| ಗೋವಿಂದರಾಜು ಚಿನ್ನಕುರ್ಚಿ ಬೆಂಗಳೂರು
ದೇಶದಲ್ಲಿ ಪ್ರತಿದಿನ ಸರಾಸರಿ ಒಬ್ಬರು ಅಥವಾ ಇಬ್ಬರು ಪೊಲೀಸರು ಕರ್ತವ್ಯದ ವೇಳೆ ಸಾವಿಗೀಡಾಗುತ್ತಿದ್ದಾರೆ. ರಾಷ್ಟ್ರೀಯ ಅಪರಾಧ ದಾಖಲೆಗಳ ಬ್ಯೂರೋ (ಎನ್ಸಿಆರ್ಬಿ) ವರದಿ ಪ್ರಕಾರ ದೇಶದಲ್ಲಿ 2021ರಲ್ಲಿ ವಿವಿಧ ದರ್ಜೆಯ 427 ಅಧಿಕಾರಿ, ಸಿಬ್ಬಂದಿ ಮೃತಪಟ್ಟಿದ್ದರೆ, 1,632 ಮಂದಿ ಗಾಯಗೊಂಡಿದ್ದಾರೆ.
ಹೆಚ್ಚಾಗಿ ರಸ್ತೆ ಅಪಘಾತದಿಂದ (339 ಮಂದಿ) ಅಸುನೀಗಿದ್ದು, 372 ಮಂದಿ ಗಾಯಗೊಂಡಿದ್ದಾರೆ. ಈ ಪೈಕಿ ಕರ್ನಾಟಕದಲ್ಲಿ ನಾಲ್ವರು ರಸ್ತೆ ಅಪಘಾತದಲ್ಲಿ ಪ್ರಾಣ ಕಳೆದುಕೊಂಡಿದ್ದರೆ, ಗಲಭೆಯಲ್ಲಿ 14 ಮತ್ತು 28 ಮಂದಿ ಅಪರಾಧ ಪ್ರಕರಣಗಳ ತನಿಖೆ ವೇಳೆ ಹಾಗೂ 25 ಮಂದಿ ರಸ್ತೆ ಅಪಘಾತದಲ್ಲಿ ಗಾಯಗೊಂಡಿದ್ದಾರೆ ಎಂದು ಎನ್ಸಿಆರ್ಬಿ ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ತಮಿಳುನಾಡಿನಲ್ಲಿ (58) ಅತಿ ಹೆಚ್ಚು ಅಧಿಕಾರಿಗಳು ಸಾವಿಗೀಡಾಗಿದ್ದಾರೆ. ಆನಂತರದ ಸ್ಥಾನದಲ್ಲಿ ಛತ್ತಿಸ್ಗಢ (47), ಬಿಹಾರ (39), ರಾಜಸ್ಥಾನ 36), ಮಧ್ಯಪ್ರದೇಶ (32) ಮತ್ತು ಉತ್ತರ ಪ್ರದೇಶ (33) ರಾಜ್ಯಗಳು ಇವೆ. 233 ಕಾನ್ಸ್ಟೆಬಲ್ಗಳು, 100 ಹೆಡ್ ಕಾನ್ಸ್ಟೆಬಲ್, 41 ಎಎಸ್ಐ, 32 ಪಿಎಸ್ಐ, 8 ಇನ್ಸ್ಪೆಕ್ಟರ್, 2 ಗೆಜೆಟೆಡ್ ಅಧಿಕಾರಿ ಮತ್ತು 11 ಇತರ ಸಿಬ್ಬಂದಿ ಮೃತಪಟ್ಟಿದ್ದಾರೆ. ಗಾಯಗೊಂಡವರ ಪಟ್ಟಿಯಲ್ಲಿಯೂ ಸಹ ಕಾನ್ಸ್ಟೆಬಲ್ಗಳೇ (951) ಹೆಚ್ಚಾಗಿದ್ದಾರೆ. ಆನಂತರ ಹೆಡ್ ಕಾನ್ಸ್ಟೆಬಲ್ (238), ಎಎಸ್ಐ-106, ಪಿಎಸ್ಐ-202, ಇನ್ಸ್ಪೆಕ್ಟರ್-44 ಸೇರಿದ್ದಾರೆ ಎಂದು ಎನ್ಸಿಆರ್ಬಿ ವರದಿಯಲ್ಲಿ ಬೆಳಕಿಗೆ ಬಂದಿದೆ.
ಟೆರರ್ ಕಾರ್ಯಾಚರಣೆ 18 ಮಂದಿ ಹುತಾತ್ಮ: ಭಯೋತ್ಪಾದಕ ಮತ್ತು ಜಿಹಾದಿ ವಿರುದ್ಧದ ಕಾರ್ಯಾಚರಣೆ 18 ಪೊಲೀಸರು ಹುತಾತ್ಮರಾಗಿದ್ದಾರೆ. ಈ ಎಲ್ಲರೂ ಜಮ್ಮು-ಕಾಶ್ಮೀರ ಪೊಲೀಸ್ ಇಲಾಖೆಗೆ ಸೇರಿದವರು. ನಕ್ಸಲ್ ಮತ್ತಿತರರ ವಿರುದ್ಧದ ಕಾಯಾಚರಣೆ ವೇಳೆ 40, ಗಡಿಭಾಗದ ಗುಂಡಿನ ದಾಳಿ ಮತ್ತು ಗ್ಯಾಂಗ್ ಸ್ಟಾರ್ಗಳ ವಿರುದ್ಧದ ಹೋರಾಟದಲ್ಲಿ ತಲಾ 11 ಮಂದಿ ಮೃತಪಟ್ಟಿದ್ದಾರೆ.
ಖಾಕಿಗೆ 22 ನಾಗರಿಕರು ಸಾವು: ದೇಶದಲ್ಲಿ ನಡೆಯುವ ಪೊಲೀಸರ ಕಾರ್ಯಾಚರಣೆ ವೇಳೆ ಆಕಸ್ಮಿಕವಾಗಿ ಗುಂಡು ತಗಲಿ ಅಥವಾ ಲಾಠಿ ಹಲ್ಲೆಯಿಂದ 22 ನಾಗರಿಕರು ಬಲಿಯಾಗಿದ್ದಾರೆ.