ISRO: ಭಾರತದ ಪೋಲಾರ್ ಸ್ಯಾಟಲೈಟ್ ಲಾಂಚ್ ವೆಹಿಕಲ್ (PSLV-C61) ಮಿಷನ್ ಭಾನುವಾರ (ಮೇ 18) ಮುಂಜಾನೆ ಹಿನ್ನಡೆಯನ್ನು ಅನುಭವಿಸಿತು. ಅದರ ಮೂರನೇ ಹಂತದ ಪ್ರೊಪಲ್ಷನ್ ಸಿಸ್ಟಮ್ನಲ್ಲಿನ ತಾಂತ್ರಿಕ ದೋಷದ ಪರಿಣಾಮ ಮೋಡ ಕವಿದ ವಾತಾವರಣ ಹಾಗೂ ರಾತ್ರಿ ವೇಳೆಯೂ ಕಾಣಲು ನೆರವಾಗುವ ಕಣ್ಗಾವಲು ಸಾಮರ್ಥ್ಯದ ಬೇಹುಗಾರಿಕೆ ಉಪಗ್ರಹವಾಗಿರುವ EOS-09 ಉದ್ದೇಶಿತ ಕಕ್ಷೆಗೆ ಸೇರುವಲ್ಲಿ ವಿಫಲವಾಯಿತು.
ಆಂಧ್ರ ಪ್ರದೇಶದ ಶ್ರೀಹರಿಕೋಟಾದಲ್ಲಿರುವ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಇಂದು ಮುಂಜಾನೆ 5.59ಕ್ಕೆ ಉಡಾವಣೆ ಮಾಡಲಾಯಿತು. ಆದರೆ, PS3 ಸಾಲಿಡ್ ರಾಕೆಟ್ ಮೋಟರ್ ಹಂತದಲ್ಲಿ ಪಥದಿಂದ ವಿಮುಖವಾದ ಪರಿಣಾಮ ಇಸ್ರೋ ಕಾರ್ಯಾಚರಣೆಯನ್ನು ಕೊನೆಗೊಳಿಸಬೇಕಾಯಿತು.
1,696 ಕೆಜಿ ತೂಕದ ಇಒಎಸ್-9 ರೇಡಾರ್ ಇಮೇಜಿಂಗ್ ಉಪಗ್ರಹವು ಭೂಮಿಯ ಮೇಲ್ಮೈಯಿಂದ ಉದ್ದೇಶಿತ 524 ಕಿಮೀ ದೂರದ ಸೂರ್ಯ-ಸಿಂಕ್ರೋನಸ್ ಧ್ರುವ ಕಕ್ಷೆಯನ್ನು ತಲುಪಲು ವಿಫಲವಾಗಿದೆ.
ಆರಂಭಿಕ ಟೆಲಿಮೆಟ್ರಿ ದತ್ತಾಂಶವು ಹೈಡ್ರಾಕ್ಸಿಲ್-ಟರ್ಮಿನೇಟೆಡ್ ಪಾಲಿಬ್ಯುಟಾಡೀನ್ (HTPB) ಪ್ರೊಪೆಲ್ಲಂಟ್ ಅನ್ನು ಬಳಸುವ ಮೂರನೇ ಹಂತದ ಮೋಟಾರ್, ಹಾರಾಟದ 203 ಸೆಕೆಂಡುಗಳಲ್ಲಿ ಕಳಪೆ ಪ್ರದರ್ಶನ ನೀಡಿತು. ಹೀಗಾಗಿ ಈ ಮಿಷನ್ ವಿಫಲವಾಗಿದ್ದು, ಇದು PSLV ಕಾರ್ಯಕ್ರಮದ 63 ಉಡಾವಣೆಗಳಲ್ಲಿ ಮೂರನೇ ಪೂರ್ಣ ವೈಫಲ್ಯ ಮತ್ತು 2017ರ ನಂತರದ ಮೊದಲನೆಯದಾಗಿದೆ. ಉಡಾವಣೆಯಾದ ಸ್ವಲ್ಪ ಸಮಯದ ನಂತರ ಇಸ್ರೋ ಮುಖ್ಯಸ್ಥ ವಿ. ನಾರಾಯಣನ್ ಅವರು ನೇರಪ್ರಸಾರದಲ್ಲಿ ಈ ಸಮಸ್ಯೆಯನ್ನು ದೃಢಪಡಿಸಿದರು.
ಈ ಸಮಸ್ಯೆಯು ಪ್ರೊಪೆಲ್ಲಂಟ್ ಹರಿವಿನ ದೋಷದಿಂದ, ನಳಿಕೆಯ ವೈಪರೀತ್ಯದಿಂದ ಅಥವಾ ರಚನಾತ್ಮಕ ವೈಫಲ್ಯಗಳಿಂದ ಉಂಟಾಗಿದೆಯೇ ಎಂದು ನಿರ್ಧರಿಸಲು ಇಸ್ರೋ ಇಂಜಿನಿಯರ್ಗಳು ಹಾರಾಟದ ಡೇಟಾವನ್ನು ವಿಶ್ಲೇಷಿಸುತ್ತಿದ್ದಾರೆ. PS3 ಹಂತದ ಉತ್ಪಾದನಾ ದಾಖಲೆಗಳು ಮತ್ತು ಪರೀಕ್ಷಾ ಪ್ರೋಟೋಕಾಲ್ಗಳನ್ನು ಪರಿಶೀಲಿಸಲು ವೈಫಲ್ಯ ವಿಶ್ಲೇಷಣಾ ಸಮಿತಿಯನ್ನು ರಚಿಸಲಾಗಿದೆ.
ಈ ಒಂದು ಹಿನ್ನಡೆಯು SAR ಇಮೇಜಿಂಗ್ ಮೂಲಕ ಗಡಿ ಕಣ್ಗಾವಲು ಮತ್ತು ವಿಪತ್ತು ಪ್ರತಿಕ್ರಿಯೆ ಸಾಮರ್ಥ್ಯಗಳನ್ನು ಹೆಚ್ಚಿಸುವ ಭಾರತದ ಯೋಜನೆಗಳನ್ನು ವಿಳಂಬಗೊಳಿಸಿದೆ.
ಇದು ಇಸ್ರೋ ಹಾರಿಬಿಟ್ಟ 101ನೇ ಉಪಗ್ರಹವಾಗಿತ್ತು. ಆದರೆ, ತಾಂತ್ರಿಕ ದೋಷದಿಂದ ವಿಫಲವಾಗಿದೆ. ಆರ್ಐಸ್ಯಾಟ್-1ಬಿ ಎಂದೂ ಪರಿಚಿತವಾದ ಇಒಎಸ್-09 ಉಪಗ್ರಹ ವನ್ನು ಬೆಂಗಳೂರಿನಲ್ಲಿರುವ ಇಸ್ರೋದ ಯು.ಆರ್. ರಾವ್ ಉಪಗ್ರಹ ಕೇಂದ್ರ ವಿನ್ಯಾಸಗೊಳಿಸಿತ್ತು. ಸಿ-ಬ್ಯಾಂಡ್ ಸಿಂಥೆಟಿಕ್ ಅಪಾರ್ಚರ್ ರೇಡಾರ್ನಿಂದ ಸುಸಜ್ಜಿತಗೊಂಡಿತ್ತು. ಯಾವುದೇ ರೀತಿಯ ವಾತಾವರಣವಿದ್ದರೂ ಹೈ- ರಿಸಲ್ಯೂಷನ್ ಚಿತ್ರಗಳನ್ನು ತೆಗೆಯಲು ಈ ರೇಡಾರ್ ನೆರವಾಗುತ್ತದೆ. ಆಪ್ಟಿಕಲ್ ಕ್ಯಾಮರಾಗಳಂತಲ್ಲದೆ, ಈ ರೇಡಾರ್ ಮೋಡ, ಮಳೆಯ ವಾತಾವರಣ ಮತ್ತು ರಾತ್ರಿ ವೇಳೆಯಲ್ಲೂ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸುತ್ತದೆ. ಈ ಉಪಗ್ರಹವು ಸೂರ್ಯ-ಸಮವ್ಯಾಪಕ ಕಕ್ಷೆಯನ್ನು (ಸನ್-ಸಿಂಕ್ರೋನಸ್ ಆರ್ಬಿಟ್) ಪ್ರವೇಶಿಸಬೇಕಿತ್ತು. ಆದರೆ, ವೈಫಲ್ಯ ಅನುಭವಿಸಿದೆ. (ಏಜೆನ್ಸೀಸ್)