ಬೆಂಗಳೂರು: ಪ್ರತಿ ವರ್ಷ ಜೂ. 22ರಂದು ಶ್ರೀ ಶ್ರೀ ರವಿಶಂಕರ್ ದಿನವೆಂದು ಆಚರಿಸುವುದಾಗಿ ಘೋಷಣೆ ಮಾಡಲಾಗಿದೆ. 28 ಅಮೆರಿಕನ್ ಮತ್ತು ಕೆನಡದ ನಗರಗಳ ಲೀಗ್ಗೆ ಸೇರಿರುವ ಅಲ್ಲೆಘೆನಿಯು ಈ ಘೋಷಣೆಯನ್ನು ಮಾಡಿದೆ.
'ಸ್ವಯಂಸೇವಕತೆ ಮತ್ತು ಸಾಮಾಜಿಕ ಉಪಕ್ರಮಗಳ ಮೂಲಕ ನಗರದೊಳಗಿನ ಹಿಂಸಾಚಾರ ಮತ್ತು ಅಪರಾಧಗಳನ್ನು ಕಡಿಮೆ ಮಾಡಲು ಹಾಗು ವೈವಿಧ್ಯಮಯ ಸಮುದಾಯಗಳನ್ನು ಒಂದುಗೂಡಿಸುವ ಪ್ರಯತ್ನಗಳಿಗಾಗಿ' ಜೂನ್ 22 ಶ್ರೀ ಶ್ರೀ ರವಿಶಂಕರ್ ದಿನ ಎಂದು ಘೋಷಿಸಲಾಯಿತು.
ಕೌಂಟಿ ಎಕ್ಸಿಕ್ಯೂಟಿವ್ ರಿಚ್ ಫಿಟ್ಜ್ಗೆರಾಲ್ಡ್ ಅವರು 'ಜಾಗತಿಕ ಮಾನವತಾವಾದಿ, ಆಧ್ಯಾತ್ಮಿಕ ನಾಯಕ ಮತ್ತು ಶಾಂತಿದೂತರಾಗಿ ಅವರನ್ನು ಗೌರವಿಸಲು' ಜೂನ್ 22 ಶ್ರೀ ಶ್ರೀ ರವಿಶಂಕರ್ ದಿನವೆಂದು ಘೋಷಣೆ ಮಾಡಿದರು.
ಸಾಂಸ್ಕೃತಿಕ ವೈವಿಧ್ಯತೆಯ ನಡುವೆ ಸಾಮರಸ್ಯ ಪ್ರತಿಪಾದಿಸುವಲ್ಲಿ ಗುರುದೇವರು ಗಮನಹರಿಸುತ್ತಾರೆ. ಸ್ವಯಂಸೇವಕತೆ ಮತ್ತು ಆಂತರಿಕ ಹಿಂಸಾಚಾರ, ಅಪರಾಧವನ್ನು ಕಡಿಮೆ ಮಾಡಲು ಸಾಮಾಜಿಕ ಉಪಕ್ರಮಗಳ ಮೂಲಕ ವೈವಿಧ್ಯಮಯ ಸಮುದಾಯಗಳನ್ನು ಒಂದುಗೂಡಿಸುವ ಪ್ರಯತ್ನಗಳನ್ನು ಮಾಡಿದ್ದಾರೆ. ಸಂಘರ್ಷದ ಸಮಯದಲ್ಲಿ ಸಂಸ್ಕೃತಿ ಮತ್ತು ಸಮುದಾಯಗಳನ್ನು ಒಟ್ಟಿಗೆ ಸೇರಿಸುವ ಉಪಕ್ರಮಗಳು ಅವರದ್ದಾಗಿವೆ. ಜಾಗತಿಕ ನಾಯಕ ಗುರುದೇವ್ ಅವರು ಸಶಕ್ತ ಸಮುದಾಯಗಳನ್ನು ನಿರ್ಮಿಸಲು ವಿಶ್ವಾದ್ಯಂತ ಹತ್ತು ಲಕ್ಷಕ್ಕಿಂತಲೂ ಹೆಚ್ಚು ಜನರೊಂದಿಗೆ ಸ್ವಯಂಸೇವಕತೆ ಮತ್ತು ಸೇವೆಯ ಅಲೆಯನ್ನು ಪ್ರೇರೇಪಿಸಿದ್ದಾರೆ ಎಂದು ಇದೇ ಸಂದರ್ಭದಲ್ಲಿ ಉಲ್ಲೇಖಿಸಲಾಯಿತು.
ಅವರ ಗೌರವಾರ್ಥ ದಿನಗಳನ್ನು ಆಚರಿಸುವ 25 ನಗರಗಳ ಹೊರತಾಗಿಯೂ ಗುರುದೇವ್ 5 ದೇಶಗಳಿಂದ ಅತ್ಯುನ್ನತ ನಾಗರಿಕ ಗೌರವಗಳನ್ನು, ವಿಶ್ವಾದ್ಯಂತ ಸರ್ಕಾರಗಳಿಂದ 39ಕ್ಕೂ ಹೆಚ್ಚು ಪ್ರಶಂಸನೀಯ ಗೌರವ-ಪ್ರಶಸ್ತಿಗಳನ್ನು ಮತ್ತು 26 ಗೌರವ ಡಾಕ್ಟರೇಟ್ಗಳನ್ನು ತಮ್ಮ ಜಾಗತಿಕ ಮಾನವೀಯ ಕಾರ್ಯಕ್ಕಾಗಿ ಗುರುತಿಸಿಕೊಂಡು ಪ್ರಶಸ್ತಿಗಳಿಗೆ ಭಾಜನರಾಗಿದ್ದಾರೆ.
ವಾಷಿಂಗ್ಟನ್ ಡಿಸಿಯ ನ್ಯಾಷನಲ್ ಮಾಲ್ನಲ್ಲಿ ಸೆ.29 ಮತ್ತು ಅ. 1 ರ ನಡುವೆ ಹಮ್ಮಿಕೊಂಡಿರುವ ವಿಶ್ವ ಸಂಸ್ಕೃತಿ ಉತ್ಸವದ ಮೂಲಕ ಶಾಂತಿ ಮತ್ತು ಸಾಂಸ್ಕೃತಿಕ ವೈವಿಧ್ಯತೆಯ ಆಚರಣೆಗಾಗಿ ಗುರುದೇವ್ ದೊಡ್ಡ ಒಕ್ಕೂಟವನ್ನು ಅದ್ಧೂರಿಯಾಗಿ ಮುನ್ನಡೆಸಲು ಸಿದ್ಧತೆ ಮಾಡಿಕೊಳ್ಳುತ್ತಿದ್ದಾರೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.