ನವದೆಹಲಿ : ರಾಷ್ಟ್ರದ ರಾಜಧಾನಿ ದೆಹಲಿಯಲ್ಲಿ ಮದ್ಯ ಖರೀದಿಸಲು ಇನ್ನು ಮುಂದೆ 21 ವರ್ಷ ತುಂಬಿದ್ದರೆ ಸಾಕು. ಏಕೆಂದರೆ ಕನಿಷ್ಠ 25 ವರ್ಷ ತುಂಬಿರಬೇಕೆಂದು ಇದ್ದ ಕಾನೂನನ್ನು ಬದಲಿಸಿ ಇದೀಗ 21 ವರ್ಷಕ್ಕೆ ಇಳಿಸಲಾಗಿದೆ ಎಂದು ದೆಹಲಿ ಡೆಪ್ಯುಟಿ ಸಿಎಂ ಮನೀಶ್ ಸಿಸೋಡಿಯಾ ಹೇಳಿದ್ದಾರೆ.
ಮದ್ಯ ಸೇವಿಸಲು 25 ವರ್ಷ ತುಂಬಿರಬೇಕೆಂಬ ಕಾನೂನಿದ್ದ ಆರು ರಾಜ್ಯ ಅಥವಾ ಕೇಂದ್ರಾಡಳಿತ ಪ್ರದೇಶಗಳಲ್ಲಿ ದೆಹಲಿಯೂ ಒಂದಾಗಿತ್ತು. ಇದೀಗ ಆ ಸ್ಥಾನ ಬದಲಾಗಿದೆ. ಈ ಕುರಿತು ಸರ್ಕಾರ ರಚಿಸಿದ್ದ ತಜ್ನರ ಸಮಿತಿಯು ವಯಸ್ಸಿನ ಮಿತಿಯನ್ನು 21 ಕ್ಕೆ ಇಳಿಸಲು ಶಿಫಾರಸು ಮಾಡಿತ್ತು. ಅದರ ಮೇರೆಗೆ ತೆಗೆದುಕೊಂಡಿರುವ ಈ ನಿರ್ಧಾರದಿಂದ ಅಬಕಾರಿ ಇಲಾಖೆಯ ಆದಾಯ ಹೆಚ್ಚಲಿದೆ ಎನ್ನಲಾಗಿದೆ.
ಈ ಬಗ್ಗೆ ಸುದ್ದಿಗಾರರಿಗೆ ತಿಳಿಸಿದ ಸಿಸೋಡಿಯಾ, ದೆಹಲಿಯಲ್ಲಿ ಯಾವುದೇ ಸರ್ಕಾರಿ ಮದ್ಯದಂಗಡಿಗಳಿರುವುದಿಲ್ಲ. ಮತ್ತು ಹೊಸತಾಗಿ ಯಾವ ಮದ್ಯದಂಗಡಿಗೂ ಪರವಾನಗಿ ನೀಡಲಾಗುವುದಿಲ್ಲ ಎಂದೂ ತಿಳಿಸಿದ್ದಾರೆ.
ಮುಂಬೈ ಮತ್ತಿತರ ನಗರಗಳಲ್ಲಿ 25 ವರ್ಷದ ಕೆಳಗಿನವರಿಗೆ ಹಾರ್ಡ್ ಲಿಖರ್ ಮೇಲೆ ನಿಷೇಧವಿದೆಯಾದರೂ 21 ತುಂಬಿದವರಿಗೆ ವೈನ್ ಮತ್ತು ಬೀರ್ ಖರೀದಿಸುವ ಅವಕಾಶವಿದೆ. ಅಮೆರಿಕದ ನ್ಯೂಯಾರ್ಕ್ನಲ್ಲೂ ವಯೋಮಿತಿ 21 ಆಗಿದ್ದು, ಲಂಡನ್ನಲ್ಲಿ 18 ವರ್ಷ ತುಂಬಿದರೆ ಮದ್ಯ ಖರೀದಿಸಬಹುದಾಗಿದೆ. (ಏಜೆನ್ಸೀಸ್)