ನವದೆಹಲಿ: ಇಲ್ಲೊಬ್ಬ ಬುದ್ಧಿಮಾಂದ್ಯ ವ್ಯಕ್ತಿ ಎಂಟು ತಿಂಗಳ ಹಿಂದೆ ತಪ್ಪಿಸಿಕೊಂಡು ಪರದಾಡುತ್ತಿದ್ದು, ಕೊನೆಗೂ ಒಂದೇ ಒಂದು ಪದದಿಂದಾಗಿ ಈತ ಮತ್ತೆ ಮನೆ ಸೇರುವಂತಾಗಿದೆ. 30 ವರ್ಷದ ಈ ಬುದ್ಧಿಮಾಂದ್ಯ ವ್ಯಕ್ತಿಯನ್ನು ಪುನಃ ತನ್ನ ಮನೆಯವರೊಂದಿಗೆ ಸೇರಿಸುವ ಮೂಲಕ ದೆಹಲಿ ಪೊಲೀಸರು ಮಾನವೀಯತೆ ಮೆರೆದಿದ್ದಾರೆ.
ಫೆ. 23-24ರ ರಾತ್ರಿ ಗಸ್ತಿನಲ್ಲಿದ್ದ ದೆಹಲಿ ಪೊಲೀಸ್ ಸಿಬ್ಬಂದಿಗೆ ದೆಹಲಿಯ ಸುಲ್ತಾನ್ಪುರ ಗ್ರಾಮದಲ್ಲಿ ಈ ವ್ಯಕ್ತಿ ಕಾಣಿಸಿದ್ದಾನೆ. ಪೊಲೀಸರು ಈತನನ್ನು ವಿಚಾರಿಸಿದರೆ ಒಂದೇ ಒಂದು ಪದ ಬಿಟ್ಟು ಬೇರೇನೂ ಹೇಳುತ್ತಿರಲಿಲ್ಲ. ಆದರೂ ಬೇಸರಗೊಳ್ಳದ ಪೊಲೀಸ್ ಅದೊಂದು ಪದವನ್ನೇ ಆಧಾರವಾಗಿಟ್ಟುಕೊಂಡು ತನಿಖೆ ನಡೆಸಿ ಕೊನೆಯೂ ಈ ವ್ಯಕ್ತಿಯನ್ನು ಮನೆಯವರೊಂದಿಗೆ ಸೇರಿಸಿದ್ದಾರೆ.
ಇದನ್ನೂ ಓದಿ: ಬೈಕ್ನಲ್ಲಿ ಹೋಗುವಾಗ ಪ್ರಿಯಕರನ ಬೆನ್ನಿಗೆ ಇರಿದ ಪ್ರೇಯಸಿ; ಬಿದ್ದರೂ ಬಿಡದೆ ಮತ್ತೆ ಮತ್ತೆ ಇರಿದು ಸಾಯಿಸಿದಳು!
ಪೊಲೀಸರು ಕೇಳಿದಾಗ ತನ್ನ ಹೆಸರು ಗೌರವ್ ಎಂಬುದನ್ನು ಬಿಟ್ಟರೆ ಆತ ಹೇಳುತ್ತಿದ್ದುದು ಒಂದೇ ಪದ, ಅದು 'ಹಾಸ್ಪಿಟಲ್'. ಹಾಸ್ಪಿಟಲ್ ಎಂಬ ಪದವನ್ನು ಬಿಟ್ಟು ಬೇರೇನೂ ಹೇಳದ ಈ ವ್ಯಕ್ತಿಯನ್ನು ಮನೆ ಸೇರಿಸುವ ಸಲುವಾಗಿ ಪೊಲೀಸರು ಸುತ್ತಮುತ್ತ ತಮ್ಮ ನೆಟ್ವರ್ಕ್ ಬಳಸಿ ವಿಚಾರಿಸಿದರೂ ಸುಳಿವು ಸಿಗಲಿಲ್ಲ.
ನಂತರ ಮನೋವೈದ್ಯರ ಬಳಿಗೆ ಕರೆದೊಯ್ದು ಈ ವ್ಯಕ್ತಿಯನ್ನು ಕೌನ್ಸೆಲಿಂಗ್ಗೆ ಒಳಪಡಿಸಿದಾಗ ಈತ ಇನ್ನೊಂದು ಪದ ಹೇಳಿದ್ದ. ಈ ಬಾರಿ 'ಕಲಾವತಿ ಹಾಸ್ಪಿಟಲ್' ಎಂದು ಹೇಳಿದ್ದ. ಅಲ್ಲಿಂದ ಕಲಾವತಿ ಹಾಸ್ಪಿಟಲ್ಗೆ ಈತನನ್ನು ಕರೆದೊಯ್ದು ವಿಷಯ ತಿಳಿಸಿದರೂ ಅಲ್ಲಿ ಯಾರೂ ಈತನನ್ನು ಗುರುತಿಸಲಿಲ್ಲ, ಅಂದರೆ ಈತನಿಗೆ ಸಂಬಂಧಪಟ್ಟವರು ಯಾರೂ ಅಲ್ಲಿರಲಿಲ್ಲ.
ಬಳಿಕ ಈತನ ಹೆಸರನ್ನು ಆಧರಿಸಿ ಸುತ್ತಮುತ್ತಲ ಊರಿನಲ್ಲಿ ದಾಖಲಾಗಿರುವ ನಾಪತ್ತೆ ಪ್ರಕರಣಗಳ ವಿವರಗಳನ್ನು ಕಲೆ ಹಾಕಿದಾಗ ದೆಹಲಿಯ ಶಾಸ್ತ್ರಿಪಾರ್ಕ್ನ ಪಟ್ವಾ ಚೌಕ್ ನಿವಾಸಿ ಗೌರವ್ ಎಂಬ 30 ವರ್ಷದ ವ್ಯಕ್ತಿ ಕಾಣೆಯಾಗಿರುವ ಕುರಿತು 2020ರ ಜುಲೈ 11ರಂದು ದೂರು ದಾಖಲಾಗಿರುವುದು ತಿಳಿದು ಬಂದಿತ್ತು. ಈ ಹಿನ್ನೆಲೆಯಲ್ಲಿ ಹೆಚ್ಚಿನ ಹುಡುಕಾಟ ನಡೆಸಿದ ಪೊಲೀಸರಿಗೆ ಗೌರವ್ ತಾಯಿಯನ್ನು ಪತ್ತೆ ಮಾಡಿ ಒಪ್ಪಿಸುವುದು ಸಾಧ್ಯವಾಗಿತ್ತು. ಕಳೆದ ಜುಲೈನಲ್ಲಿ ಈತನ ತಾಯಿ ಕಲಾವತಿ ಹಾಸ್ಪಿಟಲ್ಗೆ ತಪಾಸಣೆಗೆಂದು ಕರೆದುಕೊಂಡು ಬಂದಿದ್ದಾಗ ಈತ ತಪ್ಪಿಸಿಕೊಂಡಿದ್ದು, ಹುಡುಕಾಡಿದರೂ ಸಿಕ್ಕಿರಲಿಲ್ಲ. ಆದರೆ ಈಗ ಪೊಲೀಸರು ಒಂದು ಪದದ ಬೆನ್ನತ್ತಿ ಇಬ್ಬರನ್ನು ಮತ್ತೆ ಒಂದಾಗಿಸುವಲ್ಲಿ ಯಶಸ್ವಿಯಾಗಿದ್ದಾರೆ. (ಏಜೆನ್ಸೀಸ್)
ಕ್ಷಣಕ್ಷಣದ ಮಾಹಿತಿಗಾಗಿ ವಿಜಯವಾಣಿ ಫೇಸ್ಬುಕ್ ಪೇಜ್ ಲೈಕ್ ಮಾಡಿ