ಚಿಕ್ಕಮಗಳೂರು: ಕೊಂಬೆ ಕಡಿಯಲು ಹೋದ ವ್ಯಕ್ತಿಯೊಬ್ಬ ಮರದಲ್ಲಿ ಕುಳಿತಲ್ಲೇ ಹೆಣವಾದ ಪ್ರಕರಣವೊಂದು ನಡೆದಿದೆ. ಚಿಕ್ಕಮಗಳೂರು ಜಿಲ್ಲೆಯ ಹುಯಿಲುಮನೆಯಲ್ಲಿ ಇಂಥದ್ದೊಂದು ಪ್ರಕರಣ ನಡೆದಿದೆ.
ಮೂಡಿಗೆರೆ ತಾಲೂಕಿನ ಹುಯಿಲುಮನೆ ಗ್ರಾಮದಲ್ಲಿ ಈ ಪ್ರಕರಣ ನಡೆದಿದ್ದು, ಲೋಕಪ್ಪ ಗೌಡ (56) ಎಂಬ ವ್ಯಕ್ತಿ ಸಾವಿಗೀಡಾಗಿದ್ದಾನೆ. ಈತ ಕೊಂಬೆ ಕಡಿಯಲು ಮರವೊಂದನ್ನು ಏರಿದ್ದಾಗ ಈ ಅವಘಡ ಸಂಭವಿಸಿದೆ. ಕಡಿಯುತ್ತಿದ್ದ ಕೆಲವೇ ಕ್ಷಣಗಳಲ್ಲಿ ಮರದ ಮೇಲೆ ಕುಳಿತಲ್ಲೇ ಸಾವು ಬಂದೆರಗಿದೆ.
ವಿದ್ಯುತ್ ತಂತಿಗೆ ಮರದ ಕೊಂಬೆಗಳು ತಗುಲುತ್ತವೆ ಎಂದು ಕಡಿಯಲು ಹೋದ ಈ ವ್ಯಕ್ತಿ ಅದೇ ಮರದ ಮೇಲೆಯೇ ವಿದ್ಯುತ್ ಪ್ರವಾಹಕ್ಕೆ ಸಿಲುಕಿ ಮೃತಪಟ್ಟಿದ್ದಾನೆ. ಕೊಂಬೆಗಳನ್ನು ಕಡಿಯುತ್ತಿದ್ದಾಗ ವಿದ್ಯುತ್ ಪ್ರವಹಿಸುತ್ತಿದ್ದ ತಂತಿಗೆ ಕೊಂಬೆ ತಗುಲಿದ್ದು, ಲೋಕಪ್ಪ ಗೌಡಗೆ ಯಾವ ಪರಿಯಲ್ಲಿ ಶಾಕ್ ಹೊಡೆದಿತ್ತೆಂದರೆ ಆತ ಕುಳಿತಲ್ಲೇ ಹೆಣವಾಗಿ ಹೋಗಿದ್ದ. ಬಾಳೂರು ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಈ ಘಟನೆ ನಡೆದಿದ್ದು, ಸ್ಥಳಕ್ಕೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.