು ಹುಡುಕಲು ಮತ್ತು ಅಪರಾಧಿಯನ್ನು ಬಂಧಿಸಲು ವಿಶೇಷ ತನಿಖಾ ತಂಡವನ್ನು ರಚಿಸಿ ಕಾರ್ಯಾಚರಣೆ ಆರಂಭಿಸಿದರು.
ತನಿಖೆ ನಡೆಯುತ್ತಿದ್ದಂತೆಯೇ, ಅಪಹರಣಕಾರನು ಬಾಲಕನ ತಾಯಿಗೆ ಮತ್ತೆ ಕರೆ ಮಾಡಿ ಹಣವನ್ನು ಯುಪಿಐ ಮೂಲಕವೇ ಕಳುಹಿಸುವಂತೆ ಪಟ್ಟು ಹಿಡಿದು ಒಂದು ಕ್ಯೂಆರ್ ಬಾರ್‌ಕೋಡ್ (QR Code) ಹಂಚಿಕೊಂಡನು. ಇದನ್ನು ತಕ್ಷಣವೇ ಗ್ರಹಿಸಿದ ಪೊಲೀಸರು, ತಮ್ಮ ಸಿಬ್ಬಂದಿಯೊಬ್ಬರ ಖಾತೆಯಿಂದ ರೂ. 5,000 ಹಣವನ್ನು ಆ ಬಾರ್‌ಕೋಡ್‌ಗೆ ವರ್ಗಾಯಿಸಿ ಟ್ರಾನ್ಸಾಕ್ಷನ್ ಜಾಡು ಹಿಡಿದರು. ತಾಂತ್ರಿಕ ಕಣ್ಗಾವಲಿನ ಆಧಾರದ ಮೇಲೆ, ಈ ಹಣವು ಕರಾವಾಳ್ ನಗರದಲ್ಲಿದ್ದ ಒಂದು ಸೈಬರ್ ಕೆಫೆಯ ಖಾತೆಗೆ ತಲುಪಿರುವುದು ಪತ್ತೆಯಾಯಿತು. ತಕ್ಷಣ ಕೆಫೆಗೆ ಭೇಟಿ ನೀಡಿದ ಪೊಲೀಸರು ಕೆಫೆ ಮಾಲೀಕನನ್ನು ವಿಚಾರಿಸಿದಾಗ, ಒಬ್ಬ ವ್ಯಕ್ತಿಯು ಬಾಲಕನೊಂದಿಗೆ ಬಂದು ರೂ. 50 ಕಮಿಷನ್ ನೀಡಿ ರೂ. 5,000 ನಗದಾಗಿ ಪಡೆದುಕೊಂಡಿದ್ದ ವಿಷಯ ತಿಳಿದುಬಂತು.
ಬಳಿಕ ಸೈಬರ್ ಕೆಫೆಯ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ, ಕಾಣೆಯಾಗಿದ್ದ ಬಾಲಕನನ್ನು ಆತನ ತಾಯಿ ಗುರುತಿಸಿದರು. ಅಪಹರಣಕಾರನನ್ನು ಸೆರೆಹಿಡಿಯಲು ಪೊಲೀಸರು ಮತ್ತೊಂದು ಜಾಣತನದ ತಂತ್ರ ಹೂಡಿದರು. ಅದೇ ಬಾರ್‌ಕೋಡ್‌ಗೆ ಮತ್ತೊಮ್ಮೆ ರೂ. 5,000 ವರ್ಗಾಯಿಸಿ, ಹಣ ಸ್ವೀಕರಿಸಲು ಅಪಹರಣಕಾರನನ್ನು ಮತ್ತೆ ಸೈಬರ್ ಕೆಫೆಗೆ ಬರುವಂತೆ ಆಮಿಷ ಒಡ್ಡಲಾಯಿತು. ಹಣ ಬಂದಿರುವ ವಿಷಯ ತಿಳಿದು, ಅಪಹರಣಕಾರನು ಬಾಲಕನೊಂದಿಗೆ ಸೈಬರ್ ಕೆಫೆಗೆ ನಗದು ಪಡೆಯಲು ಮರಳಿ ಬಂದಾಗ, ಕೆಫೆ ಮಾಲೀಕನ ನೆರವಿನಿಂದ ಪೊಲೀಸರು ಆತನನ್ನು ಕ್ಷಣಾರ್ಧದಲ್ಲಿ ಸುತ್ತುವರಿದು ಬಂಧಿಸಿದರು ಹಾಗೂ ಬಾಲಕನನ್ನು ಸುರಕ್ಷಿತವಾಗಿ ಮೀಟಿದರು.
ಬಂಧಿತ ಅಪಹರಣಕಾರನನ್ನು ಆಕಾಶ್ ಎಂದು ಗುರುತಿಸಲಾಗಿದ್ದು, ಈತ ಸಾದರ್ ಬಜಾರ್‌ನಲ್ಲಿ ಡೆಲಿವರಿ ಹೆಲ್ಪರ್ ಆಗಿ ಕೆಲಸ ಮಾಡುತ್ತಿದ್ದನು. ಬಾಲಕನ ಸೋದರಸಂಬಂಧಿಯ ಮೂಲಕ ಆತನಿಗೆ ಪರಿಚಯವಿದ್ದ ಈತ, ಸ್ಕೂಟರ್‌ನಲ್ಲಿ ಬಾಲಕನನ್ನು ಕರೆದುಕೊಂಡು ಹೋಗಿ ಅಪಹರಿಸಿದ್ದಾಗಿ ವಿಚಾರಣೆ ವೇಳೆ ಒಪ್ಪಿಕೊಂಡಿದ್ದಾನೆ. ಪೊಲೀಸರು ಆತನಿಂದ ರೂ. 5,000 ನಗದು, ಕರೆ ಮಾಡಲು ಬಳಸಿದ್ದ ಮೊಬೈಲ್ ಫೋನ್ ಹಾಗೂ ಕೃತ್ಯಕ್ಕೆ ಬಳಸಿದ್ದ ಸ್ಕೂಟರ್ ಅನ್ನು ವಶಪಡಿಸಿಕೊಂಡಿದ್ದಾರೆ. ಯಾವುದೇ ಹಳೆಯ ಅಪರಾಧ ಹಿನ್ನೆಲೆ ಇಲ್ಲದ ಈ ಆರೋಪಿಯು ಏಕಾಂಗಿಯಾಗಿ ಈ ಕೃತ್ಯ ಎಸಗಿದ್ದಾನೋ ಅಥವಾ ಬೇರೆ ಯಾರಾದರೂ ಭಾಗಿಯಾಗಿದ್ದಾರೋ ಎಂಬ ಬಗ್ಗೆ ಪೊಲೀಸರು ತನಿಖೆ ಮುಂದುವರಿಸಿದ್ದು, ರಕ್ಷಿಸಲ್ಪಟ್ಟ ಬಾಲಕನನ್ನು ಕುಟುಂಬಕ್ಕೆ ಹಸ್ತಾಂತರಿಸಲಾಗಿದೆ, (ಏಜೆನ್ಸೀಸ್).