ಗ್ಯಾಂಗ್ಟಾಕ್: ಕೆಲ ತಿಂಗಳ ಹಿಂದೆ ಲಡಾಕ್ನ ವಾಸ್ತವಿಕ ಗಡಿ ನಿಯಂತ್ರಣ ರೇಖೆ ಬಳಿ ಕ್ಯಾತೆ ತೆಗೆದಿದ್ದ ಚೀನಾ ಸೇನೆ ಇದೀಗ ಮತ್ತೊಮ್ಮೆ ಕ್ಯಾತೆ ತೆಗೆದಿದೆ. ವಾರದ ಹಿಂದೆ ಚೀನಾ ಸೈನಿಕರು ಸಿಕ್ಕಿಂನಲ್ಲಿ ಭಾರತದ ಪ್ರಾಂತ್ಯ ಪ್ರವೇಶಿಸಲು ಪ್ರಯತ್ನಿಸಿದ್ದು ಸಣ್ಣ ಪ್ರಮಾಣದ ಮುಖಾಮುಖಿ ನಡೆದಿತ್ತು ಎಂದು ಭಾರತೀ ಸೇನೆ ಸೋಮವಾರದಂದು ತಿಳಿಸಿದೆ.
ಜನವರಿ 20ರಂದು ಸಿಕ್ಕಿಂ ಸೆಕ್ಟರ್ನ ನಕು ಲಾ ಪ್ರದೇಶದಲ್ಲಿ ಮುಖಾಮುಖಿ ನಡೆದಿದೆ. ಚೀನಾದ ಪೀಪಲ್ಸ್ ಲಿಬರೇಶನ್ ಆರ್ಮಿ ಸೈನಿಕರು ಭಾರತದ ಪ್ರದೇಶವನ್ನು ಪ್ರವೇಶಿಸಲು ಪ್ರಯತ್ನಿಸಿದ್ದರಿಂದಾಗಿ ಮುಖಾಮುಖಿ ನಡೆದಿದೆ. ಅಲ್ಲಿನ ಸ್ಥಳೀಯ ಕಮಾಂಡರ್ಗಳು ಸಮಸ್ಯೆಯನ್ನು ಪರಿಹರಿಸಿದ್ದಾರೆ ಎಂದು ಸೇನೆ ತಿಳಿಸಿದೆ. ಮುಖಾಮುಖಿಯಲ್ಲಿ ಸಣ್ಣ ಪ್ರಮಾಣದ ಹಾನಿಯುಂಟಾಗಿದೆ. ಭಾರತೀಯ ಸೇನೆಯ ನಾಲ್ವರಿಗೆ ಸಣ್ಣ ಪುಟ್ಟ ಗಾಯಗಳಾಗಿವೆ. ಚೀನಾದ ಸೇನೆಯಲ್ಲಿ ಉಂಟಾದ ಹಾನಿಯ ಬಗ್ಗೆ ಸರಿಯಾದ ಮಾಹಿತಿ ಇಲ್ಲ. ಸುಮಾರು 20 ಚೀನೀ ಸೈನಿಕರಿಗೆ ಗಾಯಾಳುಗಳಾಗಿವೆ ಎಂದು ಕೆಲ ಮಾಧ್ಯಮಗಳು ವರದಿ ಮಾಡಿವೆ.
19,000 ಅಡಿ ಎತ್ತರದಲ್ಲಿರುವ ನಕು ಲಾ ಪಾಸ್, ಸಿಕ್ಕಿಂ ಅನ್ನು ಚೀನಾದ ಟಿಬೆಟ್ ಪ್ರದೇಶಕ್ಕೆ ಸಂಪರ್ಕಿಸುತ್ತದೆ ಮತ್ತು ಇದು ಸೂಕ್ಷ್ಮ ಪ್ರದೇಶವೆಂದು ಗುರುತಿಸಲ್ಪಟ್ಟಿದೆ.
ಈ ಹಿಂದೆ 2020ರ ಮೇ ತಿಂಗಳಲ್ಲಿ ಲಡಾಕ್ನಲ್ಲಿ ಚೀನಾ ಮತ್ತು ಭಾರತೀಯ ಸೇನೆಯ ನಡುವೆ ಮುಖಾಮುಖಿ ನಡೆದಿತ್ತು. ಅಂದಿನಿಂದ ಒಂದು ರೀತಿಯ ಬಿಕ್ಕಟ್ಟು ಉಭಯ ದೇಶಗಳು ನಡುವೆ ಉಂಟಾಗಿದೆ. (ಏಜೆನ್ಸೀಸ್)