ಲಖನೌ: ಕೊಲೆ ಪ್ರಕರಣದಡಿ 9 ವರ್ಷಗಳ ಕಾಲ ಜೈಲುವಾಸ ಅನುಭವಿಸಿದ 45 ವರ್ಷ ವಯಸ್ಸಿನ ಅಪರಾಧಿಯೊಬ್ಬ ಇನ್ನೇನು ಜೈಲಿನಿಂದ ಮುಕ್ತಿ ಪಡೆಯುವ ದಿನ ಹತ್ತಿರವಾಗುತ್ತಿದ್ದಂತೆ ಬಹಳ ಖುಷಿಯಿಂದ ತನ್ನ ಮಗಳ ಜತೆ ಹೊಸ ಜೀವನ ಕಟ್ಟಿಕೊಳ್ಳಬೇಕೆಂದು ಎದುರುನೋಡುತ್ತಿರುವಾಗಲೇ ಕಂಡಿದ್ದು ಮಾತ್ರ ದುರಂತ ಅಂತ್ಯ. 9 ವರ್ಷಗಳು ಜೈಲು ಕಂಬಿ ಎಣಿಸಿದ ವ್ಯಕ್ತಿಗೆ ಶಿಕ್ಷೆ ಅವಧಿ ಮುಕ್ತಾಯಗೊಂಡಿತ್ತು. ಅದರಂತೆಯೇ ಜೈಲಿನಿಂದ ಹೊರಬಂದು ಮಗಳನ್ನು ತಬ್ಬಿಕೊಂಡವ ಮನೆ ತಲುಪುವ ವೇಳೆ ಪುತ್ರಿಯೊಂದಿಗೆ ಶವವಾಗಿ ಹೋಗಿರುವುದು ನಿಜಕ್ಕೂ ದುರಂತ ಸಾವು ಎನ್ನಬಹುದು. ಈ ಘಟನೆ ಉತ್ತರಪ್ರದೇಶದ ಲಖನೌನಲ್ಲಿ ಸಂಭವಿಸಿದೆ.
ಜೈಲಿನಿಂದ ಹೊರಬಂದ ವ್ಯಕ್ತಿಯನ್ನು ಕನೌಜ್ ಜಿಲ್ಲೆಯ ವಿಜಯ್ ಕುಮಾರ್ ಎಂದು ಗುರುತಿಸಲಾಗಿದ್ದು, ಮಗಳು, ಪತ್ನಿಯ ಜತೆ ಮನೆಗೆ ಆಟೋ ರಿಕ್ಷಾದಲ್ಲಿ ಹೋಗುತ್ತಿದ್ದ ವೇಳೆ ಎಸ್ಯುವಿ ಕಾರೊಂದು ಡಿಕ್ಕಿ ಹೊಡೆದ ಪರಿಣಾಮ ಅಪ್ಪ-ಮಗಳು ಅಪಘಾತದಲ್ಲಿ ಸಾವಿಗೀಡಾಗಿದ್ದಾರೆ. ಲಖನೌ-ಆಗ್ರಾ ಎಕ್ಸ್ಪ್ರೆಸ್ ವೇ ಮಾರ್ಗದಲ್ಲಿ ಸಾಗುತ್ತಿದ್ದ ಆಟೋಗೆ ವೇಗದಲ್ಲಿ ಬಂದ ಕಾರೊಂದು ರಭಸವಾಗಿ ಡಿಕ್ಕಿ ಹೊಡೆದಿದೆ. ಅಪಘಾತದಲ್ಲಿ ವಿಜಯ್ ಮತ್ತು ಅವರ ಪುತ್ರಿ ಸಾವನ್ನಪ್ಪಿದರೆ, ಪತ್ನಿ ಹಾಗೂ ಆಟೋ ಚಾಲಕ ಗಂಭೀರವಾಗಿ ಗಾಯಗೊಂಡಿದ್ದಾರೆ.
2012ರ ಮೇ ತಿಂಗಳಲ್ಲಿ ಕನೌಜ್ನಲ್ಲಿ ವ್ಯಕ್ತಿಯೊಬ್ಬನ ಮೇಲೆ ಗುಂಡು ಹಾರಿಸಿದ ಪ್ರಕರಣದಲ್ಲಿ ವಿಜಯ್ ಕುಮಾರ್ಗೆ ಜೀವಾವಧಿ ಶಿಕ್ಷೆ ವಿಧಿಸಲಾಗಿತ್ತು. ಕಠಿಣ ಶಿಕ್ಷೆಯನ್ನು ಅನುಭವಿಸುತ್ತಿದ್ದ ಮೃತ ವಿಜಯ್ಗೆ ನ್ಯಾಯಾಲಯ ಇತ್ತೀಚೆಗಷ್ಟೇ ಜೈಲುವಾಸ ಅಂತ್ಯಗೊಳಿಸಿತ್ತು. ಮಗಳು, ಪತ್ನಿಯೊಂದಿಗೆ ಹೊಸ ಬದುಕನ್ನು ಕಟ್ಟಿಕೊಳ್ಳುವ ಬಯಕೆಯಿಂದ ಹೊರಬಂದ ವ್ಯಕ್ತಿ ದುರಂತ ಅಂತ್ಯ ಕಂಡಿದ್ದು ಅನೇಕರಲ್ಲಿ ಭಾರೀ ಅಚ್ಚರಿ ಮೂಡಿಸಿದೆ,(ಏಜೆನ್ಸೀಸ್).