ಇಂಡೋನೇಷ್ಯಾ: ಕರೊನಾ ವೈರಸ್ ವಿಶ್ವಾದ್ಯಂತ ಪ್ರತಿಯೊಬ್ಬರಲ್ಲಿಯೂ ಭೀತಿ ಸೃಷ್ಟಿಸಿದ್ದರೂ ಈ ವೈರಸ್ ಕುರಿತಂತೆ ಬರುತ್ತಿರುವ ಜೋಕ್ಗಳಿಗೇನೂ ಕಮ್ಮಿ ಇಲ್ಲ. ಲಾಕ್ಡೌನ್ನಲ್ಲಿ ಮನೆಯಲ್ಲಿಯೇ ಕುಳಿತು ಹೊಸಹೊಸ ಜೋಕ್ಗಳನ್ನು ಸೃಷ್ಟಿ ಮಾಡುವವರಿಗೆ ಸದ್ಯ ಇರುವ ವಸ್ತು ಕರೊನಾ.
ಅದೇ ರೀತಿ ಗಂಡ-ಹೆಂಡತಿಯ ಬಗ್ಗೆ ಇಲ್ಲಿಯವರೆಗೆ ಬಂದಿರುವ ಜೋಕ್, ಮೀಮ್ಗಳಷ್ಟು ಯಾವ ವಿಷಯಕ್ಕೂ ಬಂದಿಲ್ಲ ಎಂದೇ ಹೇಳಬಹುದು. ಹಾಗೆಂದು ಕರೊನಾ ವೈರಸ್ ಅನ್ನು ಹೆಂಡತಿಗೆ ಹೋಲಿಸಿದರೆ?
ಹೌದು. ಈ ರೀತಿ ಹೋಲಿಕೆ ಮಾಡಿ ಇದೀಗ ಇಂಡೋನೇಷ್ಯಾದ ಭದ್ರತಾ ಸಚಿವ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಸಚಿವ ಮೊಹಮ್ಮದ್ ಮಹಫೂದ್ ಎಂ.ಡಿ ಅವರು ಇತ್ತೀಚೆಗೆ ಸ್ಥಳೀಯ ವಿಶ್ವವಿದ್ಯಾಲಯ ಆಯೋಜಿಸಿದ್ದ ವಿಡಿಯೋ ಕಾನ್ಫರೆನ್ಸ್ನಲ್ಲಿ ಕರೊನಾ ವೈರಸ್ ಕುರಿತಂತೆ ಜೋಕ್ ಹೇಳಿದ್ದು ಇದೀಗ ವಿಶ್ವಾದ್ಯಂತ ಭಾರಿ ಟೀಕೆಗೆ ಗುರಿಯಾಗಿದೆ. ಅದರಲ್ಲಿಯೂ ಮಹಿಳೆಯರು ಸಚಿವರ ವಿರುದ್ಧ ಕಿಡಿ ಕಾರುತ್ತಿದ್ದಾರೆ.
ಹಾಗೆಂದು ಸಚಿವರು ತಾವೇ ಸೃಷ್ಟಿ ಮಾಡಿರುವ ಜೋಕ್ ಏನೂ ಹೇಳಲಿಲ್ಲ. ಬದಲಿಗೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಮೀಮ್ ಬಗ್ಗೆ ಅವರು ಉಲ್ಲೇಖಿಸಿದ್ದರು. ಜಕಾರ್ತದ ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳನ್ನು ಉದ್ದೇಶಿಸಿ ವಿಡಿಯೋ ಕಾನ್ಫರೆನ್ಸ್ನಲ್ಲಿ ಮಾತನಾಡುವ ವೇಳೆ ಅವರು, ಕರೊನಾ ವೈರಸ್ ಕುರಿತಂತೆ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದರು.
ಆಗ ಅವರು, ನನ್ನ ಸಹೋದ್ಯೋಗಿವೊಬ್ಬರು ನನಗೆ ಮೀಮ್ ಕಳುಹಿಸಿದ್ದರು. ಅದರಲ್ಲಿ "ಕರೊನಾ ಒಂದು ರೀತಿ ಘಾಟಿ ಹೆಂಡತಿ ಇದ್ದಂತೆ. ಮೊದಲಿಗೆ ನಿಯಂತ್ರಿಸಲು ಪ್ರಯತ್ನ ಪಡುತ್ತೇವೆ. ಆದರೆ ಅದು ನಿಯಂತ್ರಣಕ್ಕೆ ಬರುವುದಿಲ್ಲ ಎಂದು ತಿಳಿದಾಗ ಅದ ಜತೆಯೇ ಬದುಕಲು ಆರಂಭಿಸುತ್ತೇವೆ" ಅದೇ ರೀತಿ ಕರೊನಾ ವೈರಸ್ ಜತೆಗೂ ಬದುಕುವುದನ್ನು ಕಲಿಯಬೇಕಿದೆ ಎಂದು ಮೀಮ್ನಲ್ಲಿ ಇತ್ತು' ಎಂದಿದ್ದಾರೆ..
ಮೀಮ್ನಲ್ಲಿ ಏನೇ ಇರಲಿ. ಅದು ಸಚಿವರ ಬಾಯಲ್ಲಿ ಬಂದದ್ದನ್ನು ಮಹಿಳೆಯರು ಸಹಿಸಿಕೊಳ್ಳುತ್ತಿಲ್ಲ. ಆದ್ದರಿಂದ ಇವರ ವಿರುದ್ಧ ಬಹುದೊಡ್ಡ ಮಟ್ಟಿನ ಟೀಕಾ ಪ್ರಹಾರ ನಡೆಯುತ್ತಿದೆ. 'ಇದು ಕೀಳು ಅಭಿರುಚಿಯ ಹೇಳಿಕೆ. ಅಧಿಕಾರದಲ್ಲಿರುವವರ ಮಹಿಳಾ ವಿರೋಧಿ ಮನಸ್ಥಿತಿಯನ್ನೂ ಈ ಹೇಳಿಕೆ ತೋರಿಸುತ್ತದೆ' ಎಂದು ವುಮೆನ್ಸ್ ಸಾಲಿಡಾರಿಟಿ ಗ್ರೂಪ್ನ ಮುಖ್ಯಸ್ಥೆ ದಿಂಡಾ ನಿಸಾ ಯುರಾ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಇಂಥವರು ಸಚಿವರಾಗಲು ಅನರ್ಹರು. ಕೂಡಲೇ ರಾಜೀನಾಮೆ ನೀಡಬೇಕು ಎಂಬ ಒತ್ತಾಯಗಳೂ ಕೇಳಿಬಂದಿವೆ (ಏಜೆನ್ಸೀಸ್)