ಒಂದು ವರ್ಷದ ಹಿಂದಷ್ಟೇ ದಂಪತಿ ಹೊಸ ಕನಸುಗಳೊಂದಿಗೆ ವಿದೇಶಕ್ಕೆ ಕಾಲಿಟ್ಟಿದ್ದರು. ಆದರೆ, ಕರೊನಾ ಸಂಕಷ್ಟ ಪತಿಯ ಉದ್ಯೋಗವನ್ನೇ ಕಸಿದಿತ್ತು. ಆದರೆ, ಅದೃಷ್ಟ ಅವರ ಕೈ ಹಿಡಿದಿದೆ.
ಕೇರಳದ ಕೊಟ್ಟಾಯಂ ಜಿಲ್ಲೆಯ ವೊಲ್ಲೂರಿನ ಶಿಬು ಪೌಲ್ ಹಾಗೂ ಲಿನ್ನೆಟ್ ಜೋಸೆಫ್ ಒಂದು ವರ್ಷದ ಹಿಂದೆ ಬ್ರಿನ್ಗೆ ತೆರಳಿದ್ದರು. ಆರಂಭದಲ್ಲಿ ಕೆಂಬ್ರಿಡ್ಜ್ನಲ್ಲಿ ನೆಲೆಸಿದ್ದ ಅವರು, ಸದ್ಯ ನಾಟಿಂಗ್ಹ್ಯಾಮ್ ನಿವಾಸಿಗಳಾಗಿದ್ದಾರೆ.
ಶಿಬು ಸೌಂಡ್ ಇಂಜಿನಿಯರ್ ಆಗಿದ್ದರೆ, ಪತ್ನಿ ಲಿನ್ನೆಟ್ ನಾಟಿಂಗ್ಹ್ಯಾಮ್ ಸಿಟಿ ಆಸ್ಪತ್ರೆಯಲ್ಲಿ ನರ್ಸ್ ಕೆಲಸ ಮಾಡುತ್ತಿದ್ದಾರೆ. ಕರೊನಾ ಸಂಕಷ್ಟದಿಂದ ಶಿಬು ಕೆಲಸ ಕಳೆದುಕೊಂಡಿದ್ದರು. ಉದ್ಯೋಗ ಅರಸಿ ಕೆಲ ಸಂಸ್ಥೆಗಳಿಗೆ ಸಂದರ್ಶನ ನೀಡಿದ್ದರು. ಅವರಿಂದ ಫೋನ್ ಕರೆಯ ನಿರೀಕ್ಷೆಯಲ್ಲಿದ್ದರು. ಆದರೆ ಅವರಿಗೆ ಅಚ್ಚರಿಯೊಂದು ಕಾದಿತ್ತು.
ಈ ನಡುವೆ, ಬೆಸ್ಟ್ ಆಫ್ ದಿ ಬೆಸ್ಟ್ ಲೈಫ್ಸ್ಟೈಲ್ ಸ್ಪರ್ಧೆಯ ಮೂರು ಟಿಕೆಟ್ಗಳನ್ನು ಅವರ ಖರೀದಿಸಿದ್ದರು. ಸಂಸ್ಥೆಯ ಪ್ರತಿನಿಧಿಯೊಬ್ಬರು ಮನೆ ಬಳಿ ಬಂದು ಅವರಿಗಾಗಿ ಕಾದಿದ್ದರು. ಕೆಳಗಿಳಿದು ಬಂದಾಗ ಲ್ಯಾಂಬೋರ್ಗಿನಿ ಕಾರು ಅಲ್ಲಿತ್ತು. ನಿಮ್ಮ ಖರೀದಿಸಿದ ಟಿಕೆಟ್ಗೆ ಬಂದ ಬಹುಮಾನವಿದು ಎಂದಾಗ ಅವರಿಗೆ ನಂಬಿಕೆಯೇ ಬರಲಿಲ್ಲ.
ಅದಲ್ಲದೇ, ಇನ್ನೊಂದು ಟಿಕೆಟ್ಗೆ 20 ಸಾವಿರ ಪೌಂಡ್ ನಗದು (ಅಂದಾಜು 20 ಲಕ್ಷ ರೂ.) ಬಹುಮಾನ ಬಂದಿದೆ ಎಂದಾಗ ಮತ್ತಷ್ಟು ಅಚ್ಚರಿಗೆ ಒಳಗಾದರು.
ಇದೆಲ್ಲ ದೇವರ ದಯೆ ಎಂದಿರುವ ದಂಪತಿ, 1.85 ಕೋಟಿ ರೂ. ಮೌಲ್ಯದ ಕಾರಿನ ಬದಲು ನಗದು ಬಹುಮಾನವನ್ನೇ ಪಡೆಯಲು ನಿರ್ಧರಿಸಿದ್ದಾರೆ. ನಾಟಿಂಗ್ಹ್ಯಾಮ್ನಲ್ಲಿ ಮನೆ ಖರೀದಿಸುವ ಉದ್ದೇಶ ಹೊಂದಿದ್ದಾರೆ.