iPhone : ಈ ತಿಂಗಳ ಆರಂಭದಲ್ಲಿ ಆ್ಯಪಲ್ ಐಫೋನ್ 17 ಪ್ರೊ ಮ್ಯಾಕ್ಸ್ ಬಿಡುಗಡೆಯಾಯಿತು. ಹೊಸ ಆವೃತ್ತಿಯ ಐಫೋನ್ ಖರೀದಿ ಮಾಡಲು ಅನೇಕ ರಾಜ್ಯಗಳಲ್ಲಿ ಗ್ರಾಹಕರು ಸರದಿ ಸಾಲಿನಲ್ಲಿ ನಿಂತ್ತಿದ್ದು ಭಾರಿ ಸುದ್ದಿ ಕೂಡ ವೈರಲ್ ಆಯಿತು. ಇಂದಿಗೂ ಅನೇಕ ಮಂದಿ ಐಫೋನ್ ಖರೀದಿಸಲು ಉತ್ಸುಕರಾಗಿದ್ದಾರೆ. ಹೀಗಿರುವಾಗ ಉತ್ತರ ಪ್ರದೇಶದ ಸೋಶಿಯಲ್ ಮೀಡಿಯಾ ಇನ್ಫ್ಲುಯೆನ್ಸರ್ ಮಹಿ ಸಿಂಗ್ ಎಂಬಾಕೆ ಐಫೋನ್ ಖರೀದಿಸಲು ಸಹಾಯ ಮಾಡುವಂತೆ ಜನರ ಬಳಿ ಮನವಿ ಮಾಡಿದ್ದಾಳೆ. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸದ್ಯ ವೈರಲ್ ಆಗುತ್ತಿದೆ.
ನನಗೆ ಅನಾರೋಗ್ಯವಿದೆ ಯಾರಾದರೂ ಸಹಾಯ ಮಾಡಿ ಎಂದು ಕೇಳುವವರನ್ನು ನೋಡಿದ್ದೇವೆ. ಅಷ್ಟೇ ಯಾಕೆ ವಿದ್ಯಾಭ್ಯಾಸಕ್ಕೆ ಅಥವಾ ಹಸಿವು ನೀಗಿಸಲು ಸಹಾಯ ಕೋರುತ್ತಾರೆ. ಈ ರೀತಿ ನೆರವು ಕೋರುವುದರಲ್ಲಿ ಒಂದು ಅರ್ಥ ಇದೆ. ಆದರೆ, ದುಬಾರಿ ಐಫೋನ್ ಖರೀದಿ ಮಾಡಲು ಸಹಾಯ ಕೇಳುತ್ತಿರುವ ಏಕೈಕ ಯುವತಿ ಇವಳೇ ನೋಡಿ.
ಭಾರತದಲ್ಲಿ ಸುಮಾರು 1.49 ಲಕ್ಷ ರೂ. ಬೆಲೆಗೆ ಮಾರಾಟವಾಡುತ್ತಿರುವ ಐಫೋನ್ 17 ಪ್ರೊ ಮ್ಯಾಕ್ಸ್ ಖರೀದಿಸಲು ಒಂದು ಅಥವಾ ಎರಡು ರೂಪಾಯಿಗಳನ್ನು ತನಗೆ ಕಳುಹಿಸುವಂತೆ ಮಹಿ ಸಿಂಗ್ ತನ್ನ ಫಾಲೋವರ್ಸ್ ಬಳಿ ವಿನಂತಿಸಿಕೊಂಡಿದ್ದಾಳೆ. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದ್ದು, ಟೀಕೆಗಳು ವ್ಯಕ್ತವಾಗುತ್ತಿವೆ.
ನೀವು ನನಗೆ ಹಣ ನೀಡುವ ಮೂಲಕ ಸಹಾಯ ಮಾಡಿ. ಐಫೋನ್ 17 ಪ್ರೊ ಬಿಡುಗಡೆಯಾಗಿದೆ ಮತ್ತು ನನಗೆ ಅದರ ಬಣ್ಣ ತುಂಬಾ ಇಷ್ಟವಾಯಿತು. ಮೂರು ತಿಂಗಳ ಹಿಂದೆ ನನ್ನ ತಂದೆ ನನಗೆ ಐಫೋನ್ 16 ಅನ್ನು ಖರೀದಿಸಿದರು. ಅಕ್ಟೋಬರ್ 21 ರಂದು ನನ್ನ ಹುಟ್ಟುಹಬ್ಬಕ್ಕೆ ನಾನು ಈ ಹೊಸ ಫೋನ್ ಖರೀದಿಸಲು ಬಯಸುತ್ತೇನೆ. ಆದರೆ, ನನ್ನ ತಂದೆ ನನಗಾಗಿ ಅದನ್ನು ಖರೀದಿಸುತ್ತಿಲ್ಲ. ನೀವೆಲ್ಲರೂ ತಲಾ ಒಂದು, ಎರಡು, ಮೂರು ಅಥವಾ ನಾಲ್ಕು ರೂಪಾಯಿಗಳನ್ನು ನೀಡುವ ಮೂಲಕ ನನಗೆ ಸಹಾಯ ಮಾಡಿದರೆ, ನಾನು ಈ ಫೋನ್ ಅನ್ನು ಖರೀದಿಸಬಹುದು. ನಾನೇನಾದರೂ ಫೋನ್ ಖರೀದಿ ಮಾಡಿದರೆ ನನ್ನ ಹೃದಯದಿಂದ ನಾನು ನಿಮಗೆ ಧನ್ಯವಾದ ಹೇಳುತ್ತೇನೆ. ನಿಜವಾದರೆ, ನನ್ನ ಕನಸನ್ನು ನನಸಾಗಿಸುತ್ತದೆ. ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ನಾನು ಐಫೋನ್ 17 ಅನ್ನು ತುಂಬಾ ಪ್ರೀತಿಸುತ್ತೇನೆ, ಅದನ್ನು ವಿವರಿಸಲು ನನ್ನಲ್ಲಿ ಪದಗಳಿಲ್ಲ ಎಂದು ಯುವತಿ ಹೇಳಿದ್ದಾಳೆ.
ಯುವತಿಯ ಈ ಮನವಿಯನ್ನು ಬೆಂಬಲಿಸುವವರು ಬೆರಳಣಿಕೆಯಾದರೆ, ಆಕೆಯ ವಿರುದ್ಧ ಸಾಕಷ್ಟು ಮಂದಿ ಆಕ್ರೋಶ ಹೊರಹಾಕಿದ್ದಾರೆ. ನಿಮ್ಮ ತಂದೆ ಐಫೋನ್ 16 ಕೊಡಿಸಿದ್ದಾರೆಂದರೆ, ನೀನೇನು ಆರ್ಥಿಕವಾಗಿ ದುರ್ಬಲಳಲ್ಲ, ಈ ರೀತಿ ಹಣ ಬೇಕು ಎಂದು ಕೇಳಲು ನಿನಗೆ ನಾಚಿಕೆ ಆಗುವುದಿಲ್ಲವೇ ಎಂದು ಸಾಮಾಜಿಕ ಜಾಲತಾಣದಲ್ಲಿ ಆಕ್ರೋಶ ವ್ಯಕ್ತವಾಗುತ್ತಿದೆ. (ಏಜೆನ್ಸೀಸ್)