| ರಮೇಶ ಹಾರ್ಸಿಮನೆ ಸಿದ್ದಾಪುರ
ಪ್ರಸಕ್ತ ವರ್ಷ ಮಳೆ ಇಲ್ಲದೆ ಉತ್ತಮ ಬೆಳೆ ಬಾರದೆ ಆರ್ಥಿಕ ಸಮಸ್ಯೆಯ ಸುಳಿಗೆ ಸಿಲುಕಿದ್ದ ರೈತರ ಗಾಯದ ಮೇಲೆ ಸರ್ಕಾರ ಬರೆ ಎಳೆದಿದೆ. ಬೇಸಿಗೆ ಇನ್ನೂ ದೂರವಿದ್ದು, ಜಾನುವಾರುಗಳಿಗೆ ಮೇವಿನ ಕೊರತೆ ಎದುರಾಗುತ್ತಿರುವಾಗಲೇ ಕರ್ನಾಟಕ ಹಾಲು ಮಹಾಮಂಡಳ ನಂದಿನಿ ಪಶು ಆಹಾರದ ದರದಲ್ಲಿ ಏರಿಕೆ ಮಾಡಿದೆ. ಪ್ರತಿ ಮೆಟ್ರಿಕ್ ಟನ್ಗೆ ಅಕ್ಟೋಬರ್ 1ರಿಂದ ಜಾರಿಗೆ ಬರುವಂತೆ ಒಂದು ಸಾವಿರ ರೂ. ಗಳಷ್ಟು ಹೆಚ್ಚಿಗೆ ಮಾಡಿದ್ದು ಹೈನೋದ್ಯಮಕ್ಕೆ ಅಂಕುಶ ಹಾಕಿದಂತಾಗಿದೆ.
ಜಿಲ್ಲೆಯಲ್ಲಿ ಬೇಸಿಗೆ ಪ್ರಾರಂಭವಾಗುವ ಪೂರ್ವದಲ್ಲಿಯೇ ಹೈನೋದ್ಯಮಕ್ಕೆ ಬಿಸಿಲಿನ ಉರಿತಾಪ ಒಂದೆಡೆಯಾದರೆ ಈಗ ಪಶು ಆಹಾರ ದರವನ್ನು ಹೆಚ್ಚಿಗೆ ಮಾಡಿರುವುದರಿಂದ ಹೈನುಗಾರರು ಸಂಕಷ್ಟ ಎದುರಿಸುವಂತಾಗಿದೆ.
ನಂದಿನಿ ಗೋಲ್ಡ್, ಬೈಪಾಸ್ ಹಾಗೂ ಎಮ್ಮೆ ವಿಶೇಷ ಪಶು ಆಹಾರದ 50 ಕೆಜಿ ಚೀಲಕ್ಕೆ 49 ರೂ.ಗಳಷ್ಟು ಏರಿಕೆ ಮಾಡಿ ಧಾರವಾಡ ಹಾಲು ಒಕ್ಕೂಟ ತನ್ನ ವ್ಯಾಪ್ತಿಯ ಎಲ್ಲ ಹಾಲು ಉತ್ಪಾದಕರ ಸಹಕಾರಿ ಸಂಘಗಳಿಗೆ ಸುತ್ತೋಲೆ ನೀಡಿದೆ.
ಕಚ್ಚಾ ಪದಾರ್ಥಗಳ ಬೆಲೆ ಏರಿಕೆ ಹಿನ್ನೆಲೆಯಲ್ಲಿ ಪಶು ಆಹಾರದ ಬೆಲೆಯನ್ನು ಹೆಚ್ಚಿಸಲು ಸರ್ಕಾರ ನಿರ್ಧರಿಸಿದೆ. ಬರಗಾಲದ ಹಿನ್ನೆಲೆಯಲ್ಲಿ ಈ ರೀತಿ ಆಗಿದೆ. ಹಿಂಗಾರಿನಲ್ಲಿ ಉತ್ತಮ ಬೆಳೆ ಬಂದು ಹೆಚ್ಚಿನ ಕಚ್ಚಾ ಪದಾರ್ಥ ಲಭ್ಯವಾದರೆ ಪಶು ಆಹಾರದ ಬೆಲೆ ಇಳಿಸುವ ಸಾಧ್ಯತೆಯಿದೆ. | ಶಂಕರ ಮುಗದ, ಅಧ್ಯಕ್ಷ, ಧಾರವಾಡ ಕೆಎಂಎಫ್ ಪಶು ಆಹಾರದ ದರ ಹೆಚ್ಚಳದ ಕುರಿತು ಅನೇಕ ಹಾಲು ಉತ್ಪಾದಕರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಈ ಕುರಿತು ಅಕ್ಟೋಬರ್ 10ರಂದು ನಡೆಯುವ ಒಕ್ಕೂಟದ ಸಭೆಯಲ್ಲಿ ಪ್ರಸ್ತಾಪಿಸಲಾಗುವುದು. ಈಗಾಗಲೆ ಒಕ್ಕೂಟದಿಂದ ರಸಮೇವುಗಳನ್ನು ಸಂಘಕ್ಕೆ ಪೂರೈಕೆ ಮಾಡಲಾಗುತ್ತಿದ್ದು, ಇದರ ಪ್ರಯೋಜನವನ್ನು ಪಡೆದುಕೊಳ್ಳಬೇಕು. | ಪಿ.ವಿ. ನಾಯ್ಕ ಬೇಡ್ಕಣಿ, ಧಾರವಾಡ ಹಾಲು ಒಕ್ಕೂಟದ ನಿರ್ದೇಶಕ ಹಾಲಿನ ದರ ಹೆಚ್ಚಳ ಮಾಡದೆ ಪಶು ಅಹಾರದ ದರ ಹೆಚ್ಚಿಗೆ ಮಾಡಿರುವುದರಿಂದ ಮುಂದಿನ ದಿನದಲ್ಲಿ ಹಾಲು ಶೇಖರಣೆ ಕಡಿಮೆ ಆಗುತ್ತದೆ. ಹೈನುಗಾರಿಕೆ ಮಾಡಲು ಸಾಕಷ್ಟು ರೈತರು ಈಗ ಹಿಂದೇಟು ಹಾಕಿದ್ದಾರೆ. ರೈತರ ಹಿತದೃಷ್ಟಿಯಿಂದ ಒಕ್ಕೂಟ ಉತ್ತಮ ತೀರ್ಮಾನ ತೆಗೆದುಕೊಳ್ಳುವುದು ಒಳ್ಳೆಯದು. | ಶ್ರೀಧರ ಎಂ. ಭಟ್ಟ ಮಾಣಿಕ್ನಮನೆ, ಅಧ್ಯಕ್ಷ, ಹಾರ್ಸಿಕಟ್ಟಾ ಹಾಲು ಉತ್ಪಾದಕರ ಸಹಕಾರಿ ಸಂಘ, ತಾ. ಸಿದ್ದಾಪುರ