ಬೆಂಗಳೂರು: ದೇವರ ವಿಗ್ರಹ ಖರೀದಿ ಹಾಗೂ ಐಫೋನ್ ಉಡುಗೊರೆ ಕಳುಹಿಸುವ ಸೋಗಿನಲ್ಲಿ ಇಬ್ಬರಿಗೆ ಗಾಳ ಬೀಸಿದ್ದ ಸೈಬರ್ ಕಳ್ಳರು, ಆನ್ಲೈನ್ ಲಿಂಕ್ ಕಳುಹಿಸಿ ಅಮಾಯಕರ ಬ್ಯಾಂಕ್ ಖಾತೆಗಳಿಂದ 32 ಸಾವಿರ ರೂ. ದೋಚಿದ್ದಾರೆ.
ವಿಜಯನಗರದ ಸಂಜಯ್ ಜೋಷಿ ಮತ್ತು ಪಾದರಾಯನಪುರದ ರಾಮಪ್ರಸಾದ್ ವಂಚನೆಗೊಳಗಾದವರು. ಈ ಸಂಬಂಧ ಶ್ರೀಕಾಂತ್ ಸಿಂಗ್ ಸೇರಿ ಇಬ್ಬರ ವಿರುದ್ಧ ಪಶ್ಚಿಮ ವಿಭಾಗದ ಸೈಬರ್ ಕ್ರೖೆಂ ಪೊಲೀಸರು ಎರಡು ಪ್ರತ್ಯೇಕ ಪ್ರಕರಣ ದಾಖಲಿಸಿದ್ದಾರೆ.
8 ಸಾವಿರ ರೂ. ಮೋಸ: ಸಂಜಯ್ ಎಂಬುವರಿಗೆ ಕರೆಮಾಡಿದ್ದ ಶ್ರೀಕಾಂತ್ ಸಿಂಗ್, ತಾನು ಭಾರತೀಯ ಸೇನೆಯಲ್ಲಿ ಕರ್ತವ್ಯ ನಿರ್ವ ಹಿಸುತ್ತಿರುವುದಾಗಿ ಪರಿಚಯಿಸಿಕೊಂಡಿದ್ದ. ಇಂದಿರಾನಗರದಲ್ಲಿ ನೆಲೆಸಿದ್ದು, ತನ್ನ ಮೇಲಧಿಕಾರಿಗಳಿಗೆ ದೇವರ ವಿಗ್ರಹ ಬೇಕು ಎಂದಿದ್ದ. ಬಳಿಕ 40 ಸಾವಿರ ರೂ.ಗೆ ವಿಗ್ರಹ ಖರೀದಿಸಲು ಒಪ್ಪಿಗೆ ಸೂಚಿಸಿ, ಆನ್ಲೈನ್ ಮೂಲಕ 10 ಸಾವಿರ ರೂ. ಮುಂಗಡ ಹಣ ವರ್ಗಾಯಿಸುವುದಾಗಿ ನಂಬಿಸಿದ್ದ. ಈ ವೇಳೆ ಸಂಜಯ್ ಜೋಷಿ ವ್ಯಾಲೆಟ್ನಿಂದ ತನ್ನ ಖಾತೆಗೆ 5 ರೂ. ವರ್ಗಾಯಿಸಿಕೊಂಡು, ಅದಕ್ಕೆ ಪ್ರತಿಯಾಗಿ 10 ರೂ. ವರ್ಗಾಯಿಸಿದ್ದಾನೆ. ಈ ರೀತಿ ವ್ಯವಹರಿಸುವುದು ಭಾರತೀಯ ವಾಯುಸೇನೆ ಪದ್ಧತಿ ಎಂದು ನಂಬಿಸಿದ್ದ. ಇದಾದ ಕೆಲ ನಿಮಿಷಗಳ ಬಳಿಕ ಸಂಜಯ್ ಜೋಷಿ ಅವರ ಖಾತೆಯಿಂದ 8 ಸಾವಿರ ರೂ. ಕಡಿತವಾಗಿದೆ. ಆರೋಪಿ ಸಂಪರ್ಕಕ್ಕೆ ಸಿಗದೇ ಇದ್ದಾಗ ವಂಚನೆಯಾಗಿರುವುದು ಗೊತ್ತಾಗಿದೆ.
ಐಫೋನ್ ಗಿಫ್ಟ್ ಆಮಿಷ
ನಿಮ್ಮ ಫೋನ್ ನಂಬರ್ಗೆ ಐಫೋನ್ ಉಡುಗೊರೆ ಬಂದಿದೆ ಎಂದು ರಾಮಪ್ರಸಾದ್ ಎಂಬುವರಿಗೆ ಕರೆ ಮಾಡಿ ಆಮಿಷವೊಡ್ಡಿದ್ದ ಅಪರಿಚಿತರು, ಪಡೆದುಕೊಳ್ಳುವಂತೆ ತಿಳಿಸಿದ್ದರು. ಆನ್ಲೈನ್ ಲಿಂಕ್ ಕಳುಹಿಸುತ್ತೇವೆ, ಕ್ಲಿಕ್ ಮಾಡುವಂತೆ ಸೂಚಿಸಿದ್ದಾರೆ. ಅವರ ಮಾತನ್ನು ನಂಬಿ ಲಿಂಕ್ ಕ್ಲಿಕ್ ಮಾಡಿದಾಗ ಬ್ಯಾಂಕ್ ಖಾತೆಯಿಂದ 25 ಸಾವಿರ ರೂ. ಬೇರೊಂದು ಖಾತೆಗೆ ವರ್ಗಾವಣೆಯಾಗಿದೆ.