ನವದೆಹಲಿ: ದೇಶದ ಅತ್ಯುನ್ನತ ಮತ್ತು ಪ್ರತಿಷ್ಠಿತ ನಾಗರಿಕ ಸೇವಾ ಪರೀಕ್ಷೆಗಳನ್ನು ನಡೆಸುವ ಯೂನಿಯನ್ ಪಬ್ಲಿಕ್ ಸರ್ವಿಸ್ ಕಮಿಷನ್ ( UPSC ) ಇಂದಿಗೆ ತನ್ನ ಸಾರ್ಥಕ ಹಾಗೂ ಐತಿಹಾಸಿಕ 100 ವರ್ಷಗಳನ್ನು ಯಶಸ್ವಿಯಾಗಿ ಪೂರೈಸಿದೆ. ಈ ಶತಮಾನೋತ್ಸವದ ಸಂಭ್ರಮದಲ್ಲಿರುವ ಯುಪಿಎಸ್ಸಿ, ಕೇವಲ ಒಂದು ನೇಮಕಾತಿ ಸಂಸ್ಥೆಯಾಗಿ ಮಾತ್ರವಲ್ಲದೆ ಕೋಟ್ಯಂತರ ಯುವಕರ ಭವಿಷ್ಯ ರೂಪಿಸುವ ಮತ್ತು ದೇಶದ ಆಡಳಿತ ಯಂತ್ರಕ್ಕೆ ಸಮರ್ಥ ಪ್ರತಿಭೆಗಳನ್ನು ಒದಗಿಸುವ ಮಹತ್ವದ ಕೊಂಡಿಯಾಗಿ ಹೊರಹೊಮ್ಮಿದೆ.
ಕಳೆದ ಏಳು ದಶಕಗಳಲ್ಲಿ ಆಯೋಗದ ಕಾರ್ಯವ್ಯಾಪ್ತಿ ಮತ್ತು ಜನಪ್ರಿಯತೆ ಎಷ್ಟು ಪ್ರಮಾಣದಲ್ಲಿ ಬೆಳೆದು ನಿಂತಿದೆ ಎಂಬುದಕ್ಕೆ ಸ್ಪಷ್ಟ ಉದಾಹರಣೆಯೆಂಬಂತೆ, ಯುಪಿಎಸ್ಸಿ ಪರೀಕ್ಷೆಗಳಿಗೆ ಅರ್ಜಿ ಸಲ್ಲಿಸುವವರ ಸಂಖ್ಯೆಯು 1950-51ರಲ್ಲಿದ್ದ ಕೇವಲ 42 ಸಾವಿರದಿಂದ 2022-23ರ ವೇಳೆಗೆ ಬರೋಬ್ಬರಿ 45 ಲಕ್ಷಕ್ಕೂ ಅಧಿಕ ಗಡಿ ದಾಟಿ ನೂರಾರು ಪಟ್ಟು ಹೆಚ್ಚಳ ಕಂಡಿದೆ ಎಂದು ಪಿಐಬಿ ವರದಿ ಸ್ಪಷ್ಟಪಡಿಸಿದೆ.
ಯೂನಿಯನ್ ಪಬ್ಲಿಕ್ ಸರ್ವಿಸ್ ಕಮಿಷನ್ (UPSC) ತನ್ನ ಅಸ್ತಿತ್ವದ ನೂರು ವರ್ಷಗಳನ್ನು ಪೂರೈಸಿರುವ ಈ ವಿಶೇಷ ಸಂದರ್ಭದಲ್ಲಿ ದೇಶಾದ್ಯಂತ ಸಂಭ್ರಮ ಮನೆ ಮಾಡಿದೆ. ಈ ಐತಿಹಾಸಿಕ ಮೈಲಿಗಲ್ಲಿನ ಕುರಿತು ಸಾಮಾಜಿಕ ಜಾಲತಾಣವಾದ 'ಎಕ್ಸ್'ನಲ್ಲಿ (X) ವಿಶೇಷ ಸಂದೇಶ ಹಂಚಿಕೊಂಡಿರುವ ಪ್ರಧಾನಿ ನರೇಂದ್ರ ಮೋದಿ ಅವರು, ಇಂದಿನ ಈ ದಿನವು ಯುಪಿಎಸ್‌ಸಿಯ 100ನೇ ವರ್ಷದ ಆಚರಣೆಯ ಜತೆಗೆ, ಒಂದು ಶ್ರೇಷ್ಠ ಪರಂಪರೆಯ ಆಚರಣೆಯೂ ಹೌದು ಎಂದು ಬಣ್ಣಿಸಿದ್ದಾರೆ. ನೂರು ವರ್ಷಗಳ ಸುದೀರ್ಘ ಪಯಣದಲ್ಲಿ ಅರ್ಹತೆಯನ್ನು ಗುರುತಿಸುವುದು, ನ್ಯಾಯಸಮ್ಮತತೆಯನ್ನು ಎತ್ತಿಹಿಡಿಯುವುದು ಹಾಗೂ ಅವಕಾಶಗಳು ಯಾವುದೇ ಭಾಷೆ, ಭೌಗೋಳಿಕತೆ ಅಥವಾ ಸೌಲಭ್ಯಗಳ ಗಡಿಗಳನ್ನು ಮೀರಿ ತಲುಪುವಂತೆ ಮಾಡುವಲ್ಲಿ ಆಯೋಗವು ಯಶಸ್ವಿಯಾಗಿದೆ ಎಂದು ಕೇಂದ್ರ ಸರ್ಕಾರ ಸ್ಮರಿಸಿದೆ.
ಪ್ರೆಸ್ ಇನ್ಫರ್ಮೇಷನ್ ಬ್ಯೂರೋ (PIB) ಬಿಡುಗಡೆ ಮಾಡಿರುವ ವರದಿಯ ಪ್ರಕಾರ, ಯುಪಿಎಸ್ಸಿ ನಿರ್ವಹಿಸುವ ಕೆಲಸಗಳ ಪ್ರಮಾಣ ಮತ್ತು ಸಂಕೀರ್ಣತೆ ವರ್ಷದಿಂದ ವರ್ಷಕ್ಕೆ ಗಣನೀಯವಾಗಿ ಹೆಚ್ಚಾಗಿದೆ. 1950-51ರಲ್ಲಿ ವಿವಿಧ ಪರೀಕ್ಷೆಗಳು ಮತ್ತು ನೇಮಕಾತಿಗಳಿಗೆ ಸಲ್ಲಿಕೆಯಾಗುತ್ತಿದ್ದ ಒಟ್ಟು ಅರ್ಜಿಗಳ ಸಂಖ್ಯೆ ಕೇವಲ 42,727 ಮಾತ್ರವಿತ್ತು. ಆದರೆ 2022-23ರ ಸಾಲಿನಲ್ಲಿ ಇದು ನೂರಕ್ಕೂ ಹೆಚ್ಚು ಪಟ್ಟು ಅಧಿಕಗೊಂಡು ಬರೋಬ್ಬರಿ 45,10,044 ಅರ್ಜಿಗಳಿಗೆ ತಲುಪಿದೆ. ಉದಾಹರಣೆಗೆ 2022-23ರಲ್ಲಿ ಆಯೋಗವು 15 ಪ್ರಮುಖ ಪರೀಕ್ಷೆಗಳನ್ನು ನಡೆಸುವ ಮೂಲಕ 33,51,916 ಅರ್ಜಿಗಳನ್ನು ಸ್ವೀಕರಿಸಿದ್ದರೆ, ನೇಮಕಾತಿ ಆಯ್ಕೆ ಪ್ರಕ್ರಿಯೆಯಲ್ಲಿ 233 ಬೇಡಿಕೆಗಳ ಮೂಲಕ 4,411 ಹುದ್ದೆಗಳಿಗೆ ಬರೋಬ್ಬರಿ 11,58,128 ಅರ್ಜಿಗಳನ್ನು ಪಡೆದುಕೊಂಡಿದೆ.
ಕೇವಲ ಆಕಾಂಕ್ಷಿಗಳ ಸಂಖ್ಯೆಯಲ್ಲಿ ಮಾತ್ರವಲ್ಲದೆ, ಆಡಳಿತಾತ್ಮಕವಾಗಿ ಯುಪಿಎಸ್‌ಸಿಯ ಮೂಲಸೌಕರ್ಯಗಳೂ ಕೂಡ ಅಗಾಧವಾಗಿ ವಿಸ್ತರಣೆಗೊಂಡಿವೆ. ದೇಶದ ಮೂಲೆಮೂಲೆಯಲ್ಲಿರುವ ವಿದ್ಯಾರ್ಥಿಗಳಿಗೆ ಪರೀಕ್ಷೆ ಬರೆಯಲು ಅನುಕೂಲವಾಗುವಂತೆ ಪರೀಕ್ಷಾ ಕೇಂದ್ರಗಳ ಸಂಖ್ಯೆಯನ್ನು ತೀವ್ರವಾಗಿ ಹೆಚ್ಚಿಸಲಾಗಿದೆ. ಅಧಿಕೃತ ಮಾಹಿತಿಯ ಪ್ರಕಾರ, 1950ರಲ್ಲಿ ದೇಶದಾದ್ಯಂತ ಕೇವಲ 8 ಪರೀಕ್ಷಾ ಕೇಂದ್ರಗಳು ಮಾತ್ರ ಲಭ್ಯವಿದ್ದವು. ಆದರೆ ಆಕಾಂಕ್ಷಿಗಳ ಹೆಚ್ಚುತ್ತಿರುವ ಬೇಡಿಕೆಗೆ ತಕ್ಕಂತೆ ವ್ಯವಸ್ಥೆಯನ್ನು ಸುಧಾರಿಸಿರುವ ಆಯೋಗವು, 2026ರ ವೇಳೆಗೆ ದೇಶಾದ್ಯಂತ ಬರೋಬ್ಬರಿ 86 ಪರೀಕ್ಷಾ ಕೇಂದ್ರಗಳನ್ನು ಯಶಸ್ವಿಯಾಗಿ ನಿರ್ವಹಿಸುತ್ತಿದೆ.
ಯುಪಿಎಸ್‌ಸಿಯ ಈ ಶತಮಾನದ ಪಯಣದಲ್ಲಿ ಮತ್ತೊಂದು ಗಮನಾರ್ಹ ಬದಲಾವಣೆಯೆಂದರೆ ನಾಗರಿಕ ಸೇವೆಗಳಲ್ಲಿ ಮಹಿಳೆಯರ ಸಬಲೀಕರಣ ಮತ್ತು ಸಾಧನೆ. 1952ರಲ್ಲಿ ನಾಗರಿಕ ಸೇವೆಗಳಲ್ಲಿ ಶಿಫಾರಸುಗೊಂಡ ಒಟ್ಟು ಅಭ್ಯರ್ಥಿಗಳಲ್ಲಿ ಕೇವಲ 3 ಮಹಿಳೆಯರು (83 ಮಂದಿಯಲ್ಲಿ) ಮಾತ್ರ ಇದ್ದರು. ಆದರೆ ಕಾಲ ಬದಲಾದಂತೆ ಈ ಚಿತ್ರಣ ಸಂಪೂರ್ಣ ಬದಲಾಗಿದ್ದು, 2025ರ ಸಿವಿಲ್ ಸರ್ವೀಸ್ ಪರೀಕ್ಷೆಯಲ್ಲಿ ಶಿಫಾರಸುಗೊಂಡ 958 ಅಭ್ಯರ್ಥಿಗಳ ಪೈಕಿ ಬರೋಬ್ಬರಿ 299 ಮಂದಿ ಮಹಿಳೆಯರು ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ವಿಶೇಷವಾಗಿ 2025ರ ಪರೀಕ್ಷೆಯಲ್ಲಿ ಮಹಿಳೆಯರು ಶೇ. 31.2ರಷ್ಟು ಪ್ರಾತಿನಿಧ್ಯ ಪಡೆದುಕೊಂಡಿರುವುದಲ್ಲದೆ, ಅಗ್ರ 25 ರ‍್ಯಾಂಕ್‌ಗಳ ಪೈಕಿ 11 ಸ್ಥಾನಗಳನ್ನು ತಮ್ಮದಾಗಿಸಿಕೊಂಡು ಇತಿಹಾಸ ಸೃಷ್ಟಿಸಿದ್ದಾರೆ,(ಏಜೆನ್ಸೀಸ್).