ಬೆಳ್ಳಿತೆರೆ ಇರಲಿ ಅಥವಾ ಕಿರುತೆರೆಯೇ ಇರಲಿ ನಟನೆ ಮಾಡುವುದು ಕಲಾವಿದರ ಕನಸು. ಒಂದೇ ಒಂದು ಸಿನಿಮಾದಲ್ಲಿ ನಮ್ಮ ನಟನಾ ಕೌಶಲ್ಯ ತೋರಿಸುವ ಅವಕಾಶ ಸಿಕ್ಕರೆ ಸಾಕಪ್ಪ, ಅದನ್ನು ಸದುಪಯೋಗ ಪಡಿಸಿಕೊಂಡು ಒಳ್ಳೆಯ ಸ್ಟಾರ್ ಆಗಿ ಹೊರಹೊಮ್ಮಬೇಕು, ನಂತರ ಹೆಚ್ಚೆಚ್ಚು ಅವಕಾಶ ಗಿಟ್ಟಿಸಿಕೊಳ್ಳಬೇಕು ಎಂದೆಲ್ಲಾ ಕನಸು ಕಾಣುತ್ತಾರೆ. ಕೇವಲ ನಟನೆಯಿಂದ ಮಾತ್ರ ಇದೆಲ್ಲಾ ಸಾಧ್ಯವಿಲ್ಲ, ನೋಡಲು ಸಹ ಅಂದ, ಚೆಂದ ಹೊಂದಿರಬೇಕು ಎಂಬುದನ್ನು ಕೂಡ ಗಮನದಲ್ಲಿಟ್ಟುಕೊಂಡಿರುತ್ತಾರೆ. ಇದಕ್ಕಾಗಿ ಏನೇನೋ ಕಸರತ್ತು ಮಾಡುತ್ತಾರೆ.
ನೈಸರ್ಗಿಕವಾಗಿ ಇರುವ ಮೈಬಣ್ಣವನ್ನು ಬದಲಿಸಲು ಪ್ರಯತ್ನಿಸುವ ಕಲಾವಿದರು, ಉತ್ತಮ ಪ್ರಾಜೆಕ್ಟ್ಗಳಲ್ಲಿ ಅವಕಾಶ ಪಡೆಯಲು ದೇಹದ ತೂಕವನ್ನು ದಿಢೀರ್ ಎಂದು ಇಳಿಸಿಕೊಳ್ಳುತ್ತಾರೆ. ಇದಕ್ಕಾಗಿ ಯಾವ ಸೂಕ್ತ ಮಾರ್ಗವನ್ನು ಅನುಸರಿಸಬೇಕು ಎಂಬುದನ್ನು ಮರೆತು, ಅಡ್ಡದಾರಿಯನ್ನು ಹಿಡಿದು, ತಮ್ಮ ಪ್ರಾಣಕ್ಕೆ ಕುತ್ತು ತಂದುಕೊಳ್ಳುತ್ತಾರೆ. ಇದಕ್ಕೆ ಕಾಸ್ಮೆಟಿಕ್ ಸರ್ಜರಿ ಮೊರೆ ಹೋದ ಹಲವಾರು ಸೆಲೆಬ್ರಿಟಿಗಳು ಕಂಡ ದುರಂತ ಅಂತ್ಯವೇ ಸಾಕ್ಷಿ. ಕಾಸ್ಮೆಟಿಕ್ ಸರ್ಜರಿ ಮಾಡಿಸಿಕೊಳ್ಳಲು ಹೋಗಿ ದುರಂತ ಸಾವು ಕಂಡ ಕಲಾವಿದರು ಇವರೇ ನೋಡಿ.
1. ಆರತಿ ಅಗರ್ವಾಲ್: ತೆಲುಗು ಚಿತ್ರರಂಗದ ನಟಿ ಆರತಿ, 2015ರಲ್ಲಿ ಲಿಪೋ ಸೆಕ್ಷನ್ ಸರ್ಜರಿಯ ವಿಫಲದಿಂದ ಹೃದಯಾಘಾತವಾಗಿ, ಅಮೆರಿಕಾದ ನ್ಯೂಜೆರ್ಸಿಯಲ್ಲಿ ಸಾವನ್ನಪ್ಪಿದರು.
2. ಚೇತನ ರಾಜ್: ಕನ್ನಡ ಕಿರುತೆರೆಯಲ್ಲಿ ಅವಕಾಶ ಪಡೆಯಬೇಕು ಎಂದು ಕಾಸ್ಮೆಟಿಕ್ ಸರ್ಜರಿ ಮೂಲಕ ದೇಹದಲ್ಲಿನ ಫ್ಯಾಟ್ ತೆಗಿಸುವ ವೇಳೆ ಶ್ವಾಸಕೋಶಕ್ಕೆ ನೀರಿನ ಅಂಶ ಶೇಖರಣೆಯಾಗಿ ನಟಿ ಮೃತಪಟ್ಟರು.
3. ವಿವೇಕ್ ಶೌಕ್: 2011ರಲ್ಲಿ ಲಿಪೋಸೆಕ್ಷನ್ ಸರ್ಜರಿಗೆ ಒಳಪಟ್ಟ ಪಂಜಾಬಿ ನಟ ವಿವೇಕ್ ಶೌಕ್, ಹೃದಯಾಘಾತಕ್ಕೆ ತುತ್ತಾಗಿ ದುರಂತ ಅಂತ್ಯ ಕಂಡರು.
4. ಜಾಕಿ ಹೋ: 'ವೈಲ್ಡ್ ಎನ್ ಔಟ್'ನ ಸ್ಟಾರ್ ನಟ ಜಾಕಿ ಹೋ, 'ಗ್ಲುಟೇಲ್ ಆಗ್ಮೆಂಟೇಷನ್' ಸರ್ಜರಿ ಮಾಡಿಸುವ ವೇಳೆ ಶಸ್ತ್ರಚಿಕಿತ್ಸೆ ವಿಫಲಗೊಂಡು ಫ್ಲೋರಿಡಾದಲ್ಲಿ ಸಾವಿಗೀಡಾದರು.
5. ಸೇಂಟ್ ವಾನ್ ಕೊಲುಸಿ: 2023ರ ಏಪ್ರಿಲ್ನಲ್ಲಿ ಇದೇ ರೀತಿಯ ಸರ್ಜರಿಗೆ ಒಳಗಾದ ಕೆನಡಿಯನ್ ನಟ ಸೇಂಟ್ ವಾನ್ ಕೊಲುಸಿ, ಆಪರೇಷನ್ ಬಳಿಕ ಇನ್ಫೆಕ್ಷನ್ನಿಂದ 22 ವರ್ಷಕ್ಕೆ ದುರಂತ ಅಂತ್ಯ ಕಂಡರು.
6. ಲುನಾ ಆ್ಯಂಡ್ರಾಡೆ: 29 ವರ್ಷದ ಬ್ರೆಜಿಲ್ ನಟಿ ಲುನಾ ಆ್ಯಂಡ್ರಾಡೆ ಸಹ ಇದೇ ರೀತಿಯ ಮಂಡಿಯ ಲಿಪೋ ಸೆಕ್ಷನ್ ಸರ್ಜರಿ ಮಾಡಿಸಿಕೊಂಡ ಎರಡೂವರೆ ಗಂಟೆಯ ಬಳಿಕ ಹೃದಯಾಘಾತಕ್ಕೆ ತುತ್ತಾಗಿ, ನವೆಂಬರ್ 2023ರಲ್ಲಿ ಸಾವನ್ನಪ್ಪಿದರು,(ಏಜೆನ್ಸೀಸ್).