ನವದೆಹಲಿ: 2020 ರಲ್ಲಿ ಅಮೆರಿಕದ ಡ್ರೋನ್ನಿಂದ ಕೊಲ್ಲಲ್ಪಟ್ಟ ಟಾಪ್ ಕಮಾಂಡರ್ ಖಾಸಿಂ ಸುಲೇಮಾನಿ ಸ್ಮರಣೆ ಕಾರ್ಯಕ್ರಮದ ವೇಳೆ ಸಂಭವಿಸಿದ್ದ ಅವಳಿ ಬಾಂಬ್ ಸ್ಫೋಟದ ಹೊಣೆಯನ್ನು ಉಗ್ರ ಸಂಘಟನೆ ಐಸಿಸ್ ಹೊತ್ತುಕೊಂಡಿದೆ.
ಈ ಕುರಿತು ಹೇಳಿಕೆಯನ್ನು ಬಿಡುಗಡೆ ಮಾಡಿರುವ ಐಸಿಸ್ ವಕ್ತಾರರೊಬ್ಬರು, ನಮ್ಮ ಇಬ್ಬರು ಆತ್ಮಾಹುತಿ ಬಾಂಬರ್ಗಳು ಕೆರ್ಮಾನ್ ನಗರದಲ್ಲಿ ಅವಳಿ ಬಾಂಬ್ ಸಿಡಿಸಿದ್ದಾರೆ. ಈ ದಾಳಿಯ ಸಂಪೂರ್ಣ ಹೊಣೆಯನ್ನು ಐಸಿಸ್ ಹೊತ್ತುಕೊಳ್ಳುತ್ತಿದೆ ಎಂದು ತಿಳಿಸಿದ್ದಾರೆ.
ಆಗ್ನೇಯ ನಗರವಾದ ಕೆರ್ಮನ್ನಲ್ಲಿ ಸುಲೇಮಾನಿ ಅವರನ್ನು ಸಮಾಧಿ ಮಾಡಿರುವ ಸ್ಥಳದ ಬಳಿ ಸಂಸ್ಮರಣ ಕಾರ್ಯಕ್ರಮ ನಡೆಯುತ್ತಿತ್ತು, ಕಾರ್ಯಕ್ರಮವನ್ನು ಗುರಿಯಾಗಿಸಿ ನಡೆದ ಅವಳಿ ಬಾಂಬ್ ದಾಳಿಯಲ್ಲಿ 84ಕ್ಕೂ ಹೆಚ್ಚು ಮೃತಪಟ್ಟು, 382 ಮಂದಿ ಗಂಭೀರವಾಗಿ ಗಾಯಗೊಂಡಿದ್ದರು. ಮೃತರ ಪಾರ್ಥಿವ ಶರೀರಗಳನ್ನು ಮೆರವಣಿಗೆ ಮಾಡಿ ಶುಕ್ರವಾರ ಇರಾನ್ ಸೇನಾಡಳಿತ ಸಂಬಂಧಿಕರಿಗೆ ಹಸ್ತಾಂತರಿಸಿತು.