ಬೆಂಗಳೂರು: ಎಲ್ಲ ಹುಡುಗಿಯರು ಬಾಯ್ಫ್ರೆಂಡ್ ಹೊಂದಿರಬೇಕು. ಒಬ್ಬಂಟಿ ಇರುವ ಹುಡುಗಿಯರಿಗೆ ಕಾಲೇಜಿಗೆ ಪ್ರವೇಶ ಕಲ್ಪಿಸುವುದಿಲ್ಲ. ಕಾಲೇಜಿನಲ್ಲಿ ಓದಲು ಬರಬೇಕು ಅಂದ್ರೆ ನಿಮ್ಮ ಬಾಯ್ಫ್ರೆಂಡ್ ಜತೆಗೆ ನೀವಿರುವ ಫೋಟೋವನ್ನ ತೋರಿಸಬೇಕು..! ಈ ಅಂಶವುಳ್ಳ ಸುತ್ತೋಲೆಯನ್ನ ತಮಿಳುನಾಡಿನ ಎಸ್ಆರ್ಎಂ ವಿಶ್ವವಿದ್ಯಾಲಯದ ಹೆಸರಲ್ಲಿ ಹೊರಡಿಸಲಾಗಿದೆ.
ಈ ಸುದ್ದಿ ಕೇಳಿ ಕೇಳಿದಾಕ್ಷಣ ಅರೆ, ಇದೇನಿದು? ಓದೋ ವಯಸ್ಸಲ್ಲಿ ಪ್ರೀತಿ-ಗೀತಿ ಅಂತ ತಲೆಕೆಡಿಸಿಕೊಳ್ಳಬೇಡಿ ಎಂದು ಹೇಳಬೇಕಿದ್ದ ವಿದ್ಯಾದೇಗುಲವೇ ಯುವತಿಯರಿಗೆ ಬಾಯ್ಫ್ರೆಂಡ್ ಕಡ್ಡಾಯ ಅನ್ನೋದಾ? ಇದೆಂತಹ ರೂಲ್ಸ್, ಅವರಿಗೇನೂ ತಲೆಕೆಟ್ಟಿರಬೇಕು... ಎಂದು ಪಾಲಕರಾದಿಯಾಗಿ, ಸಾರ್ವಜನಿಕರೂ ಹೌಹಾರಿದ್ದಾರೆ. ಈ ಸುತ್ತೋಲೆ ಕಂಡ ಎಸ್ಆರ್ಎಂ ವಿಶ್ವವಿದ್ಯಾಲಯದ ಸಿಬ್ಬಂದಿಯೂ ಸಿಟ್ಟಾಗಿದ್ದಾರೆ. ಅಂದಹಾಗೆ ಈ ಸುತ್ತೋಲೆಯನ್ನ ವಾಸ್ತವದಲ್ಲಿ ವಿವಿ ಹೊರಡಿಸಿಯೇ ಇಲ್ಲ. ಇದನ್ನೂ ಓದಿರಿ ಬೆಣ್ಣೆಹೊಳೆ ಫಾಲ್ಸ್ ಬಳಿ ಪ್ರೇಮಿಗಳಿಬ್ಬರ ಶವ ಸಿಕ್ಕ ಮರುದಿನವೇ ಪ್ರಿಯಕರನ ತಂದೆ ಸಾವು! ಮನಕಲಕುತ್ತೆ ಸಾವಿನ ಕಾರಣ
ಯಾರೋ ಕಿಡಿಗೇಡಿಗಳು ವಿವಿಯ ಲೆಟರ್ ಹೆಡ್ ದುರ್ಬಳಕೆ ಮಾಡಿಕೊಂಡು 'ಎಲ್ಲ ವಿದ್ಯಾರ್ಥಿನಿಯರೂ ಬಾಯ್ಫ್ರೆಂಡ್ ಹೊಂದಿರಬೇಕು. ವಿದ್ಯಾರ್ಥಿನಿಯರ ಸುರಕ್ಷತೆ ಹಿತದೃಷ್ಟಿಯಿಂದ ಬಾಯ್ಫ್ರೆಂಡ್ನ ಅವಶ್ಯಕತೆ ಇದೆ. ಒಬ್ಬಂಟಿ ಇದ್ದರೆ ಅವರಿಗೆ ಪ್ರವೇಶ ಕಲ್ಪಿಸುವುದಿಲ್ಲ. ಕಾಲೇಜು ಪ್ರವೇಶಿಸಬೇಕಾದಲ್ಲಿ ಇತ್ತೀಚಿಗೆ ಬಾಯ್ಫ್ರೆಂಡ್ ಜತೆಗೆ ತೆಗೆದುಕೊಂಡ ಫೋಟೋ ತೋರಿಸಬೇಕು' ಎಂದು ಪತ್ರದಲ್ಲಿ ಹೇಳಲಾಗಿದೆ. ಇದಕ್ಕೆ ವಿವಿಯ ಕುಲಸಚಿವರ ಸಹಿ ಕೂಡ ಇದೆ.
ಕಾಲೇಜು ಮರು ಪ್ರಾರಂಭ ಮತ್ತಿತರ ವಿಚಾರಗಳನ್ನು ತಿಳಿಸಲು ಇ-ಮೇಲ್ ಕಳುಹಿಸುತ್ತೇವೆ. ಅದನ್ನೇ ಕೆಲವು ಕಿಡಿಗೇಡಿಗಳು ದುರುಪಯೋಗ ಮಾಡಿಕೊಂಡು ವಿವಿಯ ಮರ್ಯಾದೆ ಕಳೆಯಲು ಕೆಲ ಕಿಡಿಗೇಡಿಗಳು ಈ ರೀತಿಯ ನಕಲು ಸುತ್ತೋಲೆ ಸೃಷ್ಟಿಸಿದ್ದಾರೆ. ಯಾರೂ ಇದರ ಬಗ್ಗೆ ತಲೆಕೊಡಿಸಿಕೊಳ್ಳಬೇಡಿ ಎಂದು ವಿವಿಯ ಕುಲಸಚಿವರು ಮನವಿ ಮಾಡಿದ್ದಾರೆ.
ನಕಲಿ ಸುತ್ತೋಲೆ ಹೊರಡಿಸಿ ಎಲ್ಲ ಕಡೆ ವೈರಲ್ ಮಾಡಿರುವವರನ್ನು ಪತ್ತೆ ಹಚ್ಚಿ ಶಿಸ್ತುಕ್ರಮ ಜರುಗಿಸಬೇಕೆಂದು ವಿವಿಯು ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದೆ.