ವಿಜಯಪುರ: ಕೋವಿಡ್ 19 ಲಾಕ್ಡೌನ್ ಹಿನ್ನೆಲೆಯಲ್ಲಿ ಒಂದೂವರೆ ತಿಂಗಳು ಮದ್ಯ ಮಾರಾಟಕ್ಕಿದ್ದ ನಿರ್ಬಂಧವನ್ನು ಸರ್ಕಾರಗಳು ಮೇ 4ರಿಂದ ಆರಂಭವಾಗಿರುವ ಲಾಕ್ಡೌನ್ 3.0 ಅವಧಿಯಲ್ಲಿ ಸಡಿಲಗೊಳಿಸಿವೆ. ಇದೀಗ ಕೆಂಪು, ಕಿತ್ತಳೆ ಮತ್ತು ಹಸಿರು ವಲಯಗಳಲ್ಲೂ ಮದ್ಯ ಮಾರಾಟದ ಭರಾಟೆ ಜೋರಾಗಿದೆ.
ಹೀಗಾಗಿ ಮದ್ಯದಂಗಡಿಗಳಿಗೆ ಹೋಗುವ ಮದ್ಯಪ್ರಿಯರು ತಮ್ಮ ಬ್ರ್ಯಾಂಡ್ಗಳ ಮದ್ಯವನ್ನು ಖರೀದಿಸುತ್ತಾರೆ. ಆದರೆ, ಮನೆಯಿಂದ ಹೊರಗೆ ಅಂದರೆ ಬಾರ್ ಮತ್ತು ರೆಸ್ಟೋರೆಂಟ್ಗಳಲ್ಲಿ ಮದ್ಯ ಸೇವಿಸುವ ರೂಢಿ ಹೊಂದಿರುವವರಿಗೆ ಅದನ್ನು ಎಲ್ಲಿ ಸೇವಿಸಬೇಕು ಎಂಬುದೇ ದೊಡ್ಡ ಸಮಸ್ಯೆ ಆಗುತ್ತಿದೆ.
ಇದನ್ನೂ ಓದಿ: ಗಂಡನ ಕೊಂದಳು, ಸಾವಿಗೆ ಕೋವಿಡ್ ಕಾರಣ ಎಂದಳು…!
ಇಂಥ ಸಮಸ್ಯೆ ಹೊಂದಿರುವವರಿಗೆ ರಜೆಯ ನಿಮಿತ್ತ ಕದವಿಕ್ಕಿಕೊಂಡಿದ್ದ ಸರ್ಕಾರಿ ಶಾಲೆ ಆವರಣ, ಮೈದಾನಗಳು ಕುಡಿಯುವ ಅಡ್ಡೆಯಾಗಿ ಮಾರ್ಪಡುತ್ತಿವೆ.
ಅದರಂತೆ, ವಿಜಯಪುರ ಜಿಲ್ಲೆಯ ದೇವರಹಿಪ್ಪರಗಿ ತಾಲೂಕಿನ ಚಿಕ್ಕರೂಗಿ ಗ್ರಾಮದ ಸರ್ಕಾರಿ ಕನ್ನಡ ಪ್ರಾಥಮಿಕ ಶಾಲೆ ಇದೀಗ ಕುಡುಕರಿಗೆ ಅಡ್ಡೆಯಾಗಿ ಮಾರ್ಪಟ್ಟಿದೆ. ಬೆಳಗ್ಗೆಯಿಂದ ಸಂಜೆವರೆಗೆ ಇಲ್ಲಿ ಇಸ್ಪೀಟ್ ಆಡುತ್ತಾ, ಮದ್ಯ ಸೇವಿಸುತ್ತಾ, ಬೀಡಿ-ಸಿಗರೇಟು ಸೇದಿಕೊಂಡು ಪುಂಡ-ಪೋಕರಿಗಳು ಮಸ್ತ್ ಮಜಾ ಮಾಡುತ್ತಿದ್ದಾರೆ!
ಇದೀಗ ಶಾಲೆಗಳು ಪುನರಾರಂಭಗೊಳ್ಳುತ್ತಿವೆ. ಶಿಕ್ಷಕರು ಶಾಲೆಗಳಿಗೆ ಬರಲು ಆರಂಭಿಸಿದ್ದಾರೆ. ಹೀಗಾಗಿ ಕುಡುಕರ ಈ ಹಾವಳಿ ಅವರೆಲ್ಲರಿಗೂ ತೀವ್ರ ಮುಜುಗರವನ್ನುಂಟು ಮಾಡುತ್ತಿದೆ. ಅಸಹಾಯಕರಾದ ಮೇಷ್ಟ್ರುಗಳು ಪೊಲೀಸರಿಗೆ ದೂರು ಕೊಟ್ಟರೆ, ಅವರು ಇತ್ತಕಡೆ ಕಣ್ಣೆತ್ತಿ ನೋಡಲು ನಿರಾಕರಿಸುತ್ತಿದ್ದಾರೆ ಎನ್ನಲಾಗಿದೆ.