ನವದೆಹಲಿ: ಮಕ್ಕಳು ಹೆಚ್ಚಾಗಿ ಇತರರೊಂದಿಗೆ ಆಟ-ಪಾಠದಲ್ಲಿ ಬೆರೆತರೂ ಒಂದಷ್ಟು ಖಾಸಗಿತನ ಬಯಸುತ್ತಾರೆ ಎಂಬುದು ಕೂಡ ನಿಜ. ಆದರೆ ಇಲ್ಲೊಬ್ಬ ಹದಿನಾರು ವರ್ಷದ ಹುಡುಗ ನನಗೆ ಮನೆಯಲ್ಲೇ ಪ್ರೈವೆಸಿ ಇಲ್ಲ ಎಂದು ಸೋಷಿಯಲ್ ಮೀಡಿಯಾದಲ್ಲಿ ಹೇಳಿಕೊಂಡಿದ್ದಾನೆ.
ಮನೆಯಲ್ಲಿನ ತನ್ನ ಕೊಠಡಿಯ ಫೋಟೋ ಸೋಷಿಯಲ್ ಮೀಡಿಯಾ ಆ್ಯಪ್ ಆಗಿರುವ ರೆಡ್ಡಿಟ್ನಲ್ಲಿ ಈ ಹುಡುಗ ಹಂಚಿಕೊಂಡಿದ್ದು, ತನ್ನ ಅಳಲನ್ನು ಸಾರ್ವಜನಿಕವಾಗಿ ತೋಡಿಕೊಂಡಿದ್ದಾನೆ. ಹದಿಹರೆಯದ ಯಾರ್ಯಾರು ತಮಗೆ ಪ್ರೈವೆಸಿ ಇಲ್ಲ ಎಂದು ಅಂದುಕೊಂಡಿದ್ದೀರೋ ಅಂಥವರು ಒಮ್ಮೆ ನನ್ನ ಹಾಗೂ ನನ್ನ ಸಹೋದರರ ರೂಮ್ ನೋಡಿ. ನಮ್ಮ ಕೋಣೆಯಲ್ಲಿ ಸಿಸಿಟಿವಿ ಕ್ಯಾಮರಾ ಅಳವಡಿಸಿದ್ದಾರೆ ಎಂದು ಈ ಹುಡುಗ ಫೋಟೋ ಸಹಿತ ಹೇಳಿಕೊಂಡಿದ್ದಾನೆ.
ಇದನ್ನೂ ಓದಿ: ಒಬ್ಬರು ಅಥವಾ ಇಬ್ಬರು ಮಕ್ಕಳಿರುವ ದಂಪತಿಗೆ ಭರ್ಜರಿ ಆಫರ್: ಮೂರನೇ ಮಗುವಿಗೆ ಜನ್ಮನೀಡಿದರೆ 50 ಸಾವಿರ ರೂಪಾಯಿ!
ಈತನ ತಂದೆಯೇ ಈ ಸಿಸಿಟಿವಿ ಕ್ಯಾಮರಾ ಅಳವಡಿಸಿದ್ದು, ಅದಕ್ಕೊಂದು ಕಾರಣವೂ ಇದೆ. ಒಂದು ವರ್ಷದ ಹಿಂದೆ ಸಹೋದರನ ರೂಮ್ನಲ್ಲಿ ಈ ಹುಡುಗ ಬೆಳಗಿನ ಜಾವ 4 ಗಂಟೆಗೆ ಪ್ಲೇಸ್ಟೇಷನ್ ವಿಡಿಯೋ ಗೇಮ್ ಆಡುವಾಗ ತಂದೆಯ ಕೈಗೆ ಸಿಕ್ಕಿಬಿದ್ದಿದ್ದನಂತೆ. ಆದರೆ ನಾನು ಅದಕ್ಕೂ ಮೊದಲು ಮೂರು ಗಂಟೆ ಓದಿದ್ದರೂ ಅಪ್ಪ ಅದನ್ನು ಒಪ್ಪಿರಲಿಲ್ಲ. ಆಮೇಲೆ ನನ್ನ ಬರ್ತ್ಡೇ ದಿನ ಇನ್ನೊಮ್ಮೆ ಪ್ಲೇಸ್ಟೇಷನ್ ಆಡುವಾಗ ಅಪ್ಪ ನೋಡಿದರು ಎಂದೂ ಈ ಹುಡುಗ ಹೇಳಿಕೊಂಡಿದ್ದಾನೆ. ಇದರಿಂದ ಸಿಟ್ಟಾದ ಅಪ್ಪ ಮಕ್ಕಳಿಬ್ಬರ ರೂಮ್ಗೂ ಸಿಸಿಟಿವಿ ಕ್ಯಾಮರಾ ಅಳವಡಿಸಿದ್ದರಂತೆ.
ನಾನು ಟಾಪ್ ಸ್ಟುಡೆಂಟ್, ಯಾವಾಗಲೂ ಶೇ. 90 ಮೇಲೆಯೇ ಅಂಕಗಳನ್ನು ಪಡೆಯುತ್ತೇನೆ. ಹೀಗಿರುವಾಗ ನಾನು ರಾತ್ರಿಯಲ್ಲಿ ಒಂದಷ್ಟು ಹೊತ್ತ ವಿಡಿಯೋ ಗೇಮ್ ಆಡಿದರೆ ಅದೇನೂ ದೊಡ್ಡ ಸಂಗತಿಯಲ್ಲಿ ಎಂದು ಹೇಳುವ ಈ ಹುಡುಗ, ತನ್ನ ತಂದೆಯ ನಡೆಯ ವಿರುದ್ಧ ಸಮಾಧಾನ ವ್ಯಕ್ತಪಡಿಸಿದ್ದಾನೆ. -ಏಜೆನ್ಸೀಸ್