ಬೆಂಗಳೂರು: ಮುಖ್ಯಮಂತ್ರಿ ಹುದ್ದೆಯಿಂದ ಬಿಎಸ್ ಯಡಿಯೂರಪ್ಪ ಅವರನ್ನು ಇಳಿಸಿ, ಬೇರೆಯವರನ್ನು ಸಿಎಂ ಮಾಡಲಾಗುತ್ತದೆ ಎಂಬ ಸುದ್ದಿಗಳು ತೀವ್ರ ಸ್ವರೂಪ ಪಡೆದಿರುವ ಸನ್ನಿವೇಶದಲ್ಲೇ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ. ನಡ್ಡಾ ಅವರು ಅಚ್ಚರಿಯ ಹೇಳಿಕೆಯೊಂದನ್ನು ನೀಡಿದ್ದಾರೆ.
ಗೋವಾದಲ್ಲಿ ನಡೆದ ಬಿಜೆಪಿ ಸಭೆಯ ನಂತರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ನಡ್ಡಾ ಅವರಿಗೆ ಸುದ್ದಿಗಾರರೊಬ್ಬರು ಕರ್ನಾಟಕದ ಬೆಳವಣಿಗೆಗಳ ಕುರಿತು ಪ್ರಶ್ನೆ ಕೇಳಿದರು. ಅದಕ್ಕೆ ಸ್ವಲ್ಪವೂ ವಿಚಲಿತರಾಗದೆ ಉತ್ತರ ನೀಡಿದ ನಡ್ಡಾ, ‘‘ಯಡಿಯೂರಪ್ಪಾಜೀನೆ... ಉನ್ಹೋನೆ ಅಚ್ಚಾ ಕಾಮ್ ಕಿಯಾ ಹೈ. ಔರ್ ಕರ್ನಾಟಕ್ ಕೀ ಅಚ್ಛಾ ಚಲ್ ರಹಾ ಹೈ... ಬಾಕಿ ಯಡಿಯೂರಪ್ಪಾಜೀ ನೆ ಸಬ್ ಚೀಜೋಂ ಕೋ ಅಚ್ಛೀ ತರಹ್ ಸೇ ದೇಖ್ ರಹೇ ಹೈಂ... (ಯಡಿಯೂರಪ್ಪನವರು ಉತ್ತಮವಾಗಿ ಕೆಲಸ ಮಾಡುತ್ತಿದ್ದಾರೆ. ಕರ್ನಾಟಕದಲ್ಲಿ ಎಲ್ಲವೂ ಚೆನ್ನಾಗಿಯೇ ನಡೆಯುತ್ತಿದೆ. ಉಳಿದಂತೆ, ಯಡಿಯೂರಪ್ಪನವರು ಕೂಡ ಎಲ್ಲ ವಿಷಯಗಳನ್ನೂ ಉತ್ತಮವಾಗಿ ನಡೆಸಿಕೊಂಡು ಹೋಗುತ್ತಿದ್ದಾರೆ)’’ ಎಂದು ಸ್ಪಷ್ಟನುಡಿಗಳಲ್ಲಿ ತಿಳಿಸಿದರು.
ಮುಂದುವರಿದು ಸುದ್ದಿಗಾರರು, ‘ಮುಖ್ಯಮಂತ್ರಿಯನ್ನು ಬದಲಾಯಿಸಲಾಗುತ್ತದೆ ಎಂಬ ಸುದ್ದಿ ಕೇಳಿಬರುತ್ತಿದೆ’ ಎಂದು ಕೇಳಿದಾಗ, ‘‘ಆ ರೀತಿ ನಿಮಗೆ ಅನ್ನಿಸುತ್ತದೆ. ನಮಗೆ ಅನ್ನಿಸುವುದಿಲ್ಲ’’ ಎಂದು ಸ್ಪಷ್ಟಪಡಿಸಿದರು.