ಟೆಲ್ ಅವಿವ್: ದುಬೈನಿಂದ ಟೆಲ್ ಅವಿವ್ಗೆ ಹೊರಟಿದ್ದ ಫ್ಲೈದುಬೈ ವಿಮಾನದಲ್ಲಿ ನಡೆದ ಆಕಾಶದಲ್ಲೇ ನಡೆದ ದಾಳಿಯ ಒಂದು ದಿನದ ಬಳಿಕ ಫಾಕ್ಸ್ ನ್ಯೂಸ್‌ಗೆ ನೀಡಿದ ಸಂದರ್ಶನದಲ್ಲಿ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು (Benjamin Netanyahu) ಕೆಲವೊಂದು ಅಚ್ಚರಿಯ ವಿವರಗಳನ್ನು ಬಹಿರಂಗಪಡಿಸಿದ್ದು, ದಾಳಿಕೋರ ಸಹ-ಪೈಲಟ್ ಅನ್ನು ನಿಯಂತ್ರಿಸಿದ ಬಳಿಕ ನನ್ನನ್ನು ಕೊಂದುಬಿಡಿ ಎಂದು ಕೂಗಿದನು ಎಂದು ತಿಳಿಸಿದ್ದಾರೆ.
ಈ ವಿಮಾನದಲ್ಲಿ ಇಸ್ರೇಲ್ ದೇಶದವರೇ ಹೆಚ್ಚಿನ ಸಂಖ್ಯೆಯಲ್ಲಿದ್ದ ಒಟ್ಟು 180 ಪ್ರಯಾಣಿಕರಿದ್ದರು. ಭಾರತೀಯ ಪೈಲಟ್ ಸ್ಮಿತ್ ಮಚ್ಚರ್ ಅವರಿಗೆ ಚಾಕುವಿನಿಂದ ಇರಿದ ಸಹ-ಪೈಲಟ್, ಯಾರೋ ಕೆಟ್ಟದಾಗಿ ಪ್ರಚೋದಿಸಿದ್ದರಿಂದ ಹಾಗೂ ತೀವ್ರ ಮಾನಸಿಕ ಅಸ್ಥಿರತೆಯಿಂದ (ಆತ್ಮಹತ್ಯೆ ಮಾಡಿಕೊಳ್ಳುವ ಮನಸ್ಥಿತಿಯಿಂದ) ಈ ಕೃತ್ಯ ಎಸಗಿದ್ದಾನೆ. ಹೇಗಾದರೂ ಮಾಡಿ ವಿಮಾನವನ್ನು ಕೆಳಗೆ ಉರುಳಿಸಬೇಕು ಎಂಬುದು ಆತನ ದುಷ್ಟ ಉದ್ದೇಶವಾಗಿತ್ತು ಎಂದು ಇಸ್ರೇಲ್ ಪ್ರಧಾನಿ ನೆತನ್ಯಾಹು ತಿಳಿಸಿದ್ದಾರೆ.
ಈ ದಾಳಿಯ ಅಸಲಿ ಉದ್ದೇಶ ಏನು ಮತ್ತು ಸಹ-ಪೈಲಟ್‌ಗೆ ವಿಮಾನದೊಳಗೆ ಇಂತಹ ಕೃತ್ಯ ಎಸಗಲು ಹೇಗೆ ಸಾಧ್ಯವಾಯಿತು ಎಂಬುದರ ಬಗ್ಗೆ ಅಧಿಕಾರಿಗಳು ಇನ್ನೂ ತನಿಖೆ ಮಾಡುತ್ತಿದ್ದಾರೆ. ಅಲ್ಲದೆ, ಈ ದಾಳಿಕೋರನಿಗೆ ಇರಾನ್ ದೇಶದ ಜೊತೆ ಏನಾದರೂ ನಂಟಿದೆಯೇ ಎಂಬುದು ಕೆಲವೇ ದಿನಗಳಲ್ಲಿ ಗೊತ್ತಾಗಲಿದೆ ಎಂದು ಇಸ್ರೇಲ್ ಪ್ರಧಾನಿ ನೆತನ್ಯಾಹು ತಿಳಿಸಿದ್ದಾರೆ.
ಈ ಬಗ್ಗೆ ಈಗಲೇ ಖಚಿತವಾಗಿ ಏನೂ ಹೇಳಲಾಗದು. ದಾಳಿ ಮಾಡಿದ ಪೈಲಟ್ ಸದ್ಯ ಸೌದಿ ಅರೇಬಿಯಾದಲ್ಲಿ ತನಿಖೆಯಲ್ಲಿದ್ದಾನೆ. ಆತನನ್ನು ಯಾವ ದೇಶದಿಂದ ವಿಮಾನ ಹಾರಾಟ ಆರಂಭವಾಯಿತೋ ಆ ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ದೇಶಕ್ಕೆ ಕರೆದೊಯ್ಯಬಹುದು. ನಾವು ಕೂಡ ಈ ತನಿಖೆಯನ್ನು ಸೂಕ್ಷ್ಮವಾಗಿ ಗಮನಿಸುತ್ತೇವೆ ಎಂದು ನೆತನ್ಯಾಹು ತಿಳಿಸಿದ್ದಾರೆ. ಅಧಿಕಾರಿಗಳು ಇನ್ನೂ ಸಹ-ಪೈಲಟ್‌ನ ಗುರುತನ್ನು ಬಹಿರಂಗಪಡಿಸದಿದ್ದರೂ, ಸೌದಿ ಅರೇಬಿಯಾದ ತಬುಕ್‌ನಲ್ಲಿ ಫ್ಲೈದುಬೈ ವಿಮಾನ ಎಫ್‌ಝಡ್1073 (FZ1073) ತುರ್ತು ಭೂಸ್ಪರ್ಶ ಮಾಡಿದ ನಂತರ ಬಂಧಿಸಲ್ಪಟ್ಟ ಆ ವ್ಯಕ್ತಿ ಓಮನ್ ದೇಶದ ಪ್ರಜೆ ಎಂದು ವರದಿಯಾಗಿದೆ.
ಈ ಸಹ-ಪೈಲಟ್ ಅನ್ನು ಇಸ್ರೇಲ್ ತಾವೇ ಸ್ವತಃ ವಿಚಾರಣೆ ನಡೆಸಲಿದೆ ಮತ್ತು ಇದರ ಹಿಂದೆ ಇರಾನ್ ಕೈವಾಡವಿದೆಯೇ ಎಂಬುದನ್ನು ತನಿಖೆ ಮಾಡಲಿದೆ ಎಂದಿರುವ ನೆತನ್ಯಾಹು, ಈ ದಾಳಿಕೋರನ ಮೂಲವನ್ನು ನಾವು ಪತ್ತೆ ಹಚ್ಚುತ್ತೇವೆ, ಆತನಿಗೆ ಯಾರಾದರೂ ಸಹಾಯಕರಿದ್ದರೇ ಮತ್ತು ಇದರ ಹಿಂದೆ ಇರಾನ್ ಇತ್ತೇ ಎಂಬುದನ್ನು ಶೀಘ್ರದಲ್ಲೇ ಕಂಡುಹಿಡಿಯಲಿದ್ದೇವೆ ಎಂದು ಅವರು ಹೇಳಿದ್ದಾರೆ. ನೆತನ್ಯಾಹು ಸೇರಿದಂತೆ ಇಸ್ರೇಲ್ ಸರ್ಕಾರದ ಇತರ ಪ್ರಮುಖರು ಈ ಘಟನೆಯನ್ನು ಜಿಹಾದಿ ಭಯೋತ್ಪಾದನಾ ದಾಳಿ ಎಂದು ಕರೆದಿದೆ.
ಭಾರತದಲ್ಲಿರುವ ಇಸ್ರೇಲ್ ರಾಯಭಾರ ಕಚೇರಿಯು ಕೂಡ ಈ ಘಟನೆಯನ್ನು ಅದೇ ದೃಷ್ಠಿಕೋನದಿಂದ ನೋಡಿದೆ. 170 ಇಸ್ರೇಲಿಗಳನ್ನು ಹೊತ್ತೊಯ್ಯುತ್ತಿದ್ದ ಫ್ಲೈದುಬೈ ವಿಮಾನವು ಈ ದಾಳಿಯ ಗುರಿಯಾಗಿತ್ತು ಎಂದು ತಿಳಿಸಿದೆ. ಈ ಘಟನೆಯು ಕೇವಲ ಇಸ್ರೇಲ್ ಮತ್ತು ಯುಎಇ ಮೇಲಿನ ದಾಳಿ ಮಾತ್ರವಲ್ಲ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಕಾಲದಲ್ಲಿ ಕುದುರಿಸಲಾಗಿದ್ದ ಅಬ್ರಹಾಂ ಒಪ್ಪಂದವನ್ನು ಹಳತಪ್ಪಿಸುವ ದೊಡ್ಡ ಪ್ರಯತ್ನವಾಗಿದೆ ಎಂದೂ ರಾಯಭಾರ ಕಚೇರಿ ಸ್ಪಷ್ಟಪಡಿಸಿದೆ.
ದುಬೈನಿಂದ ಟೆಲ್ ಅವಿವ್ಗೆ ಹೊರಟಿದ್ದ ವಿಮಾನದಲ್ಲಿ ಪೈಲಟ್ ಮೇಲೆ ಸಹ-ಪೈಲಟ್ ರಕ್ತಸಿಕ್ತ ದಾಳಿ ನಡೆಸಿರುವುದು ವಿಮಾನ ಅಪಹರಣದ ಯತ್ನವೇ ಅಥವಾ ಭಯೋತ್ಪಾದನಾ ಕೃತ್ಯವೇ ಎಂಬುದನ್ನು ಇಸ್ರೇಲ್ ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ದೇಶಗಳು ಜಂಟಿಯಾಗಿ ತನಿಖೆ ನಡೆಸುತ್ತಿವೆ.
ಈ ನಡುವೆ ಯುಎಇಯಲ್ಲಿರುವ ಇಸ್ರೇಲ್ ರಾಯಭಾರಿ ಯೋಸಿ ಅವ್ರಹಾಂ ಶೆಲ್ಲಿ ಅವರು ಯಾವುದೇ ಆತುರದ ತೀರ್ಮಾನಗಳಿಗೆ ಬರುವುದರ ವಿರುದ್ಧ ಎಚ್ಚರಿಕೆ ನೀಡಿದ್ದಾರೆ.
ನೆತನ್ಯಾಹು ಅವರ ಈ ಹೇಳಿಕೆಗಳಿಗೂ ಮುನ್ನವೇ, ಸಹ-ಪೈಲಟ್‌ನ ಧರ್ಮ ಮತ್ತು ನಂಬಿಕೆಗಳ ಬಗ್ಗೆ ಮಾಧ್ಯಮಗಳಲ್ಲಿ ಚರ್ಚೆಗಳು ಆರಂಭವಾಗಿದ್ದವು. ಟೆಲ್ ಅವಿವ್ ಮೂಲದ ಚಾನೆಲ್ 16 ರ ವಿದೇಶಿ ಸುದ್ದಿ ಸಂಪಾದಕ ಯೋಸೆಫ್ ಇಸ್ರೇಲ್ ಅವರು, ಫ್ಲೈದುಬೈ ಪೈಲಟ್ ಒಬ್ಬರ ಮಾತನ್ನು ಉಲ್ಲೇಖಿಸುತ್ತಾ, ಆರೋಪಿ ಸಹ-ಪೈಲಟ್ ಮೂಲಭೂತವಾದಿ ನಡವಳಿಕೆ ಹೊಂದಿದ್ದ ಎಂದು ತಿಳಿಸಿದ್ದರು.
ಅವನು ದಿನವಿಡೀ ಅತಿಯಾಗಿ ಪ್ರಾರ್ಥನೆ ಮಾಡುತ್ತಿದ್ದ ಮತ್ತು ಮಹಿಳೆಯರೊಂದಿಗೆ ಕೈಕುಲುಕಲು ನಿರಾಕರಿಸುತ್ತಿದ್ದ ಎಂದು ಆತನ ಸಹೋದ್ಯೋಗಿ ಹೇಳಿದ್ದಾಗಿ ಯೋಸೆಫ್ ತಿಳಿಸಿದ್ದಾರೆ. ಆದರೆ ಆ ಪೈಲಟ್ ಯಾರೆಂಬುದನ್ನು ಅವರು ಬಹಿರಂಗಪಡಿಸಲಿಲ್ಲ. ಇದನ್ನು ಹೇಳಲು ಬೇರೆ ದಾರಿಯಿಲ್ಲ, ನಾವು ಒಬ್ಬ ಭಯೋತ್ಪಾದಕನನ್ನು ಕೆಲಸಕ್ಕೆ ಇಟ್ಟುಕೊಂಡಿದ್ದೆವು ಮತ್ತು ಇದರಿಂದ 180 ಜನರ ಪ್ರಾಣ ಹೋಗುವ ಸ್ಥಿತಿ ನಿರ್ಮಾಣವಾಗಿತ್ತು ಎಂದೂ ಆ ಸಹೋದ್ಯೋಗಿ ಆತಂಕ ವ್ಯಕ್ತಪಡಿಸಿದ್ದಾರೆ.
ಇಸ್ರೇಲ್‌ಗೆ ತೆರಳುವ ವಿಮಾನದ ಜವಾಬ್ದಾರಿಯನ್ನು ಅಂತಹ ಸಹ-ಪೈಲಟ್‌ಗೆ ಹೇಗೆ ನೀಡಲಾಯಿತು..? ಇಸ್ರೇಲ್ ಜೊತೆ ಯಾವುದೇ ರಾಜತಾಂತ್ರಿಕ ಸಂಬಂಧವಿಲ್ಲದ ಓಮನ್ ದೇಶದ ಪ್ರಜೆಯನ್ನು ಇಂತಹ ವಿಮಾನವನ್ನು ಹಾರಿಸಲು ಹೇಗೆ ಅನುಮತಿಸಲಾಯಿತು ಎಂಬ ಪ್ರಶ್ನೆಗಳು ಹುಟ್ಟಿಕೊಂಡಿದ್ದು, ತನಿಖೆಯ ನಂತರವೇ ಸಂಪೂರ್ಣ ಮಾಹಿತಿ ಹೊರಬೀಳಲಿದೆ(ಏಜೆನ್ಸೀಸ್).