ಸಾವೋಪೌಲೊ: ಸಿಎನ್ಎನ್ ನ್ಯೂಸ್ ಚಾನೆಲ್ಗೆ ಲೈವ್ ರಿಪೋರ್ಟ್ ನೀಡುತ್ತಿದ್ದ ಬ್ರೆಜಿಲ್ನ ವರದಿಗಾರ್ತಿಯನ್ನು ವ್ಯಕ್ತಿಯೊಬ್ಬ ಬೆದರಿಸಿ ಆಕೆಯ ಎರಡು ಮೊಬೈಲ್ ಫೋನ್ಗಳನ್ನು ಕಸಿದುಕೊಂಡ ವಿಡಿಯೋ ಭಾರಿ ವೈರಲ್ ಆಗಿದೆ.
ಬ್ರೂನಾ ಮ್ಯಾಸೆಡೊ ಎಂಬ ಸಿಎನ್ಎನ್ ಬ್ರೆಜಿಲ್ ವರದಿಗಾರ್ತಿ, ಭಾರಿ ಮಳೆ ಹಿನ್ನೆಲೆಯಲ್ಲಿ ಟೆಟೆ ನದಿ ತುಂಬಿ ಹರಿಯುತ್ತಿರುವುದರಿಂದ ಸಾವೋಪೌಲೊದ ಬಂಡೇರಾಸ್ ಸೇತುವೆ ಬಳಿ ನಿಂತು ಶನಿವಾರ ಬೆಳಗ್ಗೆ ಲೈವ್ ರಿಪೋರ್ಟ್ ಮಾಡುತ್ತಿದ್ದರು.
ಮ್ಯಾಸೆಡೊ ಅವರು ಸಿಎನ್ಎನ್ ಆ್ಯಂಕರ್ ರಫೇಲ್ ಕೊಲಂಬೋ ಅವರಿಗೆ ಲೈವ್ ರಿಪೋರ್ಟ್ ನೀಡುವಾಗ ಶಂಕಿತನೊಬ್ಬ ಸೇತುವೆ ಮೇಲೆ ನಿಂತು ಗಮನಿಸುತ್ತಿರುತ್ತಾನೆ. ಈ ವೇಳೆ ಮತ್ತೊಬ್ಬ ವರ್ದಿಗಾರ್ತಿಯ ಬಳಿ ರಿಪೋರ್ಟ್ ಪಡೆಯುವ ಸಮಯದಲ್ಲಿ ಮ್ಯಾಸೆಡೊರನ್ನು ಎರಡು ನಿಮಿಷಗಳ ಕಾಲ ಹಾಗೇ ನಿಲ್ಲುವಂತೆ ಹೇಳಲಾಗಿರುತ್ತದೆ.
ಈ ಸಮಯದಲ್ಲಿ ವ್ಯಕ್ತಿಯೊಬ್ಬ ನಿಧಾನವಾಗಿ ರಿಪೋರ್ಟರ್ ಬಳಿ ಬರುತ್ತಾನೆ. ಬಳಿಕ ಆತ ಚಾಕು ತೆಗೆಯುವುದನ್ನು ನೋಡಿ ಮ್ಯಾಸೆಡೊ ಶಾಕ್ ಆಗಿ ಎರಡು ಹೆಜ್ಜೆ ಹಿಂದೆ ಸರಿಯುತ್ತಾರೆ. ಬಳಿಕ ಆತ, ಎರಡು ಸೆಲ್ಫೋನ್ ನೀಡುವಂತೆ ಮ್ಯಾಸೆಡೊ ಬಳಿ ಒತ್ತಾಯಿಸುತ್ತಾನೆ. ಮೊದಲೇ ಹೆದರಿದ್ದ ಆಕೆ ತುಟಿ ಬಿಚ್ಚದೇ ತನ್ನೆರಡು ಮೊಬೈಲ್ ಫೋನ್ ಕೊಡುತ್ತಾಳೆ. ಅದನ್ನು ಪಡೆದ ಆತ ಅಲ್ಲಿಂದ ಪರಾರಿಯಾಗುತ್ತಾನೆ.
ಅದೃಷ್ಟವಶಾತ್ ಮ್ಯಾಸೆಡೋ ಅವರಿಗೆ ಯಾವುದೇ ಅಪಯಾವಾಗಿಲ್ಲ. ಘಟನೆ ಬಳಿಕ ಆಕೆ ಸಿಎನ್ಎನ್ ಕೇಂದ್ರಕ್ಕೆ ಮರಳಿದ್ದಾಳೆ. ಪೊಲೀಸ್ ದೂರು ನೀಡಲಾಗಿದ್ದು, ಆರೋಪಿ ಪತ್ತೆಗೆ ಪೊಲೀಸರು ಬಲೆ ಬೀಸಿದ್ದಾರೆ. (ಏಜೆನ್ಸೀಸ್) (ವಿಡಿಯೋ ಕೃಪೆ: ಡೈಲಿ ಮೇಲ್)